a[Mt 3:17; 17:5; Mk 1:11;
bLu 3:22; 9:35]
c[Mt 12:18-21 ]
d[Tpi 17:24-25]
e[Ais 49:6; Lu 2:32; Tpi 13:47; 26:23]

Isaiah 42

Genuai Bidigo sę bidi e dao

Genuai Bidigo e tiwai po wai, “Suao, eno sę
bidi e dao.
Sesemane sogo eno aga dąų walobao.
Ena eno aga sa munama, dąį ilali,
tama sesemane sogo eno agade wiegi yai homu
pemene geninama, idubao. a 
b 
Eno ena mobo noma bidi agaba muani,
tama agai te doloba pai kolesaga naga igidali te tǫde
we bidi haniba selasa asaibao wali.
Te agai po wabo sogo, te genuai po dagą i hai olama,
po me wagobeo.
Tama aga te sunumi dabede doligi pelama,
te agai po bomonama me pusugobe.
Tama te agai te bomo meni yai,
te togwa painu ebo awi dili,
te agai tigidali me togwa sągobeo.
Tama agai te ula bugagia isiąbo lam sula somainu me
iligobeo. Menio.
Agai te bomo meni yai we bidi tau sabo kolesaga yaibao.
Agai te doloba pai kolesaga pedalumainu bomo ilaibao,
agai te sę ebo me tagalogobeo.
Te aga haliga sęgę me isiąyu,
te sęgęgo aga aiyaba elalumainu me iligobeo.
Agai sę bomo elama eyu, agai doloba pai kolesaga ebogo
te dwai kolesaga ebo kolesaga aiyaba elaluaibao,
te tigidali tǫ habu usu nama bomo elalumainu
ilaibao.
Te digibulu bulu we bidi dabe te aga tonaluaibao,
te agai augwali bugagia dugulalu bidabo kolesaga
ola momainu yaibao.” c 
God Genuai Bidigo te dagalu me tǫ nigilama,
te augwa pesageba munama, elalubao.
Tama agai te tǫde haniani nai ni me nosai pedalumainu
ilali.
Tama agai te bidibo ula te tǫde we bidi dabeba mobo
ponama, mawai.
Te Godigo aga sę bidiba te tiwai po wali, d 
“Ena Genuai Bidigo digi,
eno nage i olama, te eno doloba pai kolesaga
ola momainu yai.
Te nage eno ugwaba pogalu bugagia tonalueibao.
Te nagede naga, te eno te Israel hani we bidi dali
bomai po dąų walaibao.
Tama nage eno te Israel hani isąwai hani dabego ula
tiwai ilama, bidaibao. e 
Te nago te gedu hwidai bage dabe te ma tonomainu
ilaibao.
Nago te kalabuside bidibo bidi dabe,
me te be hulide bidibo bage me,
te magi naigo me tonalusiąma,
te olo mu bidimainu ilaibao,” te po wali.
“Ena naga ena Genuai Bidi.
Genuai Bidi, te eno nogi dao,
tama dagego genuai nogi ena deliba naga maiąo.
Dagego te tibo god dabego nogi ugwaba me sigio,
te bidi dabe augwa digi nigai dao.
Dagego suiąo.
Te polobadu eno po weyu,
te pedelaibao wali nai dabe, megi augwali pedelalio.
Te megi eno dagebolo te gasa nosali badu pedelabo nai
po walobao,
te augwali pedalisiąbadi,
te dagego konealumainogo te tiwai po obao,” wali.

Tigidali we bidigo te Genuai Bidigo nogi ugwaba sinao

10 Dage tǫde we bidi tigidali,
dagego gesi balia po weyu,
te Genuai Bidi nogi ugwaba sinao.
Dage te sipidu bilibo bidi dabe,
me te tamu ąįde bidibo hasa dabe,
dagego agai nogi ugwaba siyąo.
Dage te digibulu tǫ kantride bidibo we bidi dabe,
dagego te gesi balia po waiyąo.
11 Dage te bulu taun wa pai pesagede
bidalubo we bidi dabe,
me dage te Kedar hani we bidi dabe,
dagego te i bomo elama weyu,
te aga nogi ugwaba siyąo.
Dage te taun Sela we bidi dabe,
dage te bulu du dabe bageba holama,
te wiegi yai homu pemene dali i waiyąo.
12 Tama dage te pąde bidibo we bidi dabe,
me digibulu bidibo we bidi dabe,
dage tigidaligo te Genuai Bidi nogi ugwaba selama,
te agaba genuai nogi maiąo.
13 Genuai Bidi te bomai ami bidi tiwai elalu,
te megi agai hwįgi painu paibao.
Agai te po dagą genuai olama, i weyu,
te ami dabego ebo kolesaga tiwai te aga haliga sębę
hodolama,
te hwįabo sisi elalubo tiwai yaibao.
Te agai aga boi bidi dabe dali hwįnama,
te augwali aiyaba mu elaluaibao.
14 Genuai Bidigo te tama po wai,
“Te bobobage sogode eno pedauwali
pania selama, te ena dua digi bidali.
Eno ena haliga sębę te palia selama, te eno magi deli
me ebeo.
Tiali goli, megi eno te gela bomonama weyu,
te wego wai ame nainu dene ebo sogo gela wabo
tiwai obao.
Ena te homu hę weyu, te homu hę wabo bomo elama,
kekebo dao.
15 Te eno bulu du dabe dolama,
te nosai dabe me ni dabe sasia pomainu ilaibao.
Tama eno te genuai soabo wę dabe dali,
te sigi ąį me, sula somainu ilaibao.
16 Te eno ena we bidi dabe te polobadu
augwali bilisąwai sunumidu odasa asaibao.
Megi augwali gedu halua sai hulide bidibao,
tialima te be hulia sai elalubo te eno sela sąnama,
te augwaliba ula mawaibao.
Tama eno te dwai pesage elaluali te dodolama,
te dolo yai pesage ilama,
te augwali bilabo madi tiaibao.
Eno te sę dabe te mu pedalumainu yaibao,
te eno te sę yaibao wali po tiwai gilama yaibao.
Te eno magi nai me delide homu kone ebo me kegeda
palogobeo.
17 Tialima, te tibo god piksa dabeba lotu weyu,
te nai augwa god dao tiwai po wabo we bidi dabe,
eno augwali sela sąwaibao.
Tama augwali hale dwai mu yaibao,” wali.

Te Israel dabe te olo degai, me gedu widai tiwai bidali

18 Genuai Bidigo te po wai,
“Dage Israel te olo degelama, te gedu mu widalio.
Dagego olo dala pelama, po odoyu,
te gedu peda pelama, tonao.
19 Dage eno sę bidi tiwai bidimainu elama,
tama eno dage sa muyu, dąį ilama, te dagego eno po
sela pomainu yali.
Tiali goli, dage te olo degelama, te gedu mu widali,
tama te olo degeyu, gedu widiyu yai bidi dabe,
te augwali aiyaba mu elalualio.
20 Dagego te nai hauwa sulama, te po hauwa odali,
tiali goli, dagego te nai dabe bugagia tonosiąyu,
te poba olo bugagia me mubeo,” wali.
21 Genuai Bidigo te doloba pai kolesaga naga eyu,
tama agai te we bidi dabe ma dobola sabo kolesaga
ebode dwagi yai homu ebao.
Tama tibaso, aga bomo yai po dageba mobao,
te gasa bage dabego sulama,
te tiwai konemainu ebao,
te bomo yai po te wiegi yai mu, te mu polalubo dao.
22 Tiali goli, megi dage Israel dwai mu bidibao.
Te boi bidi dabego dage dolagaselama,
te dagego doado bage wi sela palio.
Te augwaligo dage me sela pelama,
tama dage te be dabede,
me tǫ dedage dabede kalabus elama, elaluali.
Te dage augwaligo nogode ma dobola sabo bidi deli me
meni yai elalubao.
23 Tialima, dage tomode dego te poba olo muaibawe?
Megi gagalasa, te dagego eno po bugagia odaibawe?
24 Dego mu te sę yao po obaso,
te boi bidi dabe aselama,
te da Israel dabego nai dolama, wi sagasaliwe?
Dego mu te da Jekopgo hani bage
te augwaligo nogoba muaniwe?
Te Genuai Bidigo naga dao.
Magi baso meni, dago aga tudiba munama,
te dwai sęgę sabo sę yai.
Dago te agai wei homu ebo kolesagade dolo bilisąma,
tama dago agai bomo yai po sela sąwai.
25 Tama tibaso, agai te boi bidi dabego
daba hwįagasomainu tagalama,
te dago agai haliga sębę ebo page konemainu yali.
Agai haliga sębę te sia dabo tiwai elama,
te Israel mu ulali.
Tiali goli, dago tede kolesaga selama,
te dago kolesaga me hasegelebeo.
Copyright information for `MPS