Isaiah 32

Te wiegi yai tuni bidigo te bulu tonaluaibao

Odao, te tuni bidi me deli pedalaibao.
Tama te tuni bidi dali, tigidali tǫ pedai
kantrigo genuai bidi dabe dali,
augwaligo wiegi yai doloba pai kolesaga naga elama,
te we bidi dabe tonaluaibao.
Te deli deli genuai bidi dabego
te we bidi dabe augwali tau somainu asali bidi dabe,
augwaligo tau saibao.
Augwali da, te we bidi augwali te genuai
wali dali tulubage dabe ebo side,
augwali te duala sabo pesage tiwai dao.
Tama me, augwali te wę te hogomua pai
pesageba pabo tiwai, me te moni masigigo
te hogomua pai pesage
te masigigo seselalubo tiwai dao.
Tama te bidi dabe te tįwai madi duala selama,
toma tubo tiwai dao,
te boma pai giligade.
Tama megi e tibo sogo, te we bidi augwaligo gedugo
tigidali nai dabe subo usu mu yaibao.
Tama me augwaligo olo bugagia dala pelama,
tama augwaligo tigidali po bugagia odaibao.
Tama te bidi dabe te homu kone bugagia palisąma,
te dwai dwai sę dabe yali bidi dabe,
te bage augwali wiegi yai homu kolesaga selama,
te sę dabe tama yaibao.
Tama te bidi dabe te augwa hasi
po wabo pedauwali sęgę yali bidi dabe, augwali
bugagia po mu waibao.
Tama te dwai bidi dabebolo genuai nogi me
te dwai polobo kolesaga dabe yali da,
te sę dabe mu sia saibao.
Te polobo sę ebo bagego
te subigila po dabe wabo dao.
Tama tigidali sogo augwaligo
dwai polobo sę naga ebo dao.
Augwaligo Genuai Bidigo
godolo yabo sę dabe ebo menio.
Tama ili po hauwa Genuai Bidide ela palobo dao.
Tama augwaligo te nai meni yai
bidi dabebolo nai masiąma eyu,
me augwaligo te wę nogone ebo
bidi dabe wę mayu ebo menio.
Tama te dwai bidi dabego
te dwai homu kolesaga hauwa
augwaligo tobolude pągąna pabo dao.
Augwaligo homu kone palama,
tama augwaligo haniani ili po wabo
homu kolesaga dabe gegelama,
tama augwaligo te nai meni yai
we bidi dabego po tų ebode dolama,
aiyaba elaluabo sunumi dabe gegebo dao.
Tiali goli, bidi wiegi yai dabe augwali
genuai nogi elaluaibao.
Te tigidali sogo augwaligo doloba pai
kolesaga naga ebo dao,
tama augwaligo wiegi yai kolesaga naga
yabo homu bomo ebo dao.

Te we sibi augwali hobedai gela omainao

Te Jerusalem we dabe,
dagego homugo da, dage wiegi yai
bidiba homu te ebao.
Tama dage tigidali sogo bugagia bidaiba homu te ebao.
Tiali goli, dagego olo saganama, eno po bugagia odiąo.
10 Te usu, megi dage homu tegaluama bidiagameo.
Tiali goli, dage tonaluiąo.
Te 13 o 14 polua bolo pomainao.
Teda dage wi elama, noma saibao. Magi baso meni.
Dagego te wain gi dabe te du me walogobeo.
11 Megi da, dage wiegi yai te bidibao,
tama dagego homugo dage wiegi yai
te bidiba homu ebao.
Tiali goli, dage noma selama, wi elama,
tama duga wiegi yai ugwa dabe
peda sąnama, tama hobedai ugwa dabe gudiagameo.
12 Dagego duga hagawiade nogo sawaligo elama,
tama dage hobedai gela duga wiegi wiegi yai gi dabe,
me duga wiegi yai sawi yai wain
gi hagede dage hobedai gela waiagameo.
13 Tama dagego eno we bidigo
tǫ hagede dage hobedai gela waiagameo.
Magi baso meni.
Te dwai sesane bono me dwai nosai dabe
te bulu tǫde koliaibao.
Awe, dagego duga te gana peyu ebo
te be dabe homu kone elama,
tama dage hobedai gela waiąo.
Tama me, dage te duga te gawelama
bidibo te hanu dabede me hobeda gela waiąo.
14 Magi baso meni.
Te tigidali we bidi dabe augwali te hanu taga pelama,
tama augwali te hanude ugwa
eda iyu, augwali te hanude sę dabe me egobeo.
Te tuni bidigo be, me te ami bagego
bomai obo, me te ami bidi dabe
bidama boi bidi dabe asobo tonalubo te bobobage
sigi be dabe,
sese olo elaluama, tama dolaibao.
Tama te bulu yowi donki dabe
tede biliyu, wiegi yai homu yaibao.
Tama me, te sipsip kibu dabe aselama,
teba nosai tuagasaibao.

Genuai Bidigo aga we bidi dwagi yai bidabo sogo mawaibao

15 Tiali goli, Genuai Bidi aga mobo
bidi daba ma tagala palaibao,
bidigo wę gelebo tiwai yaibao.
Tama te nai meni yai kemi sane nai
meni yai olo elalubo bulu
wiegi yai bulu tǫ ma yaibao.
Tama haniani nai dabe tede holaibao.
Teda te mone buside te ni dabe
olo holobo tiwai holaibao.
16 Te wiegi yai doloba pai kolesagago
naga te tigidali tǫ dabe tonaluaibao.
Te po tų dolo naga dodolobo kolesagago
te we bidi dabe bugagia dodolaibao.
17 Tama te doloba pai kolesagago
te bidi hasi godolo ebo kolesaga ilaibao.
Tama te we bidi wi me isąma elama,
tama augwali tigidali sogo bugagia
dili elama, dolaluaibao.
18 Tama Genuai Bidigo e tama po wali,
agai we bidi dabe augwali bugagia bidiyu, augwali
augwa bulude bugagia homu tegaluama,
toma tuaibao.
Tama augwali magi naide wi me egobeo.
19 Te genuai talua ge tulubage tulama,
te mone buside moni ni dabe me
dolobadi me, tagala.
Tama tigidali hanude be dabe tǫde wiala pai goli,
20 te Genuai Bidigo we bidi, dage bugagia bidaibao.
Tama dagego te nai dabe te wę elalubo
bulu badu dagego nai bulaibao.
Tama dagego duga kibu bulmakau dabe,
me donki kibu dabe, augwali augwa
digi nai tumainu sula tagalaibao.
Copyright information for `MPS