a[Mt 3:3; Mk 1:3; Jo 1:23]
b[Lu 3:4-6]
c[Je 1:10-11; 1 Pi 1:24-25]
e[Ais 62:11; Ped 22:12]
f[Jo 10:11]
g[Ro 11:34;
h1 Ko 2:16]
j[Tpi 17:29]

Isaiah 40

Godigo aga we bidi dabe augwali ma dobola sabo homu yali

(Dąį 40-55)

Te Godigo we bidiba wiegi yai sogo pedelaibao wali po

Duga Godigo te po odubao, “Eno we bidigo
haliga dąų walama,
te augwa haliga dua nagame ilibo po pusao.
Te wiegi yai po te Jerusalem we bidi dabeba mao,”
wali.
“Augwaliba te tiwai po wao, te augwali kalabus bidali
sogo te silalio.
Ena Genuai Bidi, eno te augwaliba te augwa yali dwai
sęde wei ponoma, te dwai dene mawai dao.
Awe, eno augwaligo yali dwai sę dolo usu nama,
tama te tiwai si naga te dene mawai dao.
Tama tialima, megi da, eno augwaligo
dwai sęgę tigidali sela sąwai dao.”
Odao. Bidi me deligo te tiwai i wali,
“Te Genuai Bidigo sunumi te wa pai bulu tǫ pesagede
dodolao,” wali.
“Te bulude dena Godigo genuai sunumi pebeli diliba
ilao. a 
Te tǫ odogo igulali pesage tigidali pągąniyu,
te bulu du tigidali pebela aiyaba tulao.
Te dolo si elalusiąwani pesage te dolo si elama,
te du du yali pesage te malu tǫ naga pedelaibao.
Tama genuai ula me te Genuai Bidigo bomo te pebeli
diliba hanilama pedelaibao,
tama tǫde we bidi tigidaligo sueibao.
Te po te Genuai Bidigo pedauwalidu digi asai dao,” wali.
b 
Bidi me deligo te tiwai i wali, “Po pusao.”
Te eno po me wali,
“Mena po eno pusagawe?”
Te agai te tiwai po wei ponani, “E po pusao.
Tigidali we bidi te tǫde sesabi elama,
bobobage sogo mu me bidigobeo.
Augwali te nosai me plaua te polo tama wa pelama,
te sia sabo tiwai ebo dao.
Te Genuai Bidigo posolai wali augwaliba tagala
palobo si,
te nosai wa peyu, te plaua telegasa dulubao.
Mu tama, te we bidi dabe te nosai tiwai polo
sia sabo dao.
Te nosai wa pelama, te plaua dabe boga selama,
tulalueibao.
Tiali goli, te dena Godigo po da, te sesemane elalua pidu,
elalua paibao. Te po pusao,” wali.
c 
Jerusalem, nage te genuai bulu duba holama,
te bulude po pusao.
Saion, nago bomonama, i hai weyu, te bulude po pusao.
Nago po hanilama pusao, nage wi me igio.
Nago te tiwai po te Juda dabego taunba walao,
“Suao, te duga God asobao,” po wao.
10 Suao. Tigidali nai tonalubo Genuai Bidi aga bomo
dali asobao.
Agai te boi bidi dabe aiyaba elaluama,
te aga we bidi dabe ma dobola sali,
te aga boi hwįnama, te wiegi yai nai sabo tiwai
yalio.
40:10Te po begelebo gasa sunumi me da e tiwai elalubao, “Agai te boi bidi dabe aiyaba elaluai baso, te aga wiegi yai doado bage dali sela asiyu, te aga we bidi dabe augwaliba mawainu yai dao.”
,
e 
11 Agai te aga we bidi dabe bugagia tonalubao,
te sipsip tonalubo bidi dabego te aga sipsip bugagia
tonalubo tiwai ebao.
Te tonalubo bidigo te sipsip wai dabe te hagawiade
pageasa bilaibao.
Te aga dua digi pidu, te dwasianu wai dabe elalubo
sipsipba te sunumi ola mayu, ela pidubo dao.
f 

Te Israel hanigo God te tedali polalubo mu dao

12 Te me deli bidibo bidi agai nogode te tamu ąį
tigidali sabua sabo bidi bidiba, agawe?
Te dagalu daide ugwadu usu siyu ebo bidi me deli
elaluba, agawe?
Te tǫ tigidali kabude bubo bidi me deli elaluba, agawe?
Te bulu du dabe te skelba munama,
skel ebo bidi me deli bidibawe?
13 Dego te Genuai Bidiba te nai dabe nigibo kolesaga
ola mawaibawe?
Te agaba homu kolesaga ola maiabo usu elalubo
homu ebo bidi me deli bidiba, agawe? g 
h 
14 Tama dego agabolo te wiegi yai doloba pai kolesaga
ola mawai dawe?
Tama dego agaba te wiegi yai konea pabo homu
kolesaga tigidali ola mawai dawe?
Bidi deli me mu menio.
15 Genuai Bidigo te haniani kantri tǫde we bidi suali,
te olo nai gagawai tiwai ebao.
Augwali te tǫ hogomu tiwai elama,
te dwasianu ąį tedebo tudulalubo tiwai ąǫ ebao.
Tama agai te tigidali bulu tǫ ailango sęgę usu selama,
te tǫ hogomugo sęgę tiwai elalubo dao.
16 Te we bidi dabego te tigidali kibu hasa elali,
me te Lebanon genuai ni silide te tigidali ni
togolama,
te augwaligo genuai sia nogolama,
te kibu hasa tigidali te ofa tiwai eyu,
te siago tigidali domainu igi da, te tagalao,
augwaligo te ofa te God gedude olo nai tiwai igi dao.
17 Te tigidali tǫ pedai kantride bidibo we bidi augwali
te Genuai Bidi gedude olo bage tiwai elalubao.
Augwali te olo nai mu tiwai dao.
18 Tama tialima, God te de mu tiwai dawe?
Te elalubo nai me deli te God tonobo tiwai ebo da,
agawe?
19 Aga te bidigo nogogo nigai tibo god piksa noma
elalua pabo tiwai da homu ebawe?
Te tibo god piksa noma dabe da,
te sę ebo koneai bidi dabego
te piksa kapago nigilama, te golgo mesegelaibao.
Te augwaligo silva selama, te sen dabe nigilama,
te piksa nomaba daganainu ebo dao.
40:19Te koneai bidi mebago homugo te sen dabe olo au ilai nai tiwai naga da homu yali. Te meba koneai bidi dabego homugo te sen dabego te piksa tolalu, te augwali tulaluidali weyu dąų wabo nai da wali.
,
j 
20 Ma, te doado bage meni yai bidi dabego te tibo god
piksa nigainu te damua pisąbo bomai ni selama,
nigaibao.
Tama augwaligo te ni dulubo mu koneai bidibolo
olama,
te augwa tibo god piksa nigao po waibao.
Te bidigo te piksa bugagia dulaibao,
tiyu te piksa tulaluidali weyu tiaibao.
21 Te dagego konebe, agawe?
Te dagego odobe da, agawe?
Te polobadu mu te bidi dabego dagebolo
te tigidali nai mena tama pedelali
te po wasiąwai meni da, agawe?
22 Te Genuai Bidi aga naga te dagalu daide te sia
kingde dugulaluali, agai te tigidali nai nigai dao.
Agai te dagalu te name ugwa tiwai dinigina palama,
te aga sel ugwa be sęalubo tiwai elaluai.
Te agai gedude, te tǫde we bidi te olo nai kuli mano
tiwai dao.
23 Agai te king dabe te olo bidi tiwai pedalumainu
ebo dao.
Tama agai te bomai bidi dabe aiyaba elaluama,
te augwa nogi me elalubo menio.
24 Augwali te plaua dabe te bidigo tamadi tama bulama,
te augwa sele aiyaba dulusiąwai tiwai elalubao.
Te Genuai Bidigo bomai posolai wali tagala palobo sogo,
augwali te deli sogo polo tama sasia pelama,
te baguasa pabo waligo augwali te hogomu sela
pabo tiwai ebo dao.
25 “Ena Genuai Bidi,
ena te Wiegi Yai Doloba Pai Kolesaga Tigidali Ebo
God dao,
tama ena tiwai de dawe?
Te eno kolesaga ebo tobage kolesaga ebo bidi tiwai me
deli elalu, bidibawe?”
26 Dagego te dagaluba ugwa tonama,
te ugwade elalubo hǫ dabe suiąo.
Dego augwali nigai dawe?
Te Genuai Bidigo naga nigali.
Te nai dabe te Genuai Bidigo ami hani tiwai elalubao.
Agai augwaligo namba koneani,
te agai augwali deli deli nogi koneama,
tama agai augwali nogi nogi yaibao.
Agai tigidali bomo mu elalubo, tama tibaso,
te nai dabe te augwalide me deli me hagagobeo.
27 Dage Israel, dage te Jekopgo hani dabe,
magi baso dagego po hauwa dogia pobawe,
“Dago Genuai Bidigo te dago sęgę subeo,” po wai.
“Te dwai sę ebo sogogo da gegali,
tiali goli agai da tau sabo homu ebeo,” po wabo
dao.
28 Te dagego konebe da, agawe?
Te dagego odobe da homu eba, agawe?
Genuai Bidi te sesemane bidada pabo God dao,
tama agai te e tǫ tigidali badu sese nigai bidi dao.
Te mena bidi mego agai homu kolesaga tigidali me
konea siligobeo.
Agai bomo kimi te meniama, te me sia sogobeo.
29 Genuai Bidigo te bomo meni yai bidi dabe dąų
walobaso,
te dili bomo kimi silai digi,
te agai augwali bomo selama, bidimainu ebo dao.
30 Te gesi ogwa bidi dabego te bomai bomo elaluali,
te kimi meniama sia sabo dao.
31 Tiali goli, te Genuai Bidiba konealubo homu dąų
olama,
te agai augwali tau sabo tonalubo we bidi dabe,
augwali te bomo sesemane elalu bidaibao.
Tama augwali bomonama eyu,
te ba kemodage bola pabo tiwai yaibao.
Te augwali udalama, te augwali homu hę me egobeo,
te augwali bilidu, te bomo kimi me isigobeo.
Copyright information for `MPS