a[Jer 7:34; 25:10; Ped 18:23]

Jeremiah 16

Jeremaiago Godigo bomai po pusubo sę elaluai

Genuai Bidigo ena, Jeremaiabolo, te tiwai po pusali, “Nage te bulude bidibo sogo, nago te we selama, wai me ame neyu me igio,” wai dao. “Magi baso meni. Ena Genuai Bidi, eno nagebolo te tǫ kantride ame nai wai dabeba me te augwa aya idaba pedelabo sę po wainogo ebao,” wali. “Tigidali te isaibao. Me badu te dwai gasi selama, isaibao. Te boi bidi asama, me badu ela mueibao. Te me badu nai sǫą peyu, isaibao. Tama augwalide hobedai gela olama, te augwali pubulabo bidi me elalugobeo. Menio. Augwaligo tigi dabe te tǫde yowi di munalua pabo tiwai yaibao. Tama te ba dabego me uni hasa dabego augwali tigi tuagasaibao,” wai dao.

“Magi baso meni. Ena Genuai Bidi, eno te tama po ma obao. Jeremaia, nage te we bidi dabe bidalubo digi pelama, te isali bidi dabede gela munu me wagi pigio. Te naga digi gela weyu, hobede yai balia me olamuo, magi baso meni, eno te we bidi bugagia bidimainu me iligobeo. Te eno wiegi yai haliga augwaliba me isąyu, te olo tau sabo wiegi yai homu kolesaga augwaliba me magobeo. Te Genuai Bidi eno po dao. Te kantri tǫde bidali tigidali genuai bidi me, olo bidi me, te isaibao. Te augwali pubulabo bidi menia saibao. Te augwalide homu dene eyu, gela wabo bidi meniama, te aga digi aga tigi wali tologoyu, te aga tobolu nisi poawaibao, te aga homu dene ebo ola mayu, te tama tegobeo. Tialima, te isali bidi dabede te bidi mebago homu denede gela wagasobaso, te bidi dabeba nai me tuabo ąį sela asabo bidi dabe meni yaibao, te augwali homu nagame ilabo sę yabo me tegobeo. Te augwa aya ma ida isali, te tagala, te hani dali hobede elama bidagasabo bidi meni yaibao,” te po wai.

“Tama nage te genuai nai daa tubo beba pelama, te augwali dali deliba kisalu, te nai tuyu, ąį tuyu me tigio. Magi baso meni, ena, dage Israelgo God dao, ena te Tigidali Bomo Elalubo Genuai Bidi, eno po dolo obao, te tǫde we bidi dabe me bidigobeo. Te bugai haliga ebo me, pemene homu ebo kolesaga me, te bidi dabego gesi we sabo kolesaga me, te tigidali mu silaibao. Dage megi tama bidibo we bidi hani, te dagego te sę pedalubo sueibao,” te po wai. a 

10 “Jeremaia, nago te po te we bidi dabeba pusubo sogo, te augwaligo nageba te tiwai po waibao, ‘Magi baso Genuai Bidigo te dwai sę tigidali dabolo pedalumainu yaibawe? Dago mena kolesaga dwaliwe? Dago mena dwai sę te God, dena Genuai Bidiba, ebo dawe?’ Te po waibao. 11 Te we bidi dabego te tama po obaso da, teda nago e po augwaliba wei ponao, ‘Ena Genuai Bidi, eno te kolesaga dagego nǫų wąį dabego ena tudiba munama, te tibo god dabe wali peyu, augwaliba lotu wali. Augwaligo ena tagalama, te eno bomo yai po wali me pabeo. 12 Tama dagego dwai kolesaga ebogo te duga wąį nǫų dabego dwai kolesaga yali aiyaba mu elalualio. Dage tigidaligo hagoma homu elama, te duga homude dwai kolesaga wali pali. Tama dagego eno po odobo hagela homu ebo dao. 13 Tama tialima, eno dage e tǫ kantride ela gudulama, te dage gasa tǫ kantriba bidigi paibao, te tǫ kantri te dagego me duga wąį nǫų dabego polobadu me konesiąwai. Tama te gasa tǫ kantride eno te wiegi yai olo mu tau sabo kolesaga dageba me egobeo. Tama te giligade me hulide te dagego gasa god dabeba lotu udaibao,’” te po wai dao.

Genuai Bidigo te we bidi dabe augwa page buluba ma odasa asaibao

14 “Ena Genuai Bidi, eno te tama po obao. Eno te we bidi dabe ela gudulaibao, tiali goli, nosali eno augwali te eno augwa wąį nǫų dabeba mani tǫba ma odasa asaibao. Megi da, augwa po dąų wabo kolesaga te tiwai yali. Augwa te tama po wali, ‘Sesemane sogo bidada pabo Genuai Bidigo nogide eno nogo guni sisu mubao, te eno mu po obao’ wali. ‘Agai da Isipde selama, odasa asali.’ Tialima, te eno augwali ma odasa asali sogo, te kolesaga hasegelaibao weyu, augwa te tama po waibao, ‘Te sesemane sogo bidibo Genuai Bidigo nogide eno nogo guni sisu mubao, te eno mu po obao. Agai da te tǫ kantri not badu sela asali, me gasa kantri tǫde agai da sela sąnama, agai da te dena page buluba ma sela asai dao,’ augwaligo te tiwai po waibao,” Genuai Bidigo te po wali.

Juda dabe Genuai Bidide geme me duala sabaso, usu me egobeo

16 “Ena Genuai Bidi, eno te tama po obao, te eno Juda dabeba boi bidi tagala palama, te we bidi dabe augwaligo saibao, te bidigo aga hagani togobo wade te sųgų hauwa sabo tiwai yaibao. Tama nosali eno gasa boi bidi dabe tagala palama, te we bidi gegegi paibao, te bidigo buside hasa gegegi pabo tiwai yaibao. Tama te boi bidi dabego te we bidi dabe te geme bulu dude, me ola bede, dulalua pobadi, te tola saibao,” wai dao. 17 “Magi baso meni, eno te Juda dabe tigidaligo ebo kolesaga subao. Augwa ebo dwai kolesaga te augwaligo dualainogo ebo usu me egobeo. 18 Tama tibaso, hasia bolo eno augwa ebo dwai kolesaga wei ponoyu, te gasa ugwadu daganama, wei ponaibao. Magi baso meni, augwali te kugumini yai tibo god piksa noma hauwa nigilama, te eno augwaliba mani tǫ tigidali badu pągąnobao. Te god dabego bidibo ula me elalubeo, te isai bidi dabego tigi tiwai elalubao. Tama te god dabego eno gedude te tǫ meda ilibo dao,” wali.

Tigidali hani bidigo Genuai Bidi koneaibao

19 Genuai Bidi, nago ena dąų walama,
ena obogo bagualubao, te nago ena te sęgę ebo sogo
tau sobao.
Te tigidali digibulu tǫ habu we bidi hani te nageba
asama,
augwa te tiwai po waibao,
“Te dago wąį nǫų dabego tibo god,
augwali te mu god menio.
Augwali te olo bage tiwai elalu,
te da tau sabo usu me ebe dao.
20 Te bidi aga digi aga god nigibaso,
usu yaiba, agawe? Menio.
Te bidigo nigibo nai dabe augwali te god mu menio.”
Augwaligo te po waibao.
21 Tialima, Genuai Bidigo te tiwai po wei ponani,
“Odao. Deli sogo naga eno te tigidali hani we bidi
bugagia ola mawaibao,
tama te sogo augwaligo eno genuai bomo bugagia
koneaibao.
Te augwaligo eno nogi te tiwai koneama,
ena Genuai Bidi dao waibao,” te po wai dao.
Copyright information for `MPS