Isaiah 38

King Hesekia gasi sobaso, te Genuai Bidigo aga tau sali

(2 King 20:1-11, me 2 Stori 32:24-26)

Te Asiria dabego te Juda dabeba dwai sę idu doludali sogo, king Hesekia te genuai gasi selama, te aga pąde isainogo yai. Tialima, profet Aisaia, te Amosgo ogwago, aga sugi pelama, agaba te tiwai po wali, “Genuai Bidigo te po wali, nago gasi te me siligobeo, nage te isaibao wali. Tama nago te naga bede bidibo bidi dabebolo po olama, te nago sę tigidali dodolao po wao,” te po wai. Hesekiago te po odobo si da, teda aga gesabidi te be habu daga badu begegi sulama, gedu haluasa po te tiwai wali, “Genuai Bidi, ena nage wali mu aselama, te nago sę yalio. Sesemane sogo eno te nago homu wali pai. Tama tialima, nago eno te yali sę dabe homu kone palama, tama nago ena isimainu me elamuo.” Aga te gedu haluasa po ola silama da, te aga gela umabo mu walio.

Tialima, Genuai Bidigo Aisaiabolo te tiwai po ma wai, “Nago Hesekiabolo te tiwai po wagi pao, ena Genuai Bidi, te aga bulai wai Devitgo God, eno agai gedu haluasa po wali odolama, te aga gela genuagia wabo sualio. Tama tialima, eno aga te kibu be nogo si olama, sągągo a naga bidimainu yaibao wai dao. Tama me, te eno aga te Asiria kingo aiyaba elalumainu elama, te taun Jerusalem somainogo me iligobeo. Mu menio. Ena digi te dage seselalubo bidi bidaibao. Tama ena Genuai Bidi eno nageba te dąį ilibo sę me deli menama, te nageba eno te yaibao po dąų wali sę te nageba ola mawaibao. Te dąį ilibo te tiwai yaibao. Nago suali, te togobili polobadu te king Ahasgo nigali, te togobili dagego te be posali ulade te aua nedebo togobili elalubao. Te eno giliga noma bidi te togobilide te asesa polo nogo si dąįba begasa somainu ilaibao,” wali.

Tama tibaso, te giliga nomago te polo asesa begasa ma pomainu ilama, te dąį nogo siba usu nigi pali.

Tialima, te Hesekia usu ma igulali sogo, agai te po asęani,

10 “Eno homugo tama tiali, hobede ya,
te megi tebogo ena gesi bidi tigi elalubadi,
te ena isiyu, te tǫ taga paibao homu yai.
Tama ena te isali bidigo bulu pesageba bidigi paibao.
11 Ena te bidibo ula elalubo we bidi dali ma bidigobe
da homu yali,
te eno Genuai Bidi ma sugobeo wali.
Ena te bidibo ula me elalusiąbo bulu pesageba bidigi
paibao homu yai,
tama eno te bidibo ula elalubo we bidi ma sugobe homu
yai dao.
12 Ena te isai bidi tiwai yalio.
Eno bidibo ula te sel ugwa be bidigo aluama,
dolasa pali tiwai yalio.
Te eno bidibo ula te bidigo tigi ugwa dinigilibo sę tiwai
yalio.
Eno homugo te bobobage igi paibao homu yali,
tiali goli polo tama augwaligo togolama,
te masinde ugwa hobolainu ebo tiwai yali.
God, polo tama nago eno bidibo ula silimainu yalio.
13 Eno kone palali, nago eno nogo sągą dili te hasa
laion dili tologobo sę ebo tiwai iduama,
te kigamuba usu nigi pabo tiwai yali.
Te polo tama nago eno bidibo ula silainu yai dao.
14 Ena dene genuai eyu, te ena gela weyu, i wali,
eno gela wali te ba higo po wabo tiwai yai.
Te eno dagaluba ugwa tonaludu, sesabia pai elaluai,
te nago ena tau somainu yali,
te ena gedu dene elama,
te gedu ąį pągąna pai dao.”
15 “Te eno magi po wagowe?
Genuai Bidigo te ena tau sabo po dąų wali,
te megi aga digi te sę dabe mu pedalubao wali.
Tama tibaso, enaba te pedelali genuai sęgę te
homu kone palaibao,
te ena digi ena aiyaba elaluama, te dua digi bidiyu,
te ena isibo sogoba usu naibao wali.
16 Genuai Bidi, te tobage sę pedalubo
te we bidi dabego kolesaga hasegelama,
te gesi bidibo ula somainu yali.
Te enaba pedelali sę te gesi bidibo ula mawainu yai.
Nago eno gasi sia somainu elama,
te ena wiegi yai ma pedalumainu ilali dao.
17 Megi da, eno konebao, te sęgę dabe pedelali,
te ena tau sainogo naga yai.
Nago ena godolo mu elama,
te nago ena te isali bidi dabego
pesageba pomainu me ilibeo.
Te nago eno yali dwai sę sęgę dabede
homu kone me isąyu, tagalai dao.”
18 “Te isali bidi dabego pesagede bidibo hani dabe,
augwaligo te nago nogi ugwaba me sogobeo.
Te nago naga we bidi dabe tau sabo wiegi yai sę ebo
te augwaligo me sugobeo.
19 Te bidibo ula elalubo bidi dabe,
augwaligo naga nago nogi ugwaba siyu,
te megi eno ebo tiwai yaibao.
Te aya dabego te augwa wai dabeba
te nago wiegi yai sę sesemane sogo ebo po waibao.”

20 “Genuai Bidigo ena usu ma ilali.
Te tigidali side da te Genuai Bidigo tempel beba pelama,
te balia po weyu, musik weyu,
te agai nogi ugwaba saibao.
Dago te tiwai sę te da bidibo ula
elalubo sogo tiwaibao,” te po wai.
21 Tama Hesekia te gasi me elaludubadi, Aisaiago te tiwai po wai dao, “Te kingo sę ebo bidi dabego te ni kaya fik du dabe te augwaligo olali te selama, te seselama, te Hesekiago bomai keniba magasao, te usu elama, ma pedelaibao,” wali. 22 Tama me, te sogo me Hesekiago Aisaiabolo te tiwai po hanalu wai dao, “Genuai Bidigo te magi dąį ilibo sę enabolo ola mayu, te ena agai beba lotu ma wagasomainu egowe?” wali.

Copyright information for `MPS