Isaiah 46

Genuai Bidigo bomo naga elalubao, te tibo god dabe olo piksa dao

Genuai Bidigo te tiwai po wai,
“Dage Babilon dabego te Bel me Nebo si
nogi ugwaba sobao,
te si duga tibo god si elalubao,
te augwali si dagego tolasa,
te genuai lotu wabo side sabilibao.
Tiali goli, te augwali sigo genuai nogi te sia saibao,
te dagego te tiwai sueibao,
te augwa digi tau sabo bomo meni yaibao.
Te boi bidi dabego te Babilon taun dolagasobaso,
te dagego augwali si te donki dabede kęnaibao.
Te donki dabego te hobedagia,
te augwali si te kalabus dage dali
sela pabo sę dene yaibao,” te po wai.
“Tialima, dage dwasianu Israel te bidibo hani,
dage te Jekopgo hani, dage hani eno selama,
te bugagia negeyu tonaluali,
te dage gesi hani we bidi pedelali sogo gagalasa,
tama tiali, dagego odao.
Ena duga God dao, te eno dage tonalua pidubadi,
te dage monu dabe eboba usu nama,
te ayadeba nisi elaluaibao.
Ena digi eno dage deli hani we bidi pedalumainu ilali,
te sesemane sogo eno dage auąlu, te tonalu,
te dage ma dobola saibao.”
“De mu ena tiwai dawe?
Te dagego eno kolesaga te de dali mu dagalaibawe?
Te eno kolesaga tiwai gagawai ebo bidi deli bidiba,
agawe?
Tiali goli, bidi mebago te gol me
silva hauwa pesage holama,
te augwa tibo god piksa nigainu dagalaibao.
Tialima, te nai dabego te augwa tibo god nigali.
Tialima, augwa te tibo god augwa nageba munama,
te tolasa pelama, te augwa muabo
nigilali pesageba mugi pabo dao.
Augwa teba kidu sugunama, lotu wabo dao.
Te tibo god te mugi pali pesage delide naga munaluali,
magi baso meni, aga digi te gasaba bilabo usu
isąwai.
Te agai te bidi dabego aga gedu haluasa po weyu,
i wabo wei ponabo usu meni yai,
agai augwali te dwai sogode
tau sabo me usu egobeo. Mu menio.”
“Dage hagoma eyu, po sela sąbo bidi dabe,
dagego eno te pusubo po bugagia homu kone palao.
Tama tiyu, te dage bomo elama, dolalueibao.
Tama dagego eno te polobadu mu
yali sę homu kone palao,
magi baso meni, enaduba deli naga ena te God,
te gasa god me bidibeo.
Ena naga ena God, te ena tiwai god me bidibeo.
10 Te magi deli me pedalisiąbadi,
eno te tama sę pedelaibao po weyu,
te mena tama siligi pabo po waibao.
Polobadu digi eno te sę pedelabo po olama,
tama nosali te nai dabe te eno po wali gilama pedelaibao.
Te eno mena sę me deli yainogo da,
teda te sę eno eyu naga yaibao.
Te magi nai me deligo eno te sę yabo sunumi
me paligobeo.
11 Eno te giliga pedalubo badu bidi me deli
asao olama, i wali,
46:11Te “giliga pedalubo badu bidi wali,” te king Sairus dao. Te po te Dąį 41:2-3, tede elalubo suao.

agai te ba kemodage bola asobo tiwai yaibao,
te agai eno yabo homu yali sę yaibao.
Eno te sę yao po walio,
te eno po wali tiwai gilama te tama pedelaibao.
Te eno yaibao olama, dąį ilali sę, eno te sę ebo dao.”
12 “Dage hagoma bidi dabe, eno po odao.
Dagego homugo te eno dage sa munama,
ma saibao wali sogo,
te digibulu elaluba homu eba, agawe?
13 Menio. Te pąba pedelalio.
Te eno munu ma tonalugobeo.
Te eno dage Israel dabeba boi bidi ebo
bidi dabeba dene mu menama,
te dage bugagia ma bidaibao.
Te Jerusalem taun me wiegi yai bugagia ma ilaibao,
te eno ena genuai nogi me bomo te dage Israel dabe
tomode hania pepeli diliba pedalumainu yaibao,”
wai dao.
Copyright information for `MPS