Isaiah 33

Te we bidigo Genuai Bidigo augwali tonalumainu gedu haluasa po wali

Dage te gasa bulu dabe dolobo hani, dage
dolaibao.
Te mu tama, dage me dolobe dao.
Tiali goli, dagego gasa bulu dabe
dolobo bodolu sia saibao.
Tama duga digi duga dolaibao.
Dagego te gasa hani dabe ili po walama,
tama dagego te po mia selama,
tama dagego augwali te boi
bidi dabego nogoba mubo dao.
Te mu tama, te gasa hanigo da dage me
ili po me ola masiąbadi goli.
Tiali goli, dagego te gasa bidi dabe
ili po wabo sogo te sia saibao.
Tama te gasa bidi dabego dage ili po olama,
tama dage te boi bidi dabego nogoba muaibao.
O Genuai Bidi, dago homu kolesaga
nage deliba naga elalubao.
Nago da hobede elama, tama tigidali
sogo da bugagia tonaluagameo.
Tame te sęgę ebo sogo, nago da
ma selama, tama dago augwali
aiyaba elalumainu ilao.
Te bomai bulu bidi dabego nago
te be kulukulu tiwai i wabo odobo sogo, me nago
augwali dali hwįainu hogodasa asobo si da,
augwali we bidi sese wi paibao.
Tama augwaligo te taga pabo
nai dabe da, te gasa bidi hani dabego
polo sagasaibao.
Teda te gide mano dabego gide nai dabe
tula silibo tiwai yaibao.
Genuai Bidi aga genuai nogi mu
elaluyu, tama aga bulude ugwade mu bidibao.
Tama agai aga doloba pai kolesaga dali,
agai po tų dolo naga ebo kolesaga dali, te tigidali
Jerusalem tǫde pągąna paibao.
Tama tigidali sogo agai aga
we bidi dage bugagia tonaluyu,
tama agai dage bomo elama,
tigidali sogo bidimainu yaibao.
Tama agai dagebolo dwagi yai homu kolesaga dabe,
me kolesaga dabe hauwa mu mawaibao.
Tama dagego mu tobolu dįa holai elalumainu yaibao.
Te wi elama, Genuai Bidi dologode elalubo kolesagade,
Genuai Bidi agai wiegi yai nai dabolo maiabo dao.
Suama, te Jerusalemde genuai bidi dabe
te sunumi dabede bidiyu, gela dabe obao.
Tama te bidi dabego te boi pibo sogo pedalomai ebadi,
augwali gela bomonama me oduali.
Te genuai sunumi dabe olo elalubao,
te we bidi te sunumidu ugwa eda me bilibo menio.
Te boi bidi dabego augwa dąų walali po bogi pelama,
tama augwaligo gasa hani
bidi dabego hanu dabe dolali.
Augwaligo gasa bidi dabe tonobo da,
te olo nai dabe tonobo tiwai ebao.
Te tǫ hobedai gela weyu,
tama aga bomo sia sali.
Tama te Lebanon genuai busi hale yali. Magi baso meni.
Agai ni dabe sasiyu, ela pobaso.
Te Sarongo odogo malu bulu wiegi yai te tǫ wa pelama,
tama wę meni yai kemi nai elalubo
bulu tiwai yaibao.
Tama me, te ni yabe dabe te Basan
distrikde holali, me te bulu du Karmelde holali dabe,
augwali bogwa pelama, telega peyu yali.

Te we bidi dabego Genuai Bidigo bomo sueibao

10 Genuai Bidigo e tama po wali,
“Megi da, ena hogodama, sę yaibao.
Tama te we bidigo ena sulama,
tama augwaligo eno genuai nogi
ugwaba somainao.
11 Te bidi hani dagego ena dali boi bidi elaluali bage,
dage da te olodali bomai sę
mu elama, masigi meni yai nai dabe
dagego sabo dao.
Te bidigo aga gide wit genina soba homu ebo tiwai dao.
Tiali goli, agai olo nosai dabe salio.
Tama duga bomai sęgo
te isi bogoli tiwai pedalama,
tama dage mu sia sąwaibao.
12 Tama dage te augwaligo kambang
isi ulai hogomu tiwai,
me augwaligo sesane bono isi ulama,
keli hogomu ebo tiwai yaibao.
13 Te dage pąde bidalubo we bidi,
me dage digibulu bulu bidalubo
we bidi, dagego eno bomai sę yali po odao,
me dagego eno genuai nogi po pusa maiąo,” wali.
14 Te Saionde te dwai kolesaga ebo
we bidi augwali wi elama, noma sali.
Tama augwaligo e tama po obao,
“Genuai Bidigo sębę da, te da te bomai
isi tigidali sogo dabo isi tiwai,
tama tigidali nai dabe dela silibo tiwai dao.
Te da tomode de mu te isi dali bidaibawe?”
15 Te doloba pai kolesaga eyu, me mu po naga weyu,
me gasa bidi dabego doado bage sabo homu isąyu,
dwai kolesaga isąbo bidi dabe,
augwali te Genuai Bidi dali bidibo usu yaibao.
Tama augwaligo te ili po wabo mone sisąma eyu,
me te dwai kolesaga ebo bidi dabe
dali dagana sisąma eyu,
me te gasa bidi dabe ela mubo
bidi dabe dali kisa selama ebo menio.
16 Augwali te tobage bidi dabe augwali
bugagia bidaibao.
Augwali te bidi me te bugagia wiegi yai
boma pai bulu dude geme dualalubo ąǫ yaibao.
Tama nai dabe mego augwali aiyaba me elalugobeo.
Tama tigidali sogo augwaligo tuabo
nai elaluyu, wę elaluyu yaibao.

Genuai Bidigo wiegi yai sogo mu Jerusalem dabebolo mawaibao

17 Dagego duga tuni bidigo aga
sawi yai tuni bidigo ugwa ma gudama, tama te bulu
ma tonalubo sueibao.
Tama dagego duga bulu genuai ma pedalobo sueibao.
18 Tama dagego te dwai sogo dagede
polobadu pedalali ma kone palama,
tama dagego e tama ma hanalu waibao,
“Te boi bidi dabe aselama,
te takis moni sali bidi dabe
augwaligo tobolu bidi megi menadewe?
Tama me te boi bidi dabe aselama,
te dago ami bidi dabego
te boi bidi dabe asobowe weyu tonaluainu, te sęani
bobobage bede tonaluyu yali,
te tobolu bidi menawe?
Augwali polobadu te dago hanu dabede elaluali bidi da.
Megi augwali ede menio.” Te po waibao.
19 Dagego te tobolu gagea pelama,
augwa digi augwa nogi ugwaba siyu yali
boi bidi dabe dagego gesabidi me sugobeo.
Tama dagego augwaligo dwai augwa
wabo po me odogobeo.
Te bidi mego te dagego konesiąwai po
augwaligo wali po bidi mego me odogobeo.

20 Dagego Jerusalemba toniąo.
Te da dago genuai hanu,
te da tigidali genuai lotu po wabo
sogo dabe sisinagasabo hanu dao.
Te da te da bugagia bidiyu, toma tuyu ebo bulu dao.
Aga te sel ugwa be te bidi dabego bono
togolama, ni dabe gudasa,
pisąma yabo sel be tiwai dolaluaibao.
21 Genuai Bidi te dago boma pai
polalubo bidi tede bidaibao.
Tama agai te Jerusalem te wiegi yai
sawi yai genuai wę me,
dwasianu wę me elalubo bulu nigilaibao.
Tiali goli, te dwasianu geba kanu me,
genuai hwįbo sip dabe me,
te wę dabedu me asogobeo.
22 Magi baso meni. Genuai Bidi
aga digi dago tuni bidi bidama,
tama po tų dabe dodolobo sę elama,
tama aga digi da bomai po dabe
menama, da tonaluaibao.
Tama agai da bugagia tonaluyu,
tama da dwai dene me sogobeo.
23 Ma, te boi bidi dabego te Jerusalem
sabo homu yali da, teda augwali usu me egobeo.
Augwali te sip boskru bage te sip
pomainu, te pobigisąma ebo
boskru dabe tiwai bidaibao.
Magi baso meni. Te sip tobolu
bugagia dolalusiąma eyu,
me te bono dabe bugagia bomalusiąma eyu,
me te sel dinigalusiąma eyu isąma ebaso.
Tama tibaso, boi bidi dabe wi peyu,
te nai dabe hauwa tagalama paibao.
Tama te Jerusalem dabe udala,
te nai dabe sigi paibao.
Tagala, te sągą dwai bidi dabe me,
augwali me te gasa bidi dabe nosali aselama,
augwaligo me te nai dabe hauwa mu saibao.
24 Tama te sogo te Jerusalemde bidibo
we bidi dabego e tama po munu
ma wagobeo, “Ena gasi ebo.”
Tama Genuai Bidigo te Jerusalemde
bidibo we bidigo dwai sę yali sęgę sela sąwaibao.
Copyright information for `MPS