a[Ais 15:1-16:14; 25:10-12; Ese 25:8-11; Amo 2:1-3; Sef 2:8-11]

Jeremiah 48

Kantri Moap dolaibao

Genuai Bidigo kantri Moap dali po elaluai. Tigidali Bomo Elalubo Genuai Bidi, aga Israel dabego God, agai te tiwai po wali. a 

“Hobede mu dao, te boi bidi dabego te Nebo taun mu
dolaibao.
Te boi bidi dabego te Kiriataim elaluama,
te bomai obo elaluali taun, te dolaibao.
Tama te taunde we bidi tigidali hale dwai mu saibao.
Te Moapgo genuai nogi elaluali, te tulaluaibao.
Te boi bidi dabe te taun Hesbonba sabolama,
te augwa Moap dolabo kolesaga yabo po miaibao.
Augwa te tiwai po waibao,
‘Te bageo, dago te we bidi hani mu siligi paibao,
tama te kantri Moap munu ma elalugobe dao,’
waibao.”
“Dage te taun Matmen we bidi tigidali,
te boi bidi dabego dage dolama,
tama dage tigidali te gų pageba paibao.
Te taun Horonaimde genuai gela wabo odao.
Augwa te tiwai i waibao, ‘Tigidali nai mu dolali dao.’
Moap dolobaso, te augwaligo wai dabego gela ogolu
holobo genuai mu pedelai dao.
Te Moap dabe wi paibao.
Te augwa gela umagia mu weyu, te taun Luhitba te
sunumidu ugwaba holiyu,
te taun Horonaimba aiya dulaibao.
Tama augwaligo gela u wabo, te genuai mu pedelai dao,
magi baso meni, augwa bulu mu dolai dao.
Augwaligo te tama po obao, ‘Polo wi pao.
Tiyu, dage dolabuo.
Dage te olo masigi kemi buluba pelama,
geme dualalugi pao,’ augwaligo te po obao.”
“Moap, nago te yali sę dabede me,
mone dabe me, homu kone palobo sę bomo elalu,
te nago homugo te nai dabego nage tau selama,
te nage bugagia bidaiba homu ebao.
Tialima, nago te homu ebo te wiegi yai menio.
Tibaso da, te boi bidi dabego te boi hwįbaso,
te nage aiyaba elalueibao.
Tama nago tibo god Kemos te augwaligo selama,
te gasa bulu kantriba kalabus igibu sela paibao,
te aga pris bidi dabe me, te Moap tobolu bidi dabe
dali sela paibao.
Te boi bidi dabego tigidali taun dolagaselama,
te taun me deli te bugagia me elalugobeo.
Augwaligo te odogo malu bulu me dolobadi,
te ugwadu doloba pai bulu me dolaibao,
te ena Genuai Bidigo, eno po wali gilama yaibao.”
“Te Moap aga te ba tiwai te bogo elalugi sogo da,
te wiegi yai ebaso, te dolobo sę agaba asidali weyu,
bola pigi da.
Te aga taun tigidali dolama, te olo elaluaibao.
Tama te taun dabede bidi me bidigobeo.”
10 Eno homugo Genuai Bidigo mabo sę
te sę ebo hagela ebo bidi dabe te Genuai Bidigo
dolainogo yaibao.
Te agai te bidibolo weyu,
te gasa bidi bainatgo elao po wali,
te bidigo te isąbaso da,
teda Genuai Bidigo aga dolaibao.

Te Moapgo taun tigidali dolaibao

11 Genuai Bidigo te tiwai po wali,
“Te Moap kantri gesi sogo dąį elasa,
te megi e sogoba usu nagasobao,
te mena sogo me deli te boi bidi dabe aselama,
me dolagaselama, te we bidi dabe gasa kantriba
kalabus me sela pisąwai.
Moap te bidi dabego nigilama,
te elalumainogo yali wiegi yai wain ąį tiwai dao.
Te augwa te me botoldu te gasa botolba tabia sisąwai
tiwai elaluai.
Te aga pusu me tama elaluali,
te aga denami wiegi yai dao.
12 Tiali goli, ena Genuai Bidi, eno po dolo obao,
eno te bodolu muani sogo me deli elalubao,
tama te sogo eno te bidi dabe tagala palama,
te Moap dolagasaibao, te bidi dabe te wain tǫba
gea palagaselama, te wain buali sospen subigila
gea palama, alua sąbo tiwai yaibao.
13 Tama te sogo te Moap dabego te god Kemosde hale
mu yaibao,
te tibo god Betel bulude elaluai Israel dabe hale yali
tiwai,
te sogo te godigo augwali tau saiba homu yai dao.
14 Dage Moapgo, magi baso dagego te po weyu,
dage te bomai ami dabe te dagego hwįbo mu koneai
da wabo dawe?” Genuai Bidigo te po wai.
15 Te king, aga nogi te Tigidali Bomo Elalubo Genuai
Bidi,
agai te tama po obao, “Te boi bidi dabego te Moap
dolagaselama, te taun dabe saibao.
Augwaligo te Moap wiegi yai gesi ogwa bidi dabe ela
mubo sę umabo yaibao.
16 Te Moap dolabo sogo pąde yalio.
Te dolabo sę polo tama mu pedelaibao.
17 Dage Moap pąde bidibo hani tigidali,
te dage hani tigidaligo te aga genuai nogi koneai,
dagego aga hobede elama, te tama po waiyąo,
‘Hobede mu dao, te bulu kantrigo bomo me
genuai nogi elaluali, te tulaluali dao,’ po wao.”
18 “Dage te taun Dibon we bidi,
dagego te duga genuai nogide
homu kone elalubo tagalama,
te wa pai tǫde olo bidi bidibo tiwai yao.
Magi baso meni, te Moap dolobo sę yabo bidi,
te dageba pedelama, te duga bomai obo elalubo
hanu dabe dolaibao.
19 Dage te taun Aroer we bidi dabe,
dage te sunumi sesegeba doligi pelama,
te wi asobo we bidi augwali suao.
Te augwaliba dagego hanalu wao, ‘Mena sę pedalubaso,
dage wi asobawe?’
20 Te augwaligo te tiwai po wei ponaibao,
‘Kantri Moap dolobaso, te megi da,
aga dwai hale mu ebao.
Te dagego hobede mu elama, i olama,
te gela bomo elama wao.
Dage te wę Arnon pąba pelama,
te we bidi augwaliba te tama po walao,
Moap dolai dao po wao.’
Te wi asobo we bidigo te po waibao.”
21 “Te doloba pai bulu pesagede ugwadu elaluali taun
dabe,
augwaliba te dwai dagalabo sogo pedelai dao.
Te e tama taun dabe dao, Holon, me Jasa, me Mefat,
22 me Dibon, me Nebo, me Bet Diplataim,
23 me Kiriataim, me Betgamul, me Betmeon dao,
24 me Keriot, me Bosra dao.
Te Moap gasa taun dabe tigidali me dwai dene salio,
te pąde elaluali, me digibulu elaluali,
te tiwai sę naga pedelalio.
25 Te boi bidi dabego Moapgo bomo aiyaba elaluama,
te Moapgo aga tau sabo mena sę me deli yabo usu
meni yai.
Ena Genuai Bidigo, eno te po wai dao,” wali.

Genuai Bidigo Moap aiyaba elaluai

26 Genuai Bidigo te tiwai po wali,
“Moapgo ena dali hagoma ebaso,
te eno homugo te boi bidi dabego
aga elalumainogo homu elama,
te aga bomai ąį tulama, gęǫ page ebo bidi tiwai
pedalumainogo ilimainao.
Te aga bugali bogu daide pila mudu,
bebegeludubaso, te bidi dabego aga
gisugu momainogo yaibao.
27 Moap, polobadu nago posobo po olama,
te Israelba dwai gisugu mawai
Magi yaliwe?
Nago homugo Israel te nai wi sabo hani tiwai me deli
bidibaso,
te nago agaba posobo po weyu,
te nago aga nogi aiyaba elaluai da, agawe?
28 Dage Moap, dage te masigi dedage buluba geme
duala sigi piąo.
Dagego te ba dabego augwa be te sau dagede sę ebo
tiwai gilama tama dage me tiąo.”
29 “Da tigidaligo te Moapgo hagoma kolesaga ebo po
odali.
Te bageo, Moapgo hagoma mu ebao.
Agai aga digi nogi ugwaba siyu,
te subigila hagoma mu yali.
Te agai te aga polalubo mu dao homu yali dao.
30 Ena Genuai Bidi, eno agai hagoma kolesaga ebo
koneani.
Tialima, agai odolali te agai yali sę tigidali te
hagawaibao.
31 Te tigidali Moapde eno hobedai gela waibao.
Te Kirheres we bidi augwalide eno homu dene mu ebo
dao.
32 Te taun Jaser dolobaso, ena gela obao.
Tialima, te taun Sipma, nage dolobaso da,
te ena gela wabo ogolu mu yaibao.
Sipma, te nago wain gi hauwa umabo mu elalubao,
te sigi ąį Detsi, me sigi ąį Jaser,
teba usu nigi pai elalubao.
Te boi bidi dabego te wiegi yai ni wain me,
te nago gasa ni dabe me dolaibao.
33 Te Moapgo tǫde wiegi yai nai hauwa pedalubaso,
te bidi dabego te nai siyu, wiegi yai pemene yai.
Tiali goli, te wiegi yai pemene elama,
gisugu wabo kolesaga te silaibao.
Eno te tama tilama, te wain du agabo masigi poude te
wain augwaligo munu ma nigigobeo.
Augwa te i olama, pemene eyu,
te wain agabo sę yali me egobeo.
Mu tama, te augwa i weyu da yaibao,
tiali goli, te augwa pemene elama, i me wagobeo.”
34 “Te Moap dabe dwai gela waibao,
te taun Hesbonde gagalasa pelama,
te taun Eleale, me taun Jahas, te notba usu nigi
paibao,
tama te taun Soarde gagalasa pelama,
te taun Horonaim, me taun Eklat Selisia, te sautba
usu nigi paibao.
Magi baso meni, te tama kantri tǫ dolaibao.
Tama me, te wę Nimrim tigidali mu sula saibao.
35 Ena Genuai Bidigo eno po dolo obao,
eno te Moap dabego te bulu duba holama,
te lotu wagilu, te wiegi yai denami yai ofa dabe ebo
pesage,
me te augwa gasa godiba lotu wabo pesage,
tigidali dolaibao wai dao.
36 Tibaso, eno te Moap, me te taun Kirheres we bidi,
augwaliba homu dene mu ebao.
Eno hobede ebo te bidigo genuai hobede elalu,
te ona elibo tiwai yai.
Te Moap dabego sali wiegi yai nai tigidali hagawaibao.
37 Augwa homu dene mu elama,
augwa tobolu nisi me penane nisi poawaibao.
Te augwa nogo dabe togoyu elama,
te hobede ebo ugwa gudaibao.
38 Ena Genuai Bidi, eno te kantri Moap
dolaibao, te bidigo te sę meni yai te tǫgo nigai
sospen dabe alubo tiwai yaibao.
Te Moap habu tigidali badu,
te genuai gela u wabo pedelaibao.
Te augwa bede ugwadu bidali me,
bidi sisinibo pesagede bidali me,
tagalao, tigidali te gela wabo umabo mu yaibao.
39 Mu tama, Moap tigidali mu togwa pelama,
te we bidi augwali dwai gela waibao.
Moap da, te dwai hale mu ebo bidigo aga gesabidi halua
sabo tiwai gilama yaibao.
Te Moap pąde bidali hani dabe
augwaligo te sę dabe te Moapba pedalubo sulama,
te augwali wi dwai mu elama,
te Moapba posobo po waibao,”
Genuai Bidigo te po wali.

Te dolobo sęgo Moap me geda mugobeo

40 Genuai Bidigo te tiwai po wali, “Suao. Te boi bidi
dabe umagia udayu, te Moap dolainogo ebao,
te ba kemodagego te hasa bolo elainogo ebo tiwai
yali,
te tobolu nisi diligina pelama,
te aga bogo nisi diligina pabo tiwai ebo dao.
41 Te boi bidi dabego te taun dabe me,
te bomo elama, boi hwįbo pesage me saibao,
tama te sogo te Moap ami dabe wi elama,
homu si yaibao, te we dabe augwali te wai
ame nainogo ebo sogo tigi dene ebo tiwai yaibao.
42 Moapgo Genuai Bidi ena dali hagoma ebaso,
te Moap mu dolaibao,
te Moap hani da, te munu me bidigobeo.
43 Ena Genuai Bidi, eno po dolo obao,
te bidi wi ilibo nai dabe me,
te genuai tǫ dedage me,
hagani mubo wa dabe te elalubao,
te Moap we bidi dabe dage dolabo nai dabe dao.
44 Te bidi wi ilibo naide te bidi me deli wi pobaso da,
teda aga te genuai dedageba tulalueibao.
Te aga dedage tagalama, te buluba teda holobo si da,
teda aga te hagani mubo wago tola saibao.
Ena Genuai Bidigo te Moap dabe dage dolabo sogo
bodolu te tama muai,
tama tiyu, eno dage doalibao,” wali.
45 “Te Moap we bidi dabe te boi bidi dabede wi elama,
te taun Hesbonba geme duala sigi painogo yali.
Tiali goli, menio.
Augwaligo te Hesbon sia dabo suai,
te polobadu te king Sihon bidali sogo sia dali tiwai
yai.
Tama augwali te taun tomoba pabo usu meni yai.
Augwaligo te mena sę yabo bomo me elalubeo.
Te siago te kantride elaluali nai tigidali dela silali,
te bulu kantri dąįde elalubo,
ma te hwįbo bidi dabego bulu du ugwadu elaluali me,
te tagalao, te siago dela silai dao.”
46 “Dage Moap, dagede hobede mu ebao.
Dage te tibo god Kemosgo we bidi,
dagego bomo te hagawalio.
Te boi bidi dabego dage pageabi elama, te dage selama,
te gasa kantriba kalabus igi paibao.”
47 “Tialima, te nosali sogode eno te Moap wiegi yai
ma pedalumainu yaibao.
Ena Genuai Bidi, eno te po walio.”

Genuai Bidigo te Moap bage dagalabo po tigidali wali, te silali dao.

Copyright information for `MPS