a[Ped 21:25-26]
b[Ped 3:9]
c[Ped 21-23; 22:5]

Isaiah 60

Godigo genuai ula me bomo te Jerusalemde elalueibao

Genuai Bidigo te po wali, “Jerusalem, nage
hogodama, te giliga nanobo ula tiwai yao,
magi baso meni, megi eno genuai ula me bomo,
Genuai Bidigo ula te nage daide ugwadu yaibao.
Suao. Te sisi yai pǫ, me te genuai be hulia sabogo,
te tǫde tigidali gasa hani we bidi mesegelaibao.
Tiali goli, ena Genuai Bidi, ena nageba aselama,
te eno genuai ula te bomonama,
nage daidu ula elalueibao.
Te Israel hani isąwai we bidi dabego
nago te ula sulama,
te augwali nageba asaibao.
Te king dabego me nago te bomai ula sulama,
te augwali hogodama asaibao,” wali.
“Nago tobolu ugwaba selama, tonono bilao.
Te naga wai dabe augwali deliba sisinama,
asobo sueibao.
Te nago ogwa dabe te digibulude bidai asaibao.
Te gasa bulu tǫ kantri bidi dabego te nago wegi dabe
augwa hagawiade munama, tolasa asaibao.
Nago te tebo sulama,
te nago gesabidi ula umagia mu yaibao.
Te nago hoboludu dali pua pelama,
genuai pemene yaibao.
Te genuai sipidu wiegi yai nai hauwa
nageba sesaibao.
Te nago mone hauwa mu te tigidali tǫ kantride saibao.
Te Israel hani isąwai Midian bage me Efa bage,
te augwaligo gesi kamel hauwa mugo
te walu dabe nageba sesaibao.
Augwali te tǫ kantri Seba teba pelama, te gol me,
te wiegi yai hano denami ebo pauda me,
te selasa asaibao.
Te we bidi dabego Genuai Bidi,
eno genuai nogi ugwaba saibao.
Te Kedar me Nebaiot dabego te tigidali wiegi yai
sipsip hani nageba sesaibao.
Tama ena we bidigo te sipsip dabe seselama,
te eno alta daiba ofa ebaso,
te ena wiegi yai pemene ebao wali.
Te eno be te polalubo be mu pedelama,
te genuai nogi elalueibao,” te po wai dao.
“Te magi tedela yai nai asesa mu asu,
te dagalu pǫ waligo te tamu ąį daidu
selasa asobo tiwai yali,
te ba hi dabe augwa beba ma
bola asobo tiwai ebawe?
Te magi nai dawe?
Te digibulu buludu asobo sip dabe dao.
Mu tama, te digibulu bulu we bidi dabego te eno
augwali tau sabo tonaluai.
Augwaligo te genuai sip dabe tagala palali,
te nago ogwa dabe nageba ma sesalio.
Te we bidi dabego te hauwa silva me gol
te sip dabego sela somainu tolali.
Augwa tama tiali, magi baso meni,
augwaligo te eno nageba wiegi yai sę bugagia eyu,
genuai nogi elalubo sulama yali,
te augwaligo Israelgo Genuai Bidi,
te ena Godiba genuai nogi mayu yali,
ena te Wiegi Yai Doloba Pai Kolesaga Mu Ebo
God dao,” te po wai.
10 “Jerusalem, te gasa bulu tǫ kantri bidi dabego nago
genuai obo te masigi dabego ma nigagasaibao.
Te augwa king dabego nago sę yaibao.
Hasia eno wado po dwai nageba wali,
te eno dene nageba mawai.
Tiali goli, megi eno bugai haliga eyu,
te nageba olo tau sabo wiegi yai kolesaga ebao.
11 Te nago genuai obo sunumi dabe
te giligade me hulide dalalueibao,
magi baso meni, te gasa bulu tǫ kantri we bidi
dabego te augwa mone sesemane sogo
nageba sesaibao.
Te augwaligo augwa king dabe me te nageba olo mu sę
ebo bidi tiwai emainu odasa asaibao. a 
12 Tiali goli, te nage dologoba aselama,
nago sę isąbo bulu tǫ kantri dabe,
te augwali dolama, mu silaibao,” wali.
13 “Te bidi Lebanon genuai busiba holama,
te bobage bobage sawi yai ni wuli, me saipres,
me te gasa wiegi yai ni dabe togolama,
te augwaligo nageba sesaibao.
Te ni dabe dali, te bidi dabego eno be ma sęnama,
te be gasa sawi wiegi yai mu pedelaibao.
Ena te ena duabo sia kingde dugulalu,
tama te be da eno sągą teba manama elalubo tiwai
elalueibao.
Tama te be eno polalubo be mu pedelama,
tama aga genuai nogi elalueibao.
14 Te polobadu nageba dwai sę eyu,
te nage godolo homu isąwani hani dabe,
te augwa tobolu basiasa nageba asaibao.
Te augwa kidu sugunugulama,
te nago sągą pąde augwa tobolu basigulama,
te nageba genuai nogi mawaibao.
Te augwa nage nogi te tiwai weyu,
‘Genuai Bidigo Taun da,’ te ‘Saion da,’
waibao, ‘te Israel Godigo Taun,
aga te Wiegi Yai Doloba Pai Kolesaga Ebo God mu
dao.’” b 
15 “Jerusalem, nage ololama, olo elalu,
te nago sunumi dabede bidi iba oba soyu me isąwai.
Nage te we tiwai bidiyu, te aga bidigo
aga godolo isąma, tagalobaso, aga wi pali.
Tiali goli, te eno nage te gasa
sawi wiegi yai pedalumainu ilama,
te nage polalu, polalubo mu pedalubaso,
te we bidi dabego nageba wiegi yai
homu pemene mu yaibao.
Tama nage te tiwai naga sesemane sogo
bidada pidu, bidada paibao.
16 Te nago wiegi wiegi yai nai te gasa kantride siyu,
te king dabego augwa wiegi yai
sawi yai nai nageba mawaibao.
Tama nago te tiwai koneama,
ena naga te Genuai Bidi da waibao.
Ena te ena we bidi ma sabo God dao,
ena te nage posolalu, tonalu, tau sabo God,
ena te Jekopgo hani dabego bomai God dao,” wali.
17 “Te eno nago bras hasegelama,
tama nago gol munolueibao.
Me nago ain hasegelama, tama nago silva munolueibao.
Te eno nago ni nami dabe me hasegelama,
tama nago bras elalueibao,
me nago masigi dabe hasegelama,
nago ain elalueibao.
Te eno wiegi yai bugagia haliga nagame homu elama,
dugulaluabo kolesaga nigilaibao,
te doloba pai kolesagago nage bilibo dodolaibao.
Te niwai bidi mego nage tonalu,
nageba dwai sę me egobeo.
18 Te nago tonalubo tigidali tǫ habu badu
te bidi dabe munu me ma hwįgobeo.
Awe, nago tǫde me te doado bage alubo
kilikili me egobeo.
Te nago genuai obo nogi te tiwai elalueibao,
‘Genuai Bidigo aga we bidi dabe ma salio,’ waibao.
Te nago genuai sunumide te tiwai nogi elalueibao,
‘Genuai Nogi Mao,’” wai.
19 “Te giligago nageba te bubugade ula mayu,
elalubo tiwai munu me elalusiąyu,
te poluago me nageba ula mayu, me egobeo. Menio.
Genuai Bidi ena digi ena te giliga tiwai,
me polua tiwai ula elalu,
te eno sesemane nageba ula maduaibao.
Te ena, nago God, ena te genuai ula elalu,
te nago au ilibo nai elalubo dao. c 
20 Nago te giliga me polua iba dega sigi pelama,
te be hulia siyu ebo me pedalugobeo,
magi baso meni, ena Genuai Bidi,
sesemane sogo ena te nago ula tiwai elalueibao.
Tama nago sęgę dali homu dene ebo
sogo me tigidali silaibao.
21 Te sogo te nago we bidi tigidaligo
doloba pai kolesaga naga eyu,
te eno augwa tǫ da olama,
sa muani tǫ te augwa saibao,
tama augwa tede sesemane bidada paibao.
Te ena nogogo digi eno augwali
te deli hani we bidi pedalumainu ilali, tama augwali
te eno bulai ni nologo tiwai pedelali.
Eno tama tiali, te gasa hani we bidi dabego sulama,
te enaba genuai nogi momainogo tiai dao.
22 Jerusalem, te nagede bidibo mena bidi aga nogi me
elalusiąbaso,
te tagalao, aga te genuai hani
wai dabego aya mu pedelaibao.
Te dwasianu mu yali hani dabe
te augwali umabo pedalu,
te augwali genuai bomai kantri
we bidi tiwai pedelaibao.
Ena Genuai Bidigo eno te po obao,
te sę dabe te eno bodolu muani sogo
polo asesa pedelaibao,” te po wai dao.
Copyright information for `MPS