a[Dan 1:1-7; 2 Kin 24:10-16; 2 Sto 36:10]

Isaiah 39

Te Babilon king Merodakgo te bidi meba Jerusalemba tagala palali

(2 King 20:12-19)

Merodak Baladan, te Baladango ogwa, aga te Babilon king dao. Agai te tiwai po odali, Hesekia te genuai gasi elalubao po odali. Tiali goli, aga usu ma yali. Tama agai te pas asęnama, te agai agaba tolabo, te wiegi yai homu ilabo nai me deli dodolama muani, te bidi mebabolo menama, te augwaligo sela pelama, Hesekiabolo magi pomainu yai. Hesekiago te bidi dabego po odolama, tialima megi da, agai te bidi dabeba te mone dabe, me te aga gasa nai dabe augwaliba ola mawai. Te agai mone mubo bede te tigidali silva me gol suali, te wiegi yai denami ebo pauda me sanda dabe, me te hwįbo nai tigidali, te gasa nai tigidali te aga bakstuade munolubo me, te ola mena silalio. Hesekiago te nai deli me dualubeo. Menio. Agai augwaliba te kingo moni be tomode elalubo nai tigidali ola mawai, me te aga tonalubo bulu tǫ kantri pedai tigidali ola mena silai dao. Te Babilon bulu bidi dabe ma pela silai madi te sogo, teda te profet Aisaia aselama, te king Hesekia suagasali, te agaba te tiwai po hanalu wali, “Te aselawali bidi dabe, augwali te mena bulu bidi dawe? Te augwaligo mena po nageba waliwe?” Tama Hesekiago agaba te tiwai po wei ponani, “Augwaligo ena suagasu asali, augwali te digibulu buludu mu asalio, te bulu tǫ kantri buludu mu asalio, te bulu tǫ kantri Babilon dao.” Tama Aisaiago te po wai, “Augwaligo te mena mena nai mu te nago genuai wiegi yai be tomode sualiwe?” Tama Hesekiago agaba po wei ponoyu, te tiwai po wali, “Eno te tigidali nai doado bage mu augwaliba ola mawai, te eno magi nai deli augwalide geme me dualubeo,” wali.

Tialima, Aisaiago Hesekiabolo te tiwai po wali, “Megi da, te eno nagebolo te Tigidali Bomo Elalubo Genuai Bidigo po obao. Genuai Bidigo te po wali, te nosali sogo me sogo deli pedalubo si da, te Babilon dabe aselama, te kingo bede munalubo nai doado bage, te naga bulai wąį dabego te bakstuaba sisinama muani nai saibao. Te nai me deli te augwaligo me sula tagalogobeo. Mu menio. Augwaligo te tigidali nai doado bage Babilonba selasa paibao. Te nago hanide digi te augwaligo te ogwa meba selama, augwali te Babilonba odasa paibao. Tama augwaligo sogoli te augwaligo dinama, tama augwali te kingo bede olo mu sę ebo bidi pedelama bidaibao,” Aisaiago te po wai. a  Hesekiago te po odolama, tama agai Aisaiabolo te tiwai po wali, “Te Genuai Bidigo po nago enaba pusubao, te wiegi yai po dao.” Hesekiago te po wali, magi baso meni, te aga homu kolesaga tomode, agai te tama homu elaluali, ‘Megi sogo ena te king bidibadi, te dwai sę dabe me pedalugobeo,’ homu yalio. ‘Te da bugagia bididubadi, te me hwįgobeo,’ wai dao.

Copyright information for `MPS