a[1 Ko 15:54; Ped 7:17; 21:4]
c[Ais 15:1-16:14; Jer 48:1-47; Ese 25:8-11; Amo 2:1-3;
dSef 2:8-11]

Isaiah 25

Godigo nogi ugwaba siyu wabo balia po

O Genuai Bidi, nage eno God dao.
Tama eno nago nogi ugwaba saio.
Magi baso meni.
Nago te bidigo isąwai bomai sę dabe mu ebo dao.
Da tau sainogo, nago tigidali nai dabe mu usu nani,
te polobadu digi nago yaibao po wali gilama.
Nago te genuai hanu dabe
te pobele bage pesage holai dao.
Tama te bomai obo dabe elaluai
hanu dabe sese dola silai dao.
Tama te Israel hani isąwai bagego
bomai hanu dabe te boi bidi dabego
sese mu dola silai dao.
Tama augwaligo ma hodolobo usu egobeo.
Te bomai bulu we bidi dabego
nagebolo genuai nogi mawaibao.
Te tǫ pedai kantri meba we bidi dabego
gasa we bidi dali homu dene isąwai goli,
te tobage kantrigo moni hanude bidibo we bidi
dabego nage wi eyu, nage dologode bidaibao
Nage te nai meni yai bidi dabe
duala sabo bulu tiwai nage bidai dao.
Tama augwali sęgę ebo sogo augwali bugagia bidai dao.
Te dwai bidi dabego homu sębę
te bomai waligo te be daga tigiba
hudula palobo tiwai dao, me te sesana pai giliga
te kemi tǫ wa pai bulude nanebo tiwai dao.
Tiali goli, te tulubage sogo, me wali ebo sogo,
nago augwali mesegelama, tonaluai dao.
Te nai meni yai bage nago tonaluai dao.
Tama bomai giligago augwali ulumainu
sula tagalai menio.
Genuai Bidi, nago te boi bidi dabego
pedauwali paninama,
tama te dwai bidi dabego i hae wabo
tama sia sabo dao.
Te pǫgo te sesana pai giliga dualobo tiwai ebo dao.
Tama te bulu kedaua pabo dao.

Godigo genuai nai te bulu du Saionde sisi elama, muaibao

Te bulu du Saionde,
Tigidali Bomo Elalubo Genuai Bidigo
geninama nai mu sisi yaibao.
Te wiegi wiegi yai hasa dabe me,
tuabo wain ąį dabe me elaluaibao.
Tama tigidali bulu we bidi dabe
te nai tuboba sisinagasaibao.
Megi da, te we bidi hani augwali
homu sęgę elama bidibao,
te augwali te isibo kolesagade
homu dene elama, te bidibao.
Tama augwali te sęgęgo te ugwa tiwai
augwali mesega sai dao.
Tiali goli, te Saion bulu dude da,
Genuai Bidigo augwaligo homu sęgę me
hobede ebo dabe sese sia sąwaibao.
Agai te isibo me silama, tama augwali
me isibo sę me egobeo.
God Genuai Bidigo augwaligo gela ųga
sia sąnama, tama augwaligo gedu ąį wa sąwaibao.
Te we bidigo gedu ąį menia saibao.
Tama agai aga we bidi tigidali tǫde
bidibo we bidigo hale me sia sąwaibao.
Genuai Bidigo te sę yabo po polo
wai dao. a 
Te sę dabe pedalobo sogo,
te we bidi dabego te e tama po waibao,
“Mu tama dao, Genuai Bidi dago God dao.
Dago homu agade dąų olama, tonaluai dao.
Tama agai da ma oda sai dao.
Aga deli naga Genuai Bidi dao.
Tama agai da tau sai dao.
Tama tibaso, da wiegi yai homu
penene genina mu inao.
Magi baso meni. Agai da polo ma
oda sai dao,” te po waibao.

Genuai Bidigo bulu Moap dolaibao

10 Genuai Bidigo Saion bulu du bugagia tonaluaibao.
Tiali goli, agai te Moap dabe mu dolaibao.
Agai te boi bidi dabego augwali dolama, mesegelama,
agayagasomainu yaibao.
Te kau kibu dabego nosai augwa diba
agalama, ela bulubo tiwai yaibao.
25:10Matmena, te Moap dabego taun hanu me deli da. Tiali goli, te Hibru pogo te nogi Matmena te tiwai si page pąde elalubao, “di tabo pesage da,” wabo. Te da, te profet bidigo te hanu te gagali po weyu, wabo ąǫ yali, te Moap dabego hanubolo.

11 Te Moap dabe te bidi moni tamu wę
tomode hagayabo ąǫ ebaso,
te wę saneba painu paulama,
nogo ąį togobo tiwai yaibao.
Te augwaligo dolidali weyu, haniani sę mu yaibao,
te augwali dolobo side.
Tiali goli, Genuai Bidigo augwaligo
bomo dali kolesaga si aiyaba elaluaibao.
Tama mena sę augwaligo yali
te sę dabego augwali tau me sogobeo.
12 Tama agai augwaligo hanu bomai
obo dabe hųgia sąwaibao.
Megi da, te obo dabe sigide ugwanu mu te elalubao.
Tiali goli, agai te obo dabe tǫba mu tulalumainu yaibao.
c 
d 
Copyright information for `MPS