a[Ro 10:20]
b[Ro 10:21]
c[Jos 7:24-26]
d[Ais 66:22; 2 Pi 3:13; Ped 21:1]
e[Ped 21:4]
f[Ais 11:6-9]

Isaiah 65

Godigo te hagoma ebo haniba dwai dene mayu, te aga sę bidi dabeba wiegi yai sę ilaibao wali

Genuai Bidigo te po wali, “Ena, Genuai Bidi,
te eno augwali tau somainu
gedu haluasa po wasiąbo we bidigo
gedu haluasa po wabo odainu,
te tonalu sisilalubao.
Te ena bidibo augwali enaba asobo tonalubao,
tiali te augwaligo ena gegabo homu isąwani.
Eno te po wali, ‘Sesemane sogo ena bidibo,
te dage tau sainu ebao,’
tiali goli augwali te enade digibulu bidiyu,
te eno nogi augwalide musiąwai hani
bidibo tiwai ebo dao. a 
Te tigidali side eno nogo dinigalubao,
tama eno te eno po sela sąbo we bidi
ma sainu tonalubao,
te dwai kolesaga ebo sunumidu
augwa homugo digi wali bilibo
we bidi te ma sainu tebo dao. b 
Te eno gedude augwa te eno haliga sębę elama,
wado po wabo tobage kolesaga ebao.
Augwa te Godigo po odisąbo bidi dabego ebo kolesaga
yai.
Augwa te lotu wabo pesage te gide elalubo te sisinama,
ofa eyu,
tama augwa te tibo god dabego altaba pelama,
te wiegi yai denami yabo hano ilibo pauda ulubo
dao.
Tama hulide augwa te gų pageba bidalugi pelama,
te isai bidi dabede po sainogo ebo dao.
Tama augwa te kibu mi tulama,
te gasa tobage hasa te eno gedude
wiegi yai isąbo sup nai ąį me tubo dao.
Te augwa gasa bageba te tiwai po weyu,
‘Dage dade digibulu bidao,
magi baso meni, dago tigide habu selali.
Tama tibaso, dage da dali me kisalugobeo,’
te po wabo dao.
Eno te hani dabego te tobage kolesaga ebo te eno
homude hagela yali.
Augwa te tama tebode te eno haliga sębę
dwai mu augwaliba ebao.
Augwalide eno te haliga sębę ebo te mu siligobeo,
te sia bogoli gamonama dabo tiwai ebo dao,” wali.
“Suao. Ena Genuai Bidi,
eno te dage dwai we bidi dabego ebo
dwai sę tigidali te eno bukude asęani.
Tede eno sagia sogobeo. Menio.
Te eno dageba dwai dene mayu,
te duga yali dwai sę tigidalide
dolo mu wei ponaibao.
Te eno duga yali sęgo sęgę dali,
te duga bulai wąį nǫų dabego yali
sęgę dali tolomainu yaibao.
Te duga bulai wąį nǫų dabe te lotu wabo
pesage te bulu du bageba holama,
tama augwa te wiegi yai hano denami ilibo ofa eyu,
tama augwa te haniani dwai kolesaga ena gedude yali.
Tama eno augwa yali dwai sę tigidali usu nama,
dolo mu te wei ponaibao,” wali.
Genuai Bidigo te po wai,
“Te bidi me deligo te bono du wain
te du pa elalubo nogogo sąwainu ebaso,
gasa bidigo te po wagi da,
‘Tonalu bolo yao,’ wai.
‘Eno te wiegi yai wain wai du meba
te pąde elalubo suali.
Dago selama, te tuabo wain ąį meba nigibaso,
usu yaibao,’ wai.
Te tiwai tama, ena Genuai Bidi,
eno te tigidali Israel we bidi me dologobeo,
magi baso meni, augwali eno sę bidi dabe dao.
Te eno Juda dabeba wiegi yai sę eyu,
te tigidali Israel haniba me tiaibao.
Eno augwali te genuai we bidi hani pedalumainu ilaibao,
te augwali eno bulu du pesagede
bidalumainu yaibao.
Te hani we bidi dabe eno augwali sa munama,
te eno sę bidi bidimainogo yai,
te tǫde augwali bidimainu yai dao.
10 Te augwa sipsip dabe, te bulmakau me,
te tǫde pągąnalueibao,
te Saron te giliga dega sigulubo
pedai te odogo pesagede gagalasa pali,
te Akor giliga pedalubo badu
te odogo tǫba usu nigi paibao.
Te augwa nosai hauwa elalu, te nai tuyu,
toma neyu, bidaibao.
Eno te sę dabe ebo te ena gegebo homu elalubo we bidi
dabeba tiaibao,” te po wali. c 

11 “Tiali goli, dage da, te dage ena tudiba muyu,
te eno bulu du, te Saionba asisąma,
te enaba lotu wagasisąbo hani dabe,
dage te dwai dene mu saibao.
Dagego te Gat me Meni, te siba nai me wain ąį mayu,
lotu wabo dao.
Te tibo god dabe te augwaligo dage
tau somainu ebo da homu elama,
te duga wiegi yai sogo elalueiba homu yalio.
12 Tiali goli, eno gasagi yai sogo dageba sa muai.
Te boi dabego dageba hwįagaselama,
te dage augwa bainat hwą dabego ela mueibao.
Te duga kidu sugunama, te tobolu tǫba basigulama,
te boi bidi dabego dage tobolu mage togwaibao.
Te sę dabe pedelaibao, magi baso meni,
eno dage i wali, te dagego eno i wabo wei ponobeo.
Te eno po me dageba pusali,
tiali dagego wali pabeo. Menio.
Dagego eno po sela sąyu, te eno gedude
dwai kolesaga naga yali,
te eno godolo homu isąwai
kolesaga dabe mu ebao wali.
13 Tama tibaso, ena God, Genuai Bidi,
eno te tama po obao.
Te eno sę bidi dabego te nai me ąį hauwa elalueibao.
Tiali, dage te ena tudiba mubo hani dabe,
te dage nai sili bidu, te tuabo ąį meni yaibao.
Te eno hani dabe, te augwa wiegi yai pemene yaibao,
tiali te dage dwai hale mu saibao.
14 Te eno sę bidi dabego haligade
te wiegi yai homu pemene pągąnalu,
te augwa homu pemene ebo tęąbi po waibao.
Te dagego haligade te homu dene ebo pągąnalu,
te dagego homu kolesaga kone tųą pelama,
te dage gela bomonama mu waibao.
15 Te eno hani dabe, te augwa gasa
bageba po dwai wabo sogo da,
teda augwa te tiwai po waibao,
‘God, Genuai Bidigo dage dolomainu yaibao,
te agai te dwai hani dabe dolali tiwai yao,’ waibao.
Tama te bidi dabego dage nogi
te dwai nai homu tiwai yaibao,
tiali goli eno te wiegi yai gesi nogi
te ena sę bidi dabeba mawaibao.
16 Tama te tigidali tǫ habu pedai badude,
te bidi dabego gedu haluasa po enaba weyu,
te mu po naga wabo God da po weyu,
te augwali wiegi yai bugagia ilao
po enaba hanalueibao.
Te bidi dabego augwa po dąų walabo homu elama,
augwa te eno nogi delide naga te mu po
dao waibao.
Tama augwa te polobadu elaluali haliga
sęgę me dwai sę yali dabe
te homu kone gegeda palaibao,
te ena, Genuai Bidi, te eno augwa
te polobadu yali dwai sę dabeba
homu kone mu gegeda palaibao,” wali.

Tigidali nai te gesi Jerusalem dali bugagia elalueibao

17 Genuai Bidigo te tiwai po wali,
“Suao, eno gesi dagalu me tǫ nigaibao.
Te bidi dabego te polobadu pedelali
naiba homu kone me palogobeo.
Augwaligo te nai mu gegeda paibao.
d 
18 Dagego te eno megi nigali gesi naiba bugai haliga
eyu,
wiegi yai pemene sesemane sogo yao. Magi baso
meni.
Te eno nigainogo ebo gesi Jerusalem
te we bidi dabego godolo elama,
wiegi yai pemene yabo pesage pedelaibao,
te aga we bidi dabe te bugai haliga mu elama
bidaibao.
19 Ena digi me eno wiegi yai pemene
te Jerusalemba elama,
te ena we bidi dabeba bugai haliga yaibao.
Te gesi nigali Jerusalemde te bidi dabe gela wabo
kulukulu munu me elalugobeo,
te genuai dene elalubo bidi dabego
te i wabo sę me elalugobeo. e 
20 Te dwasianu ogomani dabe me
te ogomani bidi elalubo sogo me isigobeo. Menio.
Tigidali we bidi te bobobage sogo sesabi elama,
mu bidama, te monu dabe mu pedelaibao.
Te augwa kibu be bidi sese a naga 100 yia bidali,
te tagalao, augwali te gesi tigi elalubo we bidi
bidaibao,
tiyu augwali me deli te kibu be bidi sese a naga 100
yia bidisiąbadi isibaso,
te gasa bagego homugo te Genuai Bidi eno aga
isimainu yai da,
te homu yaibao,” te po wai dao.
21 “Te eno we bidi dabego te be dabe sęnama, tede
bidalueibao.
Te augwa te wain gi dabe bulama,
te wain du tabila tuyu, bidaibao.
22 Te boi bidi dabe munu ma aselama,
te eno we bidi dabe sela sąyu, ela gudulama,
te augwaligo beba bidagaselama,
te augwa wain gi selama,
te wain du tabilama tuyu, me tegobeo.
Te eno we bidi dabe sesabi elama,
bobobage sogo mu bidaibao,
te bomai dila pai ni tiwai elalueibao.
Awe, tama augwa digi sę dene elama,
pedalubo naide wiegi yai
homu pemene elama, bidaibao.
23 Augwa ebo sę te odolali me ela tagalogobeo.
Te augwa wai dabe me doloyu,
me egobeo, magi baso meni,
augwaliba eno te wiegi yai sę bugagia yainu,
te sa muani hani dabego wai dabe dao.
Te eno augwaliba bugagia wiegi yai sę eyu,
te augwa wai dabeba me,
te augwa nosali bulabo wąį nǫų
wai dabeba te tama tiaibao wali.
24 Te augwa godolo homu eyu,
te sabo homu ebo nai po te enaba gedu haluasa po
weyu,
hanalusiąbadi, te eno augwaligo
hanalubode wei ponaibao.
Te augwa gedu haluasa po wabo sogo da,
teda eno te nai dabe augwaliba mawaibao.
25 Te bulu uni yowi dabe me te sipsip wai dabe
augwali hodobo deliba nai tueibao.
Te laion dabego te bulmakau dabego
nosai tubo tiwai yaibao.
Tiali goli, te hasamani dabego da,
te tǫ hogomu naga tueibao.
Te Genuai Bidi, eno buludu pesage tigidalide,
te tigidali nai bugagia elalueibao,
te bidi me deligo gasa bidi meba
dwai sę iliyu me tegobeo.
Ena Genuai Bidi, eno po wai dao,” wali. f 
Copyright information for `MPS