a[Sai 32:11-14; Nam 14:13-19; 1 Sml 7:5-9]
b[Ped 13:10 ]
c[2 Kin 21:1-16; 2 Sto 33:1-9 ]

Jeremiah 15

Te Juda dabe dwagila mu dolaibao wali

Tialima, Genuai Bidigo enabolo te tiwai po wali, “Jeremaia, odao. Te Moses de Samuel si te ena pąba asama, te enaba hanalu, te we bidi dabeba te olo mu tau sabo wiegi yai kolesaga yao wagi sogo da, te tagalao, eno usu menigi da. Te we bidi dabe sela sąyao! Eno augwali subo, te ena hagela homu mu ebo dao. a  Te augwaligo nageba e tiwai hanalu, ‘Da mena pagawe?’ obaso da, teda nago te tiwai po augwaliba wei ponao,

‘Ena Genuai Bidi, eno te tiwai po obao.
Eno te bidi meba dwai gasi selama, isimainu dąį ilali.
Te augwa dwai gasi sigi pomainogo yaibao.
Te bidi meba te boi hwįgi pelama, isimainogo dąį ilali.
Tama augwa te hwįgi pelama, isimainao.
Te eno bidi meba nai sǫą pelama, isimainu muani.
Te augwa nai sǫą pai pomainu yaibao.
Te eno bidi meba sa muyu, te gasa tǫ kantriba kalabus
igi paibao wali.
Tialima, augwali te kalabus igi pomainogo yaibao.’
b 

Te po wei ponao.
Ena Genuai Bidigo, te eno nai me si me sigo te we bidi dabe mu silimainogo tagala palaibao. Augwali te boi bidi dabego ela mumainogo sa muaibao. Te eno yowi dabego augwali tigi mi pepedela tumainogo sa mueibao. Me te ba dabe, me uni hasa dabego te tigi mi mu tulama, silimainu sa mueibao wai dao. Te gasa tǫ kantri we bidi dabego eno te sę te Juda dabeba yali po odama, te augwali wi elama, dwai noma mu saibao. Eno te dwai sę te bidi Manasego yali wei ponaibao, te Hesekiago ogwago, te Jerusalemde te sę yali, te aga Juda king bidali sogo tama tiai dao.” c 

Genuai Bidigo te tiwai po wali,
“O Jerusalem, dego nage hobede yaibawe?
Te nagede dego gela udaibawe?
Te dego nage bugagia bidibowe, te gegela suagasogowe?
Ena Genuai Bidi,
eno po dolo tama obao, naga digi ena tudiba mudu,
te ena digibulu pali.
Tama tibaso, te ena digi ena nogogo te nage elama
dolobao.
Hauwa sogo eno nage hobede yali,
tiali goli megi ena hagela pai dao.
Eno te tigidali we bidi te taun Judade selama,
te augwali eno ela gudulali,
te waligo wit wali hogomu sela sąbo tiwai yai.
Eno ena we bidi dabe dolama,
te augwa wai dabe ela muani, magi baso meni,
augwa dwai kolesaga ebo me tagalobeo.
Eno te ami bidi hauwa ela muani,
tama augwa we dabe te augwa naga olo bidali.
Te we dabe namba umabo mu bidai,
te nambisde masigi sane aiyaba elaluali.
Te giligade digi eno te boi bidi dabe tagala palama,
te ami bidi dabego ida dabe ela muagasali.
Deli sogo mu tama eno augwaliba te genuai dene
menama, te augwali wi dwai mu ilai dao.
Te we me deligo te wai nogo a naga olama,
me badu si te ame nai ogwa elaluali,
te tagalao, te ogwa tigidali mu isila silali.
Tama te waigo ida te dwai dene mu elama,
aga tigi kimi meni yai.
Te idago wiegi yai sogo elaluali te dwai polo sogo
pedelama,
te aga genuai hale salio.
Awe, te bubuga tomode te giliga ge polo tama degasa
pai dao.
Te Juda meba bidalubaso da, te eno boi bidigo augwali
ela muagasomainu ilaibao.
Ena Genuai Bidi, eno te po wai dao,” wali.

Jeremaiago homude elaluali po Genuai Bidiba pusali

10 Ena Jeremaia, eno te po wai, hobede mu da,
magi baso idago ena ame nenama,
te eno wado ebo sę,
me po konila te tǫ kantri tigidali bidi odubawe?
Eno gasa bidide negeli me elalusiąyu,
tama te bidi dabego me enaba negeli mawai me
elalubeo.
Tialima, tigidaligo te po weyu,
te Genuai Bidigo ena dolomainao wabo dao.
11 Tialima, Genuai Bidigo enabolo te tiwai po wali,
“Haliga sęgę ebo tagalao.
Te eno nage tau siyu, te nage bugagia bidaibao.
Te eno boi bidi dabe nageba asomainu eyu,
te nago augwali sęgę ebo sogo, me te dwai sogo,
augwali gegebo sogo te nago augwali tau somainu
hanalu wagasomainogo ilaibao,” wali.
12 Genuai Bidigo te we bidi dabeba te tiwai po weyu,
te po wai, “Mena bidigo te ain me bras
togwaibawe?
Te not badu asobo boi bidi dabego bomo te ain tiwai
dao.
13 Te eno dagego tigidali mone me wiegi yai doado
bage tigidali te boi bidi dabeba mawaibao.
Magi baso meni, te dagego duga tǫ kantri tigidali
habuba usu nama, te dwai sę hauwa ebo dao.
14 Eno haliga sębę te posolo yai sia dabo tiwai mu
ebao, tama te siago dage ulaibao.
Te eno dage te duga boi bidi dabego olo sę ebo bidi
pedalumainu ilama,
tama dagego me konesiąwai tǫ kantriba dage
pelama, bidigi paibao,” wali.
15 Te ena Jeremaia, eno te tiwai po obao,
“Genuai Bidi, nago eno sęgę koneanio.
Te nago enade homu kone palama, te nago ena tau sao.
Tama nago ena te dolobo bidi dabeba dwai dene sabo
wei ponao.
Tiyu, nago te boi bidi dabede dua nagame yai sę ebaso,
te augwaligo ena ela muidalio.
Nago koneani, eno nago sę ebaso,
te augwaligo enaba dwai po wabo dao.
16 Nago po enabolo mobaso,
te eno sali, te bidigo nai sabo tiwai yali.
Tama nago te pogo ena pemene eyu,
wiegi yai haliga mu yai, magi baso meni,
ena nagaba elalubao,
God Genuai Bidi Tigidali Bomo Elalubo Dao.
17 Ena te bugai haliga eyu,
gisugu wabo bidi dabe dali munu me bidibeo.
Tama eno augwali dali wiegi yai pemene munu me ebeo.
Menio.
Enaduba naga bididuali, magi baso meni,
eno koneani, te nago bomo enade elalu,
te nago haliga sębę enade pągąnalubo dao.
18 Magi baso ena dene ebo silibewe?
Eno keni genuai mu elalubao.
Magi baso aga te pedelasiąbewe?
Mu tamao, nago ena tau me sabeo.
Ena ąį tueinu ąįba pabo bidi tiwai ebao,
tiali goli, aga te wę sula sai subaso,
te aga ąį tusiąwai tiwai ebo dao.”

19 Tialima, Genuai Bidigo enabolo po wei ponoyu te tiwai wali,

“Te nage haliga begelama, enaba ma begasa asobaso da,
teda nage eno ma selama,
te nago eno sę ma yagameo.
Te nago dwai po pusubo tagalama,
te nago wiegi yai po naga pusubaso da,
teda nage eno pedauwalide po sabo bidi bidagameo.
Tama te we bidi dabe nage wali pomainogo yaibao,
tialima nage augwali wali me pelamu dao.
20 Te eno nage te bomai obo brasgo nigai dolalubo
tiwai eyu,
te we bidi dabego gedude tama tiaibao.
Te augwaligo nage dali boi bidi yaibao,
tiali goli te augwaligo nage aiyaba me elalugobeo.
Magi baso meni, ena digi ena nage dali bidaibao.
Te eno nage tau selama, eno nage ma saibao.
Te ena Genuai Bidi, eno po dao.
21 Te eno nage tau siyu, nagede te dwai kolesaga ebo
bidi dabego nogode,
me te wiegi yai homu elama,
olo tau sisąbo bidi dabego nogode,
ma dobola selama,
tama augwaligo nage me dologobeo.”
Te po wai dao.
Copyright information for `MPS