a[2 Kin 25:22-24]

Jeremiah 40

Nebusaradango Jeremaia dali po miai

Nebusaradango Jeremaia olo pomainogo tagala palama, te tudi badu nosali Genuai Bidigo Jeremaiabolo po mawai. Te Babilon dabego te Jeremaia dali, te Juda we bidi dabe me, Jerusalem me selama, augwali te sengo kęnani, te augwali Babilonba kalabus odasa painogo tialio. Tialima, augwali te Rama taunba sabalobo sogo, te polalubo ami tobolu bidi ofisa Nebusaradango Jeremaia te augwali dali bidibo suali, te agai aga te olo tagala palu pao wali. Tama te sogo Nebusaradango Jeremaiabolo te tiwai po wali, “God, nago Genuai Bidigo, te po hanilama weyu, te dwai nai te tǫ kantriba pedelaibao wali. Tama megi da, Genuai Bidigo po wali gilama te sę pedalubao. Dage Israelgo te Genuai Bidigo po sela sąnama, te agai gedude dwai sę yalio. Te pagede naga tama, te sę dabe dageba pedalubo dao. Tialima, odao. Megi da, te eno augwaligo nage nogode kęąni sen pisigina sąbao, te nage olo bidagameo. Te nage ena dali Babilonba asabo homu ebaso da, teda nage asao, te eno nage bugagia tonalueibao. Tialima, te nago hagela homu ebaso da, te usu da, nage bidao. Te tǫ kantri pedai mena badu te nage pabo homu yali da, te nage peyu naga yagameo,” wali.

Jeremaiago te po odali, tiali digi agai te Nebusaradan taga pisąbadi, tama Nebusaradango Jeremaiabolo po ma weyu, te tiwai po wali, “Te meni baso da, teda nage te Gedalia bidibo madi pao, aga te Ahikamgo ogwa, te Safango bulai wąį dao. Te Babilon kingo aga dąį ilama, te Judago taun dabe tonalumainogo yali. Aga ede te we bidi dabe dali bidaibao, tama nage aga dali bidao. Te nago homugo te nage menaba pabo homu eyu da, te nage pagameo,” wali. Tama Nebusaradango te Jeremaia wiegi yai homu pemene ilibo wiegi yai nai me deli olo mobadi, te nai me menama, te Jeremaia pomainogo yai dao. Tialima, Jeremaia te Gedalia bidibo madi te taun Mispa teba pai. Tama Jeremaia aga dali te we bidi hani tomode te Juda tǫde bidalio.

Augwaligo Jeremaia te Isipba odasa palio

(Dąį 40:7-45:5)

Gedalia polalubo gavman te Judade bidali

( 2 Kin 25:22-24 )

Te Juda ami bidi meba dali, te augwa ofisa dabe me, augwali te tǫ kantri pedai mebade bidali. Augwaligo te tiwai po odali, Babilon kingo Gedalia te Juda tǫde polalubo gavman dąį ilama, bidibao wali, tama agai te magi walu doado bage meni yai bidi dabe, te Babilonba kalabus sela pisąwani bidi dabe tonalubo sę ebo dao wai. Tialima, te ofisa dabe augwa ami bidi dabe selama, tama augwaligo Gedalia te Mispa teba sugi pali. Te ofisa nogi dabe e tiwai, Ismael, Netaniago ogwa, te Johanan me Jonatan, te Kareago ogwa si, te Seraia, te Tanhumetgo ogwa, te Netofa bulu bidi Efaigo ogwa dabe me, te Jesania, te Maka tǫ bidi dao. Gedaliago augwali sulama, augwaliba te tiwai po wali, “Nogo guni sisu weyu, eno mu po obao, dage te Babilon dabe dologode bidibo wi me igimio. Menio. Dage te tǫde bidalu, te Babilon king dologode bidali da, te dage bugagia mu bidaibao. a  10 Ena digi ena te Mispade bidaibao. Te Babilongo da suagasobo sogo da, te ena dago Judade po pusubo bidi tiwai bidaibao. Tialima, dage te duga sali taun dabeba ma begasa pelama, te dagego ni du wai dabe selama, te wain me, wel me nigilama, te nosali sogo tuabo munalumainao,” wali. 11 Te sogo te Juda dabe me badu te tǫ pedai Moap, me Amon, me Idom, me gasa tǫ kantri badu bidaluali. Augwaligo te tiwai po odali, te Babilon kingo te dwasianu hani we bidi te Juda tǫde bidimainogo elama, te kingo Gedalia dąį ilama, augwali tonaluao po wai. 12 Tialima, te Juda dabego te boi bidigo augwali sela sąwani tǫ kantri tagalama, te augwali Judaba ma asalio. Tama augwaligo Mispa teba Gedalia sugi pali. Tama nosali, augwaligo te gide haniani nai sali, te augwaligo wain me wiegi yai nai hauwa elaluai.

Ismaelgo Gedalia ela muani

( 2 Kin 25:25-26 )

13 Me sogo deli Johanan, te Kareago ogwa, te Juda ami bidi te gasa ofisa dabe, augwali te Gedalia bidibo madi te Mispa teba asali. 14 Tama augwaligo agabolo te tama po wali, “Te tǫ kantri Amon king Balisgo te Ismael tagala palali, te Netaniago ogwa, aselama, nage ela muagasaibao. Nago te koneaniwe, ma meniwe?” wali. Tialima, Gedaliago te augwaligo poba homu muyu, te mu po da wabeo. 15 Tama te Johanan dali Gedalia augwa si bidudali sogo, Johanango Gedaliabolo te tiwai po walio, “Te nago enabolo te Ismael eligi pao po obaso, te usu egowe, ma meniwe? Te sę ebo te mena bidigo me konegobeo. Tiyu, nago aga gogolobaso, te agai nage ela muabuo, te megi nage dali sisinagasali Juda dabe, te augwali tedela palama, tama dago dwasianu hani te mu dolaibao,” wali. 16 Tialima, Gedaliago Johananba te tiwai po wei ponanio, “Nago te tiwai kolesaga me elamuo. Nago Ismaelbolo te wabo po mu po me wabeo,” wali.

Copyright information for `MPS