a[Ais 47:1-15; Jer 50:1-51:64]
b[Jol 1:15]
c[Ese 32:7; Mt 24:29; Mk 13:24-25; Lu 21:25;
dPed 6:12-13; 8:12]
e[Gag 19:24]
f[Ped 18:2]

Isaiah 13

Aisaiago Godigo po te tǫ kantri dabeba pususu bilali

(Dąį 13-23)

Godigo te bulu Babilon dene mawaibao

Godigo Babilon bulu dolabo homu yali, tama te po te nade ebo tiwai agai te po Aisaiabolo walalio, te Amosgo ogwabolo. a  Genuai Bidigo e tama po wali,

“Dagego te ni meni yai bulu dude te plak me dodolao.
Tama te ami bidi dabego sulama, sisinagasomainao.
Teba augwali polo asomainu i wao.
Nogo tų elama, te Babilon hanugo sunumi magi yao.
Tama augwali te hwįgi pomainu taga palao.
Eno Babilon dabe dali sębę mu ebao.
Tama eno ena digi ena bomai ami bidi dabe dąį ilali.
Tama eno augwali i olama,
te Babilon dabe dolomainu i wali.
Te ami bidi dabe augwali Babilon dabeba
hwįgi pabo wiegi yai homu mu yali,
magi baso meni, augwaligo koneani,
eno te hwįbode ugwa ela holaibao,” te po wali.
Dagego odao, te kulukulu
te bulu dude dabe wabo odiąo.
Te geninama bidi dabego kulukulu te obao.
Te tigidali bulu hauwa badu
ami bidi dabe te sisinagasali dao.
Tigidali Bomo Elalubo Genuai Bidigo
aga bomai ami bidi dabe sisinagasali dao,
te hwįabo bidi dabe.
Augwali te digibulu bulu dabe te asalio,
tama augwali te Genuai Bidigo
enesigi de ene si tiwai dao.
Genuai Bidi aga sębę mu elama,
tama augwali sabolama,
te tǫde bulu dabe sese dolama, silimainu yaibao.
Dage gela bomonama wao. Magi baso meni.
Te Genuai Bidigo aga tigidali
we bidi po tųde dodolabo bodolu pąba
polo yagasalio.
Tama te sogo God Tigidali Bomo
Elalubo Bidigo te genuai dolabo sę taga palaibao.
b 
Tama tibaso, tigidali we bidigo dili naga mialuaibao.
Tama augwaligo bomo mu menia saibao.
Tigidali wi mu yaibao.
Tama augwali genuai dene mu saibao,
te wego wai sainu dene ebo tiwai yaibao.
Te tigidali bagego gesabidi augwali
tigidali dene ebao wabo gesabidi ola mawaibao.
Tama augwaligo gasa bidi dabego
gesabidiba tonobo sogo da, augwali wi mu yaibao.
Mu tama, te dwai sogo megi te pedalobao.
Te da te Genuai Bidigo polo bodolu muani,
te sogo te agai genuai sębę dali asiyu,
tigidali tǫ dabe doliyu,
tama te dwai sę ebo we bidi dolama, silaibao.
10 Te sogo te tigidali hǫ dabego ula sula saibao.
Tama giliga pedalaibao, tiali goli agai
ula hulia sigi paibao.
Tama polua munu me nanogobeo.
c 
d 
11 Genuai Bidigo te po wali, “E tǫ te we bidigo
dwai sęgęgo pągąna pali.
Tama tibaso, eno augwali dene mawaibao,
te augwaligo dwai sę yali wei ponoyu yaibao.
Te bidi dabe augwa digi augwa nogi
ugwaba sabo bidi dabego nogieno aiyaba elaluaibao.
Me, homu dene isiąyu, te augwaligo gasa bidi dabe
aiyaba elalubo bidi dabe me.
12 We bidi hauwa mu isaibao.
Tama eno deli deli naga bidimainu talagalo paibao.
Tama augwali hauwa mu ma sugobeo,
te Ofir bulude sabo wiegi yai gol
susiąbo tiwai yaibao.
13 Tama te sogo
ena Tigidali Bomo Elalubo Genuai Bidi,
ena te eno genuai posolai sębę dali mu asaibao.
Tama eno dagalu dali, tǫ dali si mali ilaibao.
Tama tǫ iba kila selama, tama aga pesage taga paibao.”
14 “Tama te sogo we bidi dabe wi pabo
te bulu hasa dabe bidigo enainu
ebaso, wi pabo tiwai yaibao.
Me, te sipsip kibu dabe augwa tonalubo bidi meniama,
gegede bilibo tiwai yaibao.
Te augwali augwa bulu muba dabe wi ma paibao.
Awe, augwali augwa page buluba dabe polo wi soaibao.
15 Tiali goli, mena bidi me boi bidi dabego touwali,
teda augwaligo hwą bainatgo enama, isilaibao.
Mu tama, te boi bidi dabego augwali
bobobage hwągo elaibao.
16 Me, te boi bidi dabego te dwasianu
wai bǫų dabe augwa idago nogode kega selama,
tama augwa ida aya sigo tonalubadi,
augwaligo te wai bǫų dabe tǫba
sąbo side, te wai dabe isaibao.
Tama boi bidi dabego augwaligo be
dolama, augwaligo nai dabe wi saibao.
Tama me, augwali we dabe me penani sę yaibao.”

17 Genuai Bidigo te po wali, “Suao!
Eno te Midia dabego homu hogodolama,
Babilon dabeba hwįagasomainu yaibao.
Augwaligo Babilon bagego silva de
gol si homu kone elama,
te buluba wąbi hwįagasobeo. Menio.
18 Augwaligo te Babilon dabe mu
sia sayabo homu bomo mu yalio.
Augwali gesi bidi dabe augwaligo
enesigigo elama, isilaibao.
Tama me augwaligo genuai me dwasianu wai bǫų dabe
augwaligo elama, isilaibao.
Augwaligo augwali dali homu dene mu egobeo,” wali.

19 Genuai hanu Babilon te genuai mu
elama, tama sawi mu elama,
tama tigidali gasa hanu dabe aiyaba elaluali.
Te Babilon bulu we bidi dabego
augwa hanugo wiegi yai nogide mu
gana pabo dao.
Tiali goli, Godigo Babilon dolaibao,
te agai Sodom de Gomora si
dolali tiwai dolaibao. e 
20 Te bulude bidi munu me ma bidigobeo.
Tama me ma, te Arap dabe augwaligo
sel be teba sę yagasogobeo.
Tama te sipsip kibu tonalubo bidi dabego
te sipsip kibu teba nosai tumainu
teba me tonaluagasogobeo.
21 Te bulu te olo bulu gagalama,
tama te bulu hasa dabe naga teba bidagasaibao.
Te hulide bilibo ba dabe te bede dabe bidaibao.
Te haniani dwai ba dabe me bidaibao.
Tama bulu meme dabe te dolali hanude
ugwaba samanuyu,
edaba samanuyu, ela bilaibao. f 
22 Tama me, te tuni bidigo bede,
me genuai bidi dabego bede dabe
te bulu yowi dabe bidagaselama, go weyu yaibao.
Mu tama mu, te Babilon dolabo sogo
bodolu pąba polo yagasalio.
Copyright information for `MPS