a[1 Sto 16:34; 2 Sto 5:13; 7:3; Esr 3:11; Tib 100:5; 106:1; 107:1; 118:1; 136:1]
b[Jer 23:5-6]
c[2 Sml 7:12-16; 1 Kin 2:4; 1 Sto 17:11-14]
d[Nam 3:5-10 ]

Jeremiah 33

Genuai Bidigo aga dąų wali po usu naibao wali

Jeremaia kalabus elalu, te ami dabe pedai badu, te kingo genuai obo tomode bidibadi, tama Genuai Bidigo gasa po me mayu, te agabolo te tiwai po wali, “Ena Genuai Bidi, te eno te tǫ nigilama, tama dodolama, aga elalubo madide dąų walai dao. Genuai Bidi wabo te eno nogi dao, te eno te tiwai po obao. Te nago enaba i wao, tama eno nago te gedu haluasa po wabo wei ponaibao. Te geme dualalubo genuai nai dabe, te nago konesiąwani nai dabe po te nagebolo pusaibao. Magi baso meni, ena Genuai Bidi, ena dage Israelgo God dao, eno te Jerusalem be dabe, me te Juda kingo be dabe me homu kone palobao. Te boi bidi dabego Jerusalem bagua sagaselama, tǫ du holali, te augwa tede dolalugulama, te taunba aiya hwįainogo tialio. Te Jerusalem dabego augwa be dabego digi aluama, te masigi me ni nami selama, taun genuai obo aluali madi mugi pali, te obo dąų waliyu tiai dao. Tama augwa te Babilon dabe dali hwįgi pali. Tiali goli, eno wado po umagia mu weyu, te eno haliga sębę dwai mu te Jerusalem augwaligo ebo dwai kolesagade ebaso, te eno augwali tau sabo hagela yali. Tama tialima, te boi bidi dabego augwali ela munama, tama te isai bidigo tigi dabego te taunde be dabe pągąna saibao,” wali.

“Tialima, nosali eno te taun tau selama, tama te taun dali, te we bidi dabe me, wiegi yai ma pedelaibao. Te eno wiegi yai sogo mu augwaliba menama, te augwali bugagia mu bidiyu, tama te boi bidi dabego augwaliba me hwįagasogobeo. Te sogode, eno te Juda hani dabe me, Israel dabe me, bugagia ma bidimainogo yaibao. Tama eno augwali bomai hani pedalumainogo elama, te polobadu tiwai yaibao. Augwaligo enade hagoma elama, dwai sę yali. Tialima, eno augwaligo te dwai sę sela sąnama, te augwali eno gedude wiegi yai ma pedelaibao. Tama tigidali tǫde we bidi hanigo eno te wiegi yai sę tigidali te Jerusalemba ebo sulama, tama tebogo te hani dabe wiegi yai pemene elama, enaba bugai haliga eyu, enabolo genuai nogi mawaibao. Te hani dabego te Jerusalem bugagia dugulalubo sulama, te eno wiegi wiegi yai nai dabe te Jerusalemba mobaso, te augwali dwai noma mu selama, midigi umabo yaibao,” wali.

10 Tama nosali Genuai Bidigo te tiwai po wali, “Megi da, te we bidi dabego te po obao, ‘Te taun dolama, te bidi me hasa te meni yalubao. Te Judago taun dabe, me te Jerusalem sunumi dabe olo elalubao, te bidi me hasa tede me elalubeo.’ We bidigo te po obao. Tialima, ena Genuai Bidi, eno po obao, nosali te we bidi dabe te bulu pesagede ma bidaibao, 11 tama augwa bugai haliga elama, pemene eyu, tama augwa te we bidi we sabode nai ulubo sogo te nai tuyu, wiegi yai homu pemene yaibao. Tama te we bidi dabego buba hwi wabo ofa selama, te Genuai Bidi, eno beba sesaibao. Tama augwa te ofa nai sela asobo sogo da, teda augwa tęąbi po e tiwai waibao,

‘Dago buba hwi te Tigidali Bomo
Elalubo Genuai Bidiba wainao.
Agai dabolo wiegi yai sę mu ebo dao.
Sesemane sesemane sogo agai da godolo mu ebo dao.’
Augwaligo te tobage balia po te sogo waibao. Magi baso meni, te sogo ena Genuai Bidi, te eno te tǫ te polobadu elaluali tiwai wiegi yai ma elalueibao,” te po wai dao. a 

12 “Ena Tigidali Bomo Elalubo Genuai Bidigo enote po obao. Megi da, te tǫ me taun dabe dolali elalubao, tama bidi me hasa dabe tede me bidibeo. Tialima, nosalite we bidi dabe te bulude ma bidaibao. Te wiegi yai nosaima pedelama, te sipsip tonalubo bidi dabe te tigidalitǫ kantride te sę ma ela paibao. Augwa te sipsip dabete wiegi yai nosai elalubo madi odasa pelama, tomanomainogo yaibao. 13 Tama augwa sipsip nedaibao. Tesę te bulu dude elalubo taun dabede, me te dwasianu buludu dabede, me te tǫ pedai Negev te saut Juda badu eyu, tama augwa te sę Benjamin hanigo tǫde, me te Jerusalempąde elalubo bulude, me te tigidali Juda taunde, te sęyaibao. Te ena, Genuai Bidigo po dao,” wali.

14 Genuai Bidigo te tiwai po wai, “Eno te sogo medeli dąį elama, eno te Israel me Juda we bidi dabe dalidąų wali po usu naibao. 15 Te sogo eno te wiegi yai bidime deli te Devitgo hanide pedelaibao, te ni nologode gesini hogodo holobo tiwai yaibao. Tama te bidigo wiegi yaidoloba pai kolesaga mu te tǫde we bidi tigidaliba yaibao. 16 Tama te sogo Juda dabe me Jerusalemde me sęgęmeni yaibao. Te augwali bugagia dugulalueibao. Tamaaugwa Jerusalem nogi te tiwai waibao, ‘Genuai Bidi agate dago doloba pai kolesaga page bidi dao.’ b  17 Ena Genuai Bidi, eno te po obao, sesemane sogo te Israel hani dabede te king bidi te Devitgo hanide nagapedaludaibao. c  18 Tama sesemane sogo te Livai hanide te pris dabe elalu, te tobage ofa dabe enaba yaibao, te siaba tigidali uluboofa, me te wit ulubo ofa, me te gasa ofa dabe ebo sęyaibao,” wali. d 

19 Genuai Bidigo Jeremaiabolo te tiwai po wali, 20 “Ena Genuai Bidi, eno po dolo obao, eno bomo yai podąų wali po te giligade me hulide dali yali, te augwa sisesemane sogo eno augwa siba dąį ilali sogo pedaliyuyaibao. Tama eno te dąų wali bomo yai po bidi medeligo me hasegelabo usu egobeo. 21 Te tiwai naga, te niwai bidi me deligo te eno bomo yai po ena sę bidi Devit dali dąų wali po me togogobeo, te king dabe agaihanide sesemane pedaludaibao. Tama me te Livai hani tepris dabe dali dąų wali bomo yai po, te niwai bidi megotogologobeo, te eno sę bidi dabe dao. 22 Te bidi dabegote hǫ dabe me nambisde masigi sani nedainu ebaso, usumu me egobeo. Te tiwai naga, te eno sę bidi Devitgo hanidali, te Livai hani dabe me, te hauwa umabo pedelama, te bidigo nedabo usu egobeo,” wali.

23 Genuai Bidigo te tiwai po Jeremaiabolo wali, 24 “Te we bidi augwaligo te po wabo dao, ‘Polobadu Genuai Bidigo te Israel hani me Juda hani, te hani si teaga hani da olama, dąį ilama elaluai. Tialima, megi da, agai augwali tudiba muanio.’ Te we bidi augwa te tobagepo weyu, te augwaligo eno we bidi dabe dolama, tamaaugwa homugo te eno hani we bidi hagawali homu ebodao. 25 Tialima, ena Genuai Bidi, eno po dolo obao.Eno dąų walali bomo yai po te giligade dali, hulide meeno bomo yai po tigidali te dagalude me tǫde muai dao. 26 Mu tamao, eno te dąų walali bomai po te eno togogisogo da, teda eno te Jekopgo hani me, te eno sę bidi Devitgo hani me, tudiba mugi da. Tiali goli, te kolesagamu egobeo. Menio. Te eno king te Devitgo hanidepedalumainogo elama, te Abraham, me Aisak, me Jekop, te hani dabe tonalumainogo yaibao. Te eno olo tau sabo wiegi yai kolesaga te hani dabeba eyu, te augwali bugagia ma bidimainogo yaibao,” wai dao.

Copyright information for `MPS