Isaiah 20

Asiria dabego ebo kolesaga te Godigo yabo homu ebo kolesaga ola mobao

Te Asiria tuni bidigo pode te aga polalubo ami ofisa bidigo aga ami bidi dabe selama, te hanu Asdotba me bulu Filistiaba hwįgi pali. Te kibu be sela polasa, te Asiria dabego te Filistia hanu dabe sabode, Genuai Bidigo Aisaiabolo hasia po wai dao, te Amosgo ogwabolo te kolesaga yabo po. Aisaia aga hobedai ugwa me aga sągą nadoba me gudubo tagalama, olo bilao po wali. Tama Aisaiago Genuai Bidigo po odama, tama tiai dao. Tama te Asiria dabego te hanu Asdot polo sabo sogo da, Genuai Bidigo te po wali, “Te kibu be sela tama, Aisaia eno sę bidi aga ugwa me sągą nadoba gudisąma olo bilai dao. Teda te dwai sę te Isip dali Sudan side pedalabo sę dąį tiwai aga bidali dao. Te Asiria tuni bidigo te Isip dali Sudan bulu siba hwįgi paibao. Tama agai te bulu sigo gesi bidi me, monu dabe me, kalabus elama, gasa buluba sela paibao. Tama augwali pabo sogo da, augwali ugwa me, sągą nadoba me, me gudasa pogobeo, mu meni yaibao. Augwali habu olo bidiyu, augwali hale mu yaibao. Te Filistia we bidi dabego te Sudan dabego augwali hwįbode tau siyu, me te augwaligo genuai nogi ugwaba sabo Isip dabe, te augwaligo te sę sulama, tama augwali noma selama, tama augwali homu dwai yaibao. Tama te sogo, te nambis we bidi, te Filistia dabe, augwali augwa hasi tomode po miyu, te po waibao, ‘Iya, tegoba! Dago te bomai bulu bidi dabebolo da tau somainu no munaluao po hanalu wai goli dama, tiyu Asiria dabego da dolagaidali weyu. Tiali goli, suao, augwa digi dolalio. Te da te Asiria dabego bainat hwą geda muabo sunumi menio,’ te po waibao.”

Copyright information for `MPS