a[2 Kin 24:1; 2 Sto 36:5-7; Dan 1:1-2]

Jeremiah 45

Jeremaiago Genuai Bidigo po te Barukba mawai

Jeremaiago po Barukbolo mawai, te Neriago ogwa, te kibu be me si me si te Jehoiakim, te Josaiago ogwa, te Juda king bidali. Jeremaiago te Genuai Bidigo agabolo mani po pusubo sę ebadi, tama Barukgo buku me delide asęani. Tama augwali si te sę idubo sogo, Jeremaiago Barukbolo te tiwai po walali, a  “Baruk, odao. Nago te tama po wai, ‘Hobede dao, enade sęgę hauwa me dene elalubao, tama Genuai Bidigo eno sęgę didigili pabo sę mu ebao. Ena gela wabo sę ebogo te ena hagela mu ebao. Eno sęgę sia siyu me ebeo. Te me tama elaludu gębo dao,’ nago te po wai. Tialima, Baruk, odao. Genuai Bidi da Israelgo God, te eno nagebolo te po pusa mao wali, ‘Ena Genuai Bidi, eno po dolo obao. Megi eno te ena nigali nai dabe alubo sę yaibao. Te ena bulali nai dabe gudaibao. Te nai dabe eno aluama, guda sabo sę ebo, te tigidali tǫ habu pedaiba usu nama, te tama sę yaibao. Tama tialima, nago homugo te wiegi yai nai naga nageba pedalumaina homu ebawe? Nago te tama homu kolesaga ebo tagalao, magi baso meni, ena Genuai Bidigo eno te tigidali tǫde we bidi dabebolo dwai dene mabo sę ebao. Tiali goli, te eno nage tau saibao, te nage menaba pobaso te tagalao, te nage augwaligo me ela mugobeo,’ agai te po nagebolo pusa mao wali,” Jeremaiago te po wai.

Copyright information for `MPS