a[Hi 10:27]

Isaiah 26

Juda dabego balia me deli waibao

Te sogo nosali pedalobaso, te Juda tǫde bidalubo we bidi dabego te balia po waibao.

Dago hanu mu boma pai mu dao.
God aga digi dago bomai obo bidalio.
Agai da ma polo oda sai dao,
tama tebogo agai da bugagia bagulali, te hanu me
deligo bomai obo tiwai yalio.
Te homugo genuai sunumi dabe dayao.
Te doloba pai we bidi tomoba tula asomainao.
Tigidali sogo te bage augwali
Genuai Bidi dologode naga elalubo dao.
Genuai Bidi, augwali nage dologode naga bidibo dao,
tama augwaligo homu nage delide
naga dąų olama, elalubo dao.
Tama tibaso, nago augwali dali
homu nagame ebo kolesaga
augwali mu pągąmainu ebo dao.
Tigidali sogo Genuai Bidi
dago bomai duala sabo pesage dao,
te moni dobo masigi tiwai dao.
Tama aga tigidali sogo tama bidada peyu, bididuaibao.
Tama tibaso, dago agade homu dąų mu olama,
tama aga dologode tigidali sogo bidinao.
Genuai Bidigo te we bidi genuai
nogi yali we bidigo nogi aiyaba elalubo dao.
Tama agai te bomai hanu dabe hųgibo dao.
Tama augwali tǫba sese tama tulalubo dao,
te tǫ hogomude elalubo dao.
Te we bidi dabe augwaligo
te nai meni yai we bidi dabe dali dwai sę mu yali.
Tama te bagenu augwali nai dabe mu menia pali.
Tiali goli, megi da, te nai meni yai
bidi dabe augwali te dolama,
tagalali hanu pobele bage daide agaga bilibao.
Te sunumi te doloba pai we bidi dabe
bilalubo sunumi da dolo naga te elalubao.
Genuai Bidi, nage doloba pai God dao.
Tama nago augwali bilibo sunumi dodolobo dao.
Awe, Genuai Bidi, da nago bomai po
wali peyu, bilibo dao.
Tama dago nage deli naga tonaluyu, tonalubo dao.
Dago nago genuai nogi godolo mu ebo dao.
Te hulide eno homu nage delide naga elalubo dao.
Tama kigamude ena nage dali bidibo
godolo mu ebo. Magi baso meni.
Nago te tǫde we bidi po tų ela mabo dao,
te augwali nago doloba pai kolesaga
ola mawainogo.
10 Tiali goli, nago dwai we bidi hobede igi sogo da,
teda augwaligo te nago doloba pai
kolesaga konea sigi menio.
Augwali doloba pai we bidigo
te tǫde bidibo me tagala,
augwaligo te dwai kolesaga me ebo sę yaibao.
Tama augwaligo nago
genuai nogi koneyu, me augwaligo
nago bomo me koneyu, me augwali
nage dologode me elalugi menio.
11 O Genuai Bidi, nago nogo polo balalubao,
te dwai we bidi dene mawainogo.
Tiali goli, augwaligo subeo.
Genuai Bidi, te nago naga we bidi godolo mu elama,
tau sabo kolesaga te augwaligo sumainao.
Tama te dwai bidi dabe augwali hale dwai mu yaibao.
Tama nago naga boi bidi dabe ulabo isi,
te isigo augwali mu ula silaganio. a 

12 Genuai Bidi, nago da tomode
wiegi yai homu nagamea pai ebo
sogo pedalomainu ilibo dao.
Nago dago tigidali sę dabe dodolama,
tama wiegi yai pedalumainu ilibo dao.
13 O Genuai Bidi, dago God,
te gasa genuai bidi dabego da tonalubadi goli,
dago nage deliba naga genuai nogi mabo dao.
14 Megi da, te genuai bidi dabe polo isila palio.
Augwali me bidibeo,
tama augwali ma hodalobo usu me egobeo.
Nago augwaligo bomo aiyaba elaluama,
tama nago augwali dolama,
tama nago augwali mu dolai dao.
Tama te we bidi dabego
augwaligo nogi me kone ebeo.
15 Genuai Bidi, nago dago hani genina mu ilalio.
Awe, nago we bidi hani moni hani mu pedelalio.
Tama dago bulu genuai mu pedalumainu eyu,
nago dago tǫ dąį ibanu mu kidilalio.
Tama te tialigo naga genuai nogi
genuai mu pedalumainogo yalio.
Awe, dago bulu genuai mu pedalomainu ilalio.
16 Genuai Bidi, nago naga we bidi
dodolomainogo eyu, dene mu mani,
tama augwaligo bomo mu sia salio.
Tiali goli, augwali moni homu dene dali
nage pageba aselama,
nageba gedu haluasa po walio.
17 Te nago gedude da
te wego wai ame nainu dene ebo
tiwai elama, bidai dao.
Da te genuai dene dali, sęgę dali tolama,
dago homugo tiali,
dago wiegi yai nai dago me sugowe homu yali.
Tiali goli, te menio.
Dago magi nai me haninibeo.
Dago te boi bidi dabe aiyaba elalubo
bomo mu meni sai dao.
Tama dago tǫde bugagia bidabo meni yai dao.
19 Tiali goli, naga te hani polo isila pali,
tama augwali megi hulia sai madi bidibao.
Te augwali ma hodaloama, te ula ma sueibao.
Nago te isai bidi dabe bidibo ula ma mabo dao,
te hulide tulubage segeni elama,
te tǫ wa pai madi te gesi noma
nosai hogonu ma holomainu ebo tiwai ebo dao.
Dage te gų pagede pila mubo bage, dage hodaloama,
dage wiegi yai homu elama, po hae waiąo.

Genuai Bidi aga we bidibolo dene menama, tama augwali bugagia ma bidimainu ilali

20 Eno we bidi dabe, dage duga be
tomoba dabe pelama,
duga be sunumi dabe palia siąo.
Dage pęwądage sogo dualaluama,
tama Genuai Bidigo sębę silibo side tagalao.
21 Suao, Genuai Bidi aga bulu dagalu
tagalama, e tǫba te asobao,
te e tǫde we bidi dene mawainu,
tama augwa yali dwai sę wei ponainu.
Tama tǫgo te bidi dabego kaneme me geme dualogobeo,
te gasa bidi dabego augwali
ela wialali dabe. Menio.
Agai te bidi dabego yali dwai kolesaga
dabe sese tama haninaibao.
Copyright information for `MPS