a[Ga 4:27]
b[Gag 9:8-17]
c[Ped 21:18-21]
d[Jo 6:45]

Isaiah 54

Genuai Bidigo Jerusalem wiegi yai ma pedalumainu ilaibao

Genuai Bidigo te tiwai po wali,

“Jerusalem, nage te hobedagia wai ame
nesiąbo we tiwai eyu,
nage te wai ame nabode dene isiąbo we tiwai ebao.
Tiali, megi da, nago te balia po weyu,
pemene elama, i wao, magi baso meni,
te nago wai dabe hauwa mu umabo elalueibao,
te aga bidi dali bidibo wego wai
te aiyaba mu elalueibao. a 
Nago genuai tǫ pedai dąį elama,
te nago ugwa be tede sę yao.
Nago ugwa be ugwade eda si dedelasa pelama,
te bono bobobage tagalama,
te ni tǫba bomonama tulama,
te bono dabe bomonama kekelama, te nide kęao.
Magi baso meni, nago tǫ dąį te ugwa de eda si
pedegasa pelama, genuai igi pelama,
te dolo nogo badu tiyu,
te pobase nogo badu me tiao,” wali.
“Te nage hani wai dabego te gasa tǫ
kantri hani we bidi aiyaba elalueibao,
tama augwali te augwaligo megi olo elalubo hanu
dabede bidalueibao.”
“Jerusalem, nage wi me igio.
Te nage hale munu ma egobeo.
Te bidi dabego posobo po nageba munu ma wagobeo.
Te nage gesi ogwa bidi elalubadi hale sali,
te nago homu kone mu gegeda palama,
te sogo nagaduba te bidibo we tiwai homu ebo kone
me isiąyu,
te aga bidi isai we tiwai egobeo.
Magi baso meni.
Ena, nage nigali God, ena te nago bidi tiwai bidaibao.
Eno nogi da, te Tigidali Bomo Elalubo Genuai Bidi dao.
Ena, te Israelgo God, ena te Wiegi Yai Doloba Pai
Kolesaga Mu Ebo God da,
te ena nage tudi badu posolalu tau sabo bidi,
eno naga eno te tigidali tǫ habu tonalubo God dao.”
“Ena God, Genuai Bidi, eno te tiwai po wali,
te nage eno enaba ma asomainu i waibao.
Nage te bidigo sai gesi we tiwai
te aga bidigo tagalama, wi palio,
te aga hobolu du peda pelama,
te aga genuai homu dene dali bidalio.
Ena Genuai Bidi, te nage eno tudi badu posolalu,
tau sabo bidi,
eno nage pęwądage sogo tagalali,
te eno genuai homu dene nagede elalueibao.
Tama te nage enaba ma asomainu saibao.
Te eno nageba wado po dwai mu
te pęwądage sogo olama,
te eno ena gesabidi geme duala sali.
Tiali goli, sesemane sogo te eno nage dali homu dene
eyu, te nage godolo mu eyu,
te nageba wiegi yai sę bugagia yaibao.”
“Te Noa bidali sogo, eno te tiwai bomai po dąų weyu,
te eno genuai ąįgo te tǫ ma dologobeo wali.
Te megi eno te tobage bomai po dąų walaibao.
Eno mu po weyu, te eno haliga sębę ma isiąma,
te nageba wado iliyu,
te nage me dene mabo sę egobeo wai. b 
10 Te bulu du dabe pedasa pelama, degaibao,
tiali te eno nagede homu godolo ebo
te sesemane sogo elalueibao.
Te da si bugagia dugulalu,
te eno bugagia bidabo sogo maiabo
po weyu, te dąų walali bomo yai po
te eno me bologobeo.
Ena Genuai Bidi, te eno nagede homu dene mu eyu,
te nage godolo homu mu yai,
eno te sę dabe yaibao te po nageba wai dao,” wali.

Jerusalem te usu yai polalubo mu pedelaibao

11 Genuai Bidigo te tiwai po wai, “Hobede ya,
Jerusalem, nage te hauwa dolali taun,
te nage homu dene elama, tau sabo bidi meni yai.
Tiali goli, eno te wiegi wiegi yai masigi te gasagi yai
mu selama,
te nage ma nigaibao,
te nage gasa sawi yai taun mu pedelaibao.
Eno te gasagi yai tedali masigi dabe selama,
te tǫde wasilama, te ugwadu daide taun ma
nigaibao.
Te eno te haniani wiegi yai dila pai masigi selama,
nago be sę ebadi, te bomai obogo nage bagulama,
te obo sunumi dabe me,
te genuai masigigo nigai obo daide elaluabo taua,
te dabe nigaibao.” c 
13 “Te ena digi eno nago wai dabe ola mayu,
te augwa bidabo pesage bugagia mu elalueibao.
d 
14 Te eno doloba pai kolesagade
te eno nage bomai pedalumainu ilaibao.
Te nage aiyaba elaluama, te dwai sęgo dolabo bidi me
menio,
te nage magi nai me delide wi me egobeo.
Te nago wi ebo tigidali silaibao.
15 Te hani mebago nage dali hwįai olama, asobaso da,
te nago te tiwai koneao,
te augwali eno tagala palobaso me asobeo. Menio.
Te augwa homugo digi asali.
Tama augwali te eno nago nogoba mueibao,” wali.
16 “Suao, bugagia konea sao.
Ena digi eno te haniani nai te aingo
nigibo bidi dabe nigali.
Augwa te ain siaba munama,
te ain dabo posolo yai sia mu nogani.
Augwa te ain selama, te hamago elama,
te bidigo hwįabo haniani nai dabe nigibo dao.
Tama eno te ami bidi dabe me nigali,
tama augwa te nai dabe selama,
te boi hwįnama, te gasa bulu tǫ kantri dolobo sę
ebo dao.
17 Tiali goli, te hwįbo nai dabe me deligo nage me
dologobeo.
Te nage bomonama dolalu,
te bidi dabego nageba haniani po kisilama wabo po
te wei ponoyu,
aiyaba elalueibao.
Eno te kolesagade ena sę bidi dabe tigidali bugagia
tonalu,
te augwali doloba pai we bidi pedelaibao.
Ena Genuai Bidi, eno te po wai dao.”
Copyright information for `MPS