a[Mt 5:34, 35; 23:22]
b[Tpi 7:49-50]
c[Ped 12:5]
d[Ais 65:17; 2 Pi 3:13; Ped 21:1]
e[Mk 9:48]

Isaiah 66

Genuai Bidigo aga boi bidi dabe aiyaba elaluama, te aga dologoba asali haniba wiegi yai sę yaibao wali po

Genuai Bidigo te po wai,

“Dagalu da, te ena dugabo sia king tiwai elalu,
te tǫ eno sągą ugwadu mubo pesage dao.
Tega. Te dagego eno be sę ebo usugowe?
Te mena badu ena toma nabo pesage elalueibawe?
a 
Genuai Bidi ena digi, eno te dagalu
me tǫ tigidali nai nigilama,
te augwali pedelama, megi elalubao.
Eno te tobage bidi dabeba bugagia haliga yaibao,
te augwa digi aiyaba elaluama,
te augwa yali dwai sęde homu dene eyu,
enaba wi elama,
te eno po dologoba aselama, bidibo bidi.”
b 
“Tiali goli, te augwa digi dobo homu wali pabo
we bidi dabego augwa te haniani dwai kolesaga
godolo mu eyu,
tama augwa te enaba lotu mu obao, te homu ebao.
Tiali goli, augwaligo enaba te ofa ebo
tigidali te eno godolo mu me isąwai.
Te augwaligo bulmakau elama, enaba ofa ebo sogo,
eno suali, augwa te bidi elali tiwai ebao.
Te augwa sipsip wai elebo sogo,
eno suali, augwa te yowi elama,
te enaba ofa tiwai yali.
Augwa te wit dabe ofa ebo sogo, eno suali,
augwa te kibu kaneme ofa ebo tiwai yali.
Te augwa wiegi yai denami ebo hano ebo ofa ebo sogo,
eno suali, augwa te tibo god piksa
me deliba ofa ebo tiwai yai dao.
Te pagede tama te augwaligo tolabo sęgę eno sa
muani,
augwa te wi mu ebo sęgę dao.
Magi baso meni, eno augwaliba i obadi,
te eno i wabo augwaligo wei ponobeo.
Te eno po me augwaliba pusubadi,
tiali goli augwa wali me pabeo. Menio.
Augwa eno po sela sąyu, te eno gedude
dwai kolesaga naga yali,
te eno godolo homu isąbo kolesaga dabe mu dao.”
“Dage te wi elama, te Genuai Bidi,
eno po dologoba asobo hani dabe,
dagego te megi eno dageba pusainu ebo po odao.
Dage ena wali asobo bomo yai,
tama te duga deli hani dabego
te dage godolu mu me isąma,
te augwaligo dage tudiba muai.
Te augwaligo dageba posobo po weyu,
dageba te tiwai po wali,
‘Te Genuai Bidi aga genuai bomo dali asomainu eyu,
te dage pemene ilimainao, te tebo dago sueibao.’
Tialima, eno te po obao,
te dagego augwali dwai hale mu
sabo sueibao, te po wali.
Te taun tomode genuai i weyu,
te eno be tomode kulukulu wabo odao.
Te eno i me kulukulu weyu ebao, te Genuai Bidi dao.
Eno te ena boi bidi dabeba dwai dene mayu,
te augwa yali dwai kolesaga wei ponaibao,” wali.
“Ena, Genuai Bidi, eno te po obao,
eno taun te wego wai deli sogo polo
tama ame nabo tiwai yaibao.
Aga te wai ame nabo tigi dene isąbadi,
tama te wai polo pedelali. c 
Dagego te tobage sę polobadu sulama,
odai da homu eba, agawe?
Te bulu tǫ kantri me deli te deli sogo
pedalubo da, agawe?
Te genuai hani we bidi me deli te deli sogo tama me
pedalubo homu eba, agawe?
Tiali, Saion aga te wai ame nabo
tigi dene ebo gagalobo sogo,
te polo tama aga te wai ame naibao.
Ena God, Genuai Bidi, ena digi eno
aga te wai ame nabo dene ilali.
Tama tibaso, te magi elama eno agai haliga paniama,
eno aga wai somainu iligobe dawe?
Ena da, ena dagego God dao.”
10 “Dage te Jerusalem godolo mu ebo hani dabe,
dagego aga dali wiegi yai pemene yao.
Dage agade te homu dene elama,
gela weyu yali hani dabe,
megi da, dagego aga dali wiegi yai homu pemene yao.
11 Magi baso meni. Aga bugagia bidibaso,
te duga wiegi yai pemene elama,
agade te wiegi yai nai hauwa saibao.
Aga te dagego ida me deli tiwai elama,
tama dagego aga ame tuyu,
te dage bugagia mu pągąnama,
te haliga nagame yai bidaibao,” wali.
12 Genuai Bidigo te tiwai po wali, “Magi baso meni.
Eno te Jerusalem bugagia mu elalumainu yaibao,
te sesemane sogo agai te gasa tǫ kantrigo wiegi yai
nai dabe hauwa saibao.
Te aga magi deli me sǫą pisąma,
te wę sesemane sogo asudu,
te sula sisąbo tiwai yaibao.
Te dagego te nai dabe siyu, wiegi yai pemene mu yaibao,
te waigo idago ame tuyu, pemene ebo tiwai yaibao,
te waigo aga idago sabilibaso, pemene ebo tiwai eyu,
te idago aga telede pilama,
aga dali gagali ebo tiwai ebo dao.
13 Te eno dage bugagia mu tonalu,
te idago aga wai bǫų bugagia tonalubo tiwai eyu,
te aga waigo haliga dua nagame
ilibo po wabo tiwai yaibao.
Dage te Jerusalemde bidiyu,
te duga haliga nagame elama bidaibao.
14 Eno te tama sę dageba ebo subaso,
te duga haliga pemene mu elama,
te dage genuai bomai hani mu pedelaibao.
Te dage eno sę bidi dabego te duga Genuai Bidi eno
bomo bugagia koneaibao.
Tiali goli, eno boi bidi dabego te eno
haliga sębę koneyu, gę naibao.”
Genuai Bidigo te po wai.
15 Te dagego Genuai Bidi te sia dali asobo sueibao,
te aga karisde dugulama, bomonama,
umagia mu udayu,
te bomai wali asobo tiwai yaibao.
Te aga haliga sębę ebo siago te aga boi bidi dabe ulama,
te augwali mu silaibao.
16 Magi baso meni. Te Genuai Bidigo isigo te we bidi
uluyu,
te agai hwą ge bainatgo te we bidi hauwa mu ela
mueibao,
te augwa yali dwai sę wei ponoyu, tiaibao.
17 Genuai Bidigo te tama po wali, “Te tibo godiba lotu wabo hani dabe, augwa te tibo godigo gedude wiegi yai pedalumainu ebo kolesaga wali peyu, augwa te lotu wagi pabo pesage giba pelama, te augwa polalubo bidi dabego ebo kolesaga wali pelama, augwa te kibu mi, me bolo mi tuali, te gasa nai dabe eno gedude wiegi yai isąbo nai tuali, augwa tigidali dolama, mu silaibao,” wai dao.

Te tigidali tǫ kantri we bidi dabe te Genuai Bidi dologode bidaibao

18 Genuai Bidigo te po wai, “Eno te we bidi dabe homu kolesaga sulama, tama eno konebao, te megi da, eno te tigidali we bidi dali sisinibo sogo dao, te mena po haniani wabo bage me sisinaibao. Te augwali sisinagasobo sogode, teda augwaligo te eno genuai ula me bomo sueibao. 19 Te eno augwali tomode te dąį me deli pedalumainu ilaibao.”

“Tialima, eno te hani meba, te dolisąwani hani bage, te digibulu tǫ kantri we bidiba tagala palama, te eno genuai nogi me bomo te eno genuai bomo ebo po odisąwani we bidi dabeba pusugi pomainu yaibao. Te augwali eno te hani dabe Tarsis, me Pul dabe, me Lidia, te haniba tagala palaibao, te Lidia bage augwali enesigigo ene enebo mu konea pai bidi dabe mu, te Tubal me Gris dabeba, te digibulu bidalubo gasa we bidiba me tagala palaibao.
20 Tama te tǫ kantri we bidi dabego te duga deli hani dabe duga abagi te augwa bulu kantridu enaba te ofa tiwai elama, odasa asaibao. Augwa te augwali te hos dabede, me donki dabede, me kamel dabede, me karisde dugulasa asomainu ilaibao, te augwaligo augwali te eno bulu du Jerusalemba odasa asaibao. Augwaligo augwali enaba odasa asobo, te dage Israelgo te ofa yabo wit te wiegi yai pou dis te eno gedude wiegi yai yaide wit munama, te eno beba sela asobo tiwai yaibao. 21 Tama te augwali meba eno te pris pedalumainu ilaibao, te meba Livai hani bidimainu yaibao,” Genuai Bidigo te po wali.

22 “Ena Genuai Bidi, eno te po obao, te gesi dagalu me gesi tǫ eno nigaibao, te eno gedude sesemane bomo elalueibao, te tiwai duga wai dabe te sesemane sogo bomo elalu, te dagego nogi me sia sogobeo. d  23 Te genuai si tigidalide, te gesi poluade nanobo side, me tigidali Sabat side, te tigidali tǫ habu we bidi te asiyu, te ena geduba kidu sugunama, enaba lotu waibao, Genuai Bidi dao. 24 Te augwa eno be tagalobo sogo, te augwa hagoma elama, eno po sela sąwani hani dabe tigi, te tǫde pila muna muna pabo sueibao. Te dwasianu sawi dabego augwa tigi dabe tuyu, te bidada paibao. Te isigo augwa tigi deyu, te me siligobeo. Te tigidali we bidigo te bidi hani dabego tigi sueibao, te damua pai dwai nai mu tiwai yaibao,” God Genuai Bidigo te po wai dao. e 

Copyright information for `MPS