a[Ais 14:29-31; Ese 25:15-17; Jol 3:4-8; Amo 1:6-8; Sef 2:4-7; Sek 9:5-7]

Jeremiah 47

Genuai Bidigo po te Filistia dabede elaluai

Genuai Bidigo te kantri Filistia dali po elaluai, tama agai te po te Jeremaiabolo mawai, te Isip kingo te Gasa buluba boi hwįsiąbadi, te Filistia dabego genuai taun me deli dao. Genuai Bidigo te tiwai po wali, a 

“Suao. Te not badu ąį genuai pedalubao.
Te augwali bomonama udayu, te boma pai mu dao.
Te wę asobo bomo tiwaigo te tǫde elalubo nai dali
tigidali mesegelaibao.
Tama agai taun dali, te taunde bidali we bidi dabe dali,
mesega saibao.
Te tǫ kantri we bidi tigidali wi ebaso,
bomonama i weyu, dwai gela mu waibao.
Augwaligo te hos dabe udayu,
sągą pidi bu wabo odaibao.
Te augwaligo karis dabe bomonama kekeyu,
te wil dabego kidagalo wabo odaibao.
Tibaso, te we bidi dabe wi umabo ebaso, wi paibao.
Te ayago te augwa wai puluba dabede homu kone
palama,
te augwali tau siyu, me tonalugobeo.
Augwa nogo bomo kimi mu isiyu bidaibao.”
“Magi baso meni, te Filistia tigidali dolabo sogo,
te pedelalio.
Eno augwali sunumi paliama,
te augwaligo Tair me Saidon dabe tau me sogobeo.
Polobadu mu te Filistia dabe augwa wąį nǫų dabego
te ailan Krit tagalama, te genuai buluba bidagasali.
Tialima, megi da, Genuai Bidi eno te dwasianu bidalubo
Filistia hani dabe dolainogo homu ebo dao.
Te Gasa hanude bidibo bidi dabe augwa haliga sęgę
dwai mu elama,
augwa tobolu nisi pola sąwaibao.
Tama te taun Askelon mu dolaibao.
Dage te odo malu bulude bidalubo dwasianu hani,
nisu sogo dagego homu dene ebo silama,
te dagego duga tigiwali togobo kolesaga
tagalaibawe?
Dagego e tama tiwai i wali,
‘Genuai Bidigo bainat hwą,
nisu sogo nago te da dolobo sę silaibawe?
Bainat, te naga bulubo be tomoba ma bula sao.
Nago te sę tagalama, toma nao,’ dagego te po wali.
Tialima, ena, Genuai Bidi,
eno te sę ena bainatba mawai.
Tama tibaso, bainatgo te sę ebo me tagalogobeo.
Eno te hwą bainatgo te bulu Askelonba boi hwįgi
pomainogo,
me te nambisba te gasa we bidiba boi hwįgi
pomainogo tagala palai dao,” wali
Copyright information for `MPS