a[Ped 21:2, 27]
b[Ro 2:24]
c[Nah 1:15; Ro 10:15; Ef 6:15]
d[2 Ko 6:17]
e[Ro 15:21]

Isaiah 52

Genuai Bidigo aga we bidi te Jerusalemba ma odasa asaibao wali

Jerusalem, nage te God aga da olama, sa
muani hanu, nage hogodao.
Nage hogodama, bomonama dolugulao.
Nago au dobage te gasa sawi yai sawi yai munama,
te nage tonobo gasagi me mu yaibao.
Te Godigo po odisąbo bidi dabe,
me te God gedude wiegi yai isąbo hani bidi dabe,
te augwali nage tomoba me asogobeo. a 
Hobede ya, Jerusalem, tiali te nage hogodama,
te nago tigide tǫ sela sąyao.
Awe, Saion hanu, te nago dogonide kęnani sen peda
sąnama,
te naga sia kingba duagi soao.
Magi baso meni. Genuai Bidigo te tama po wai,
“Te bidigo ena me abelisąma,
te nago we bidi te olo sę bidi me
sę ebo we tiwai elama, sela pali.
Te eno augwali ma sainu, te mone menama, me sogobeo.
Menio.
Te augwali eno olo mu saibao.
Magi baso meni. Ena God, Genuai Bidi,
eno te tama po wali.
Polobadu, te eno we bidi dabe
te Isipba pelama, bidigi pali sogo,
te augwa homugo digi palio.
Te nosali, te Asiria dabe aselama,
te augwali olo sę ebo bidi me
sę ebo we tiwai sela pali,
augwaligo ena abelama, te augwali sela pabeo.
Te Babilon dabego me te tobage
deli kolesaga nosali yalio.
Augwaligo te eno we bidi olo mu selama,
te augwali kalabusiba sela pali,
te eno hanigo tobolu bidi dwai gela mu wali.
Te eno magi nai deli me sabeo. Menio.
Sesemane sogo te bidi dabego te posobo po weyu,
ena nogi aiyaba elalubo sę yai dao. b 
Te ena digi eno dąį ilama,
te ena we bidi ma saiba wabo sogo,
te augwaligo ena nogi bugagia koneaibao.
Augwaligo te tiwai koneyu, ena Genuai Bidi,
eno tama te augwaliba tigidali
pedalubo sę po polobadu wai dao.
Suao, ena bidibao,” wali.
Te we bidi augwaligo bidi me deli
te bulu du pesagedu udada asobo sulama,
te wiegi yai pemene mu yaibao, te wiegi yai po
Jerusalemba selasa asali.
Agai te tiwai po waibao,
“Saion, te wiegi yai sogo pedelalio.
Godigo te boi bidi dabe aiyaba elaluama,
te agai nage bugagia bidimainu ilalio.
Megi da, nago Godigo te tigidali nai
tonalubo dao,” agai te po waibao.
c 
Te tonalubo bidi dabe te masigigo
nigali bobobage be taua daide bidali,
te Genuai Bidi te Saion badu ma asobo sueinu yali,
te augwa tigidaligo te genuai pemene dali eyu,
te i bomonama mu waibao.
Dage te Jerusalem badu dolalio,
dagego te pemene elama, i waiąo,
magi baso meni, Genuai Bidigo te Jerusalem ma
selama,
te agai aga we bidi dabego sęgę silalio.
10 Genuai Bidigo agai bomo hania ola mayu,
te tigidali tǫ kantrigo sumainu yaibao.
Dago Godigo te aga we bidi dabe ma saibao,
tama te tigidali tǫde we bidigo sueibao.
11 Dage tigidaligo te Babilon tagalama, asiąo.
Te bugagia dua dao, tiyu dage te God gedude wiegi yai
isąwani naide pania sabuo.
Dage te hanigo te pou dis dabe, me pou dabe,
te Genuai Bidigo bede nai sela paibao,
dagego duga digi te God gedude wiegi yai pedalubo
kolesaga wali pao.
Dage tigidali te magi meda meni yai bidama, asiąo.
d 
12 Tiali goli, dage asesa polo me te Babilon tagalama,
me wi polo soyu,
te dagego polobadu te Isipde yali tiwai me egobeo.
Menio.
Te dage dua digi asaibao.
Te God, duga Israel dabego Genuai Bidi,
te dage pabodu polasa paibao,
te aga dage nosali badu me asaibao,
te agai dage tonalua asiyu, odasa asaibao.

Genuai Bidigo sę ebo bidigo te we bidi dabego dwai sę yali sęgę dali tolasa asaibao

13 Genuai Bidigo te tiwai po wali,
“Suao, bugagia konea sao.
Tigidali sę eno sę bidigo ebo
te bugagia mu pedelaibao.
Te bidi dabego agaba genuai nogi mayu,
te aga nogi ugwanu mu saibao.
14 Polobadu te bidi dabego dwai sę mu agaba yali,
te aga tigi me gesabidi te dwai mu tonani,
te aga bidi tigi tonobo tiwai me ebeo.
Te we bidigo aga subo, wi yai dao.
15 Tiali goli, nosali da, te bulu tǫ kantri hauwa we
bidi dabe te agade dwai noma midigi mu selama,
te king dabe pedauwali pania selama,
te bomonama tononalu,
te augwa po deli me wagobeo,
magi baso meni, te augwaligo polobadu
po odisąwani nai suali.
Te augwa dwasianu me konesiąwani nai
te hania koneaibao,” wali. e 
Copyright information for `MPS