a[Jer 49-23-27; Amo 1:3-5; Sek 9:1]

Isaiah 17

Genuai Bidigo te Siria dabe me Israel dabe si dolaibao po wali

Genuai Bidigo te hanu Damaskus dolaibao po mani. Agai e tama po wali,

“Te boi bidi dabego te Damaskus dolaibao,
te Siria dabego genuai hanu,
tama olo pobele bage pesage naga
pesage holaluaibao.
Te Aroer dabego hanu dabede
we bidi me bidigobeo.
Tama tibaso, te bulu dabe te olo sipsip
kibu dabego bulu pesage gagawaibao.
Tama te sipsip kibu dabe bugagia bidaibao.
Magi baso meni. Te augwali wi ilabo
bidi mu menia saibao.
Te boi bidi dabego te Israel dabego
bomai hanu dabe dolaibao.
Tama me ma, augwaligo te Damaskus
we bidi tonaluaibao.
Megi da, Israel de Siria si genuai nogi
elama, genuai we bidi hani hauwa te bidibao.
Tiali goli, te bulu si dolama,
tama dwasianu we bidi hani naga tede bidaibao.
Ena Tigidali Bomo Elalubo Genuai Bidigo
eno po polo wai dao,” wali.
a 

“Te sogo te Israel dabego genuai nogi sia saibao.
Tama augwaligo wiegi yai nai dabe me
augwaligo we bidi hauwa sia selama,
tama te bulu dwai mu bidaibao.
Te gasigo te tigi genuai yai bidi gegelama,
tama te bidi nomona selama,
dili pulu ha ebo tiwai yaibao.
Megi te Israel dabe te wit nai hauwa
te odogo malu Refaimde bulubo
wit hauwa holobo ąǫ te ebao.
Tiali goli, augwali boi bidigo dabego elebo si da,
teda augwali te wit dili bidigo togai
deli deli dolalua pabo tiwai yaibao, te wit gide.
Te we bidi deli deli naga me elaluaibao,
te ni oliv du bidigo wąbi dagego elama,
tama sai digi te nedu du deli deli ni abude walalubo,
me si sela te nologode dabe walalubo tiwai yaibao,
te hauwa bidigo siyu tagalai dabe.
Ena Genuai Bidi, Israel dabego God,
eno po polo wai dao,” wali.

Tama te sogo te we bidi dabe homu begelama,
tama Israel dabego Godiba lotu po waibao,
te aga te augwali nigali God dao.
Tama aga da te Israel dabego Dwagi
Yai Doloba Pai Kolesaga Naga Ebo God dao.
Tama augwaligo te alta augwa digi
nigali teba lotu weyu,
me augwaligo we piksa tibo god
Aseraba lotu weyu, me egobeo.
Me, augwaligo te wiegi yai denami ebo
pauda altade lotu po me wagobeo.
Te augwaligo augwa digi augwa nogogo
nigai naiba lotu wabo sia saibao.

Tama te Godigo te Israel bulu dolobo
sogo da, te augwaligo
bomai hanu dabe dola silama,
tama augwali olo bidaibao.
Te hasia te tǫde bidali bidi hanigo hanu tiwai yaibao.
Te hani augwali Israel dabego hwįagasainu asobaso,
augwali augwa hanu taga peyu, augwali wi pai dao.
Tama te hanu dabe olo te bulu dude dabe
elaluyu ebadi, te busi hola paibao.

10 Magi baso meni. Israel dabe,
nago te God nage ma oda sabo God
nago homu kone ebeo.
Aga te genuai masigi te dwai sogo duala
sigi pabo masigi tiwai dao.
Tiali goli, mu tama, nago aga mu gegeda pali.
Tama nago gasa hanigo godiba lotu po wali.
Tama nago homugo tibo te god dabego nage tau selama,
tama nage bugagia bidiba homu ebo.
Tiali goli, nage dolama, tama nage usu ma yabo sunumi
mu menia saibao.
Te naga gide ni wain wai bulama,
tama kulubi polo holama, tama aga
du walainu duduli ebo sulama
nage wiegi yai homu ebo tiwai dao.
Tiali goli, nago agai du sogobeo. Menio.
Deli sogo polo tama te wain ni dolama,
sasi elama, te wain gi dolaibao.

Godigo bomai bulu dabe aiyaba elaluali

12 Tega, te kulukulu genuai wabo odao.
Te tigidali bulu ami bidi dabe
sisinagasabo kulukulu dao.
Tama augwaligo kulukulu te tamu wę holama,
degeyu wabo kulukulu tiwai dao, te tamu wę saneba.
13 Te boi bidi dabe asali,
te tamu wę aluasa asobo tiwai yali.
Tiali goli, Godigo augwali sesanobaso,
tama augwali augwa buluba ma wi pela wali.
Te Godigo augwali sela sąyani,
te waligo ni yabe dabe subigila sela sąbo tiwai eyu,
me te hogabo waligo
te hogomu dabe pobele bage ugwaba
sela holobo tiwai yaibao.
14 Polo tama te boi bidi dabego te bulu
pio bagua sagasobo si da,
te we bidi dabe wi dwai mu ebo dao.
Tiali goli, kigamu da, boi bidi dabe menia saibao.
Tama te tobage kolesagago Godigo
te boi bidi dabego da dolama,
dago nai dabe wi sela pai badi
te sunumi palibo dao.
Copyright information for `MPS