Jeremiah 39

Babilon augwaligo Jerusalem sai

( Jer 52:1-11 )

Te nogo si polua, te kibu be 9 te Sedekaia Juda king bidali sogo, te Babilon king Nebukatnesargo aga ami tigidali selama, te augwali aselama, Jerusalem bagulama, te taun sainogo boi hwįanio. Augwaligo hwįnama, hwįnama, te waiya si me deli, te polua a naga me deli bidali, tama te kibu be 11 te Sedekaia king bidali, te polua me si me si, te polua dei te 9 wabode, augwaligo te masigigo nigai moni obo pedai me badu deli aluama, te Jerusalem tomoba pai dao. Tialima, nosali te Babilon kingo ofisa tigidali te taun tomoba pai. Tama augwali obo genuai sunumiba pali, augwa te nogi Tomo Sunumi dao, augwali teba duagi pelama, te taun tonaluai. Te ami dabe augwa polalubo ofisa bidi dabego nogi e tiwai dao, Nergal Sareser, me Sangar Nebo, me Sarsekim, me gasa sabi Nergal Sareser.
39:3Te ofisa dabego nogi me augwaligo ebo sę te kuna mu konebeo. Te po me Jer 38:28, me Ese 33:21, te side te tiwai elalubo suao.
King Sedekaia dali te tigidali ami dabego te Babilon dabe asobo sulama, te augwali wi pai. Te hulide augwali te kingo gi badu pelama, tama augwa te moni obo si ununani te sunumidu te wi pai. Tama augwa te Jordan wę odogo pesagedu pabo sunumi wali pali. Tiali goli, te Babilon ami dabego te augwali pobeasa pelama, te malu tǫ pesage dolo te Jeriko taun pąde Sedekaia pabo madi pedelai. Te augwaligo aga pageabi elama, te king Nebukatnesarbolo odasa pali.

Te sogo king Nebukatnesar te taun Riplade bidai, te tǫ pedai Hamat tǫ tomode bidalio. Tama Nebukatnesargo Sedekaia sulama, te po walio, Sedekaia te aga yali dwai sęde dwai dene saibao wali.
Te Babilon dabego te Sedekaiago ogwa dabe me te Juda tobolu bidi dabe selama, tama augwaligo augwali te Ripla teba odasa asali. Tama te bulude Nebukatnesargo te po obaso, te Sedekaiago ogwa dabe te Sedekaiago gedude augwaligo ela muai. Tama te Juda tobolu bidi dabe me augwaligo ela muai dao. Te kingo po obaso, te augwaligo Sedekaiago gedu si gudama, te augwaligo aga nogo sągą te brasgo nigai sengo kęąnio, te augwaligo aga te Babilonba sela painogo tiai dao.

Tama Jerusalemde te Babilon ami bidi dabego te kingo be me, we bidi dabego be me, isigo ulalio. Tama augwa te Jerusalem bagulali genuai masigigo nigai obo me pebe delama, sąwai dao. Te Nebusaradan, aga te Babilon ami dabego polalubo ofisa bidi te Jerusalemde bidali, agai te Jerusalemde bidaluali we bidi tigidali selama, te augwali Babilonba kalabus igi painu odasa pali. Te Jerusalem tagalama, agaba polobadu wi asali Juda dabe me selama, te agai augwali me te Babilonba kalabus igi peyu, odasa pai dao. 10 Tama agai te doado bage meni yai bidi dabe naga te Juda tǫde bidimainogo yalio. Te tǫ mu meni yai we bidi dabe, me agai wain gi dabe, me te gasa gi dabe te augwaliba mawai dao.

Kingo po obaso, Jeremaia te kalabuside bidali tagalai

11 King Nebukatnesargo Jeremaia homu kone palama, te Jerusalemba te aga polalubo ofisa bidi Nebusaradanba po ola tolali. Nebukatnesargo po te tiwai wali, 12 “Nago Jeremaia sigi pelama, bugagia tonaluao. Nago agaba dwai sę me igio. Te agai magi sę me yainogo nageba hanalu obaso, te nago agai homu wali pao,” wali. 13 Tama tialima, Nebusaradan dali te polalubo ofisa si aga dologoba pali, te Nebusasban, me Nergal Sareser, te gasa Babilon ofisa dabego me te tiwai homu deliba munama, 14 augwaligo te bidi dabe te ami dabe pedai badu tagala palama, te Jeremaia sigi pali. Tama augwa Jeremaia te Gedaliago nogoba muani, te Ahikamgo ogwa, te Safango bulai wąį dao. Tama augwaligo Gedaliabolo po walama, te Jeremaia agai beba sela pao wali. Tama tialima, Jeremaia Juda tǫde te we bidi dali bidalio.

Genuai Bidigo Ebetmelekbolo po mawai

15 Te Jeremaia ami dabe badu kalabus bidibadi, te Genuai Bidigo agabolo te tiwai po mawai, 16 “Nage te Ebetmelekba pao, te Sudan bidi dao, agabolo e tiwai po wao, ‘Tigidali Bomo Elalubo Genuai Bidi, aga Israelgo God, agai te tiwai po wai. Polobadu eno te taun dolaibao po wali, te megi da, eno te po usu naibao. Eno te taun wiegi yai bugagia me iligobeo. Tama naga digi nago eno te sę ebo sueibao. 17 Tialima, ena Genuai Bidi, eno te po obao, eno te sę dabe ebo sogo da, teda eno nage tau saibao, te augwaligo nage te nago wi ebo bidi dabe nogoba me mugobeo. 18 Eno nage bugagia tonalubaso, te nage augwaligo me eligobeo. Nago homu enaba dąų obaso, te nage me isigobeo. Ena Genuai Bidi eno te po wai dao,’” wali.

Copyright information for `MPS