a[Ese 13:10]
b[Jer 8:10-12]
c[Mt 11:29]

Jeremiah 6

Te boi bidi dabego te Jerusalemba hwįagasali

Genuai Bidigo te po wai,

“Dage Benjamingo hani we bidi, dagego te
Jerusalem tagalama wi pao.
Tiyu dage dolabuo.
Dagego te Tekoa taunde te bu wabo nai biugel bu weyu,
te plak te bulu Bet Hakeremde ugwaba siąo,
te bidi dabego te biugel bu wabo odoyu,
te walobo plak sulama,
te augwali wi pao omainao.
Magi baso meni, te dwai nai mu te not badu tagalama
asiyu,
te dage mu dolainu ebao.
Taun Saion te tigi dene ilibo sę munu me isąwai sawi
yai we mu me deli tiwai te homu wali sesemane
piduali.
Tialima, Genuai Bidigo te taun mu dolaibao.
Te king dabe augwa ami bidi dabe dali aselama,
te Jerusalemba hwįagasainu ebao.
Augwaligo te taun bobegela sagaselama,
te augwa bidabo pesage nigaibao.
Te ami bidi dabe umabo mu te genuai sipsip hani tiwai
dao.
Tama te ofisa dabego augwali tonaluyu,
deli deligo augwa sę yabo madi elaluaibao.
Te ofisa dabego te tiwai po waibao,
‘Dago te boi hwįbo kolesaga sisi ela sinao.
Awe, te hwįbode naga homu kone paluyu, tama tinao.
Tegoba, da te giliga tomode mu te belo wabode
hogodama, augwaliba hwįgi paibao.’
Te nosali augwa te tama po waibao,
‘Hobede ya, te dago sisi isąbadi te be hulibao,’ po
waibao.
‘Tagalao. Augwaligo augwa digi seselalumainogo eyu,
augwaligo te masigigo nigai boma pai genuai be
dabe elaluali goli, dago hulide pelama,
te be dabe dolinao,’ te po waibao,” wali.

Tigidali Bomo Elalubo Genuai Bidi, agai te po wai,

“Dage ami dabe, te Jerusalem pąde ni dabe togolama,
te tǫ dabe dali te bobobage obo pąde pesage holao,
te daide dolalu, te taunba hwįagameo.
Te taun aga dwai dene umabo somainao,
magi baso meni, te taunde we bidi dabego te
augwaligo abagi dabe dolobo sę mu ebo dao.
Dwai kolesaga sesemane te Jerusalemde pedalubao,
te ulu wę sesemane sogo pedalubo tiwai ebo dao.
Tama augwaligo te taunde doado bage dolama,
te gasa we bidi dabe eliyu ebao,
te eno suali, te bage hobedagia te keni eyu gasi me
elalubo dao.
Jerusalem, nago po odao.
Te meni baso da, te eno nage tudiba muaibao.
Te eno nage te olo bulu pesage tiwai pedalumainu ilama,
te nagede bidi deli me bidibo usu egobeo,” wali.

Israel dabego hagoma mu yalio

Tigidali Bomo Elalubo Genuai Bidi, agai enabolo e tama po wali,

“Te boi bidi dabego te Israel hani me badu elaluali
te mu silaibao,” wali,
“te bidi dabego te wain giba pelama,
te hasia tagalali wain du tigidali sabo tiwai yaibao,”
wali.
“Te hasia nage bolo pelama,
te po Jerusalemba pusugi pao,
te bidi wain giba pelama,
te wain du deli deli elalua pali te gegegi pabo tiwai
yao.
Te bidi deli deligo nago po odomainu homu yao.”
10 Tialima, eno tama po wei ponani,
“Genuai Bidi, eno te nago po deba pusaibawe?
Tama dego eno po odogowe?
Augwaligo olo te mu palia sali.
Augwali tego Godigo po odisąbo hani bage tiwai elama,
te nago po odobo hagela homu ebao.
Augwaligo homu nago po te augwali hale ilibo po dao,
nago po te olo bage te dwai nai tiwai ebao.
Augwaligo tede wiegi yai homu pemene me ebeo.
11 Tiali goli, Genuai Bidi,
nago augwaliba dene mabo haliga sębę enade me
pągąnalubao,
tama eno homude te dene mabo haliga sębę te palia
saiba homu ebaso, usu egobeo.”

Tialima, Genuai Bidigo enabolo e tama po wai,

“Eno te haliga sębę ebo eno te sunumi dabe bidalubo
wai puluba dabeba gea paliyu,
te gesi bidi dabe sisinaluboba me tiao.
Te bidi dabe augwa we dabe dali, me te monu dabeba
me, eno te haliga sębę gea palao,” wai dao.
12 “Eno te tǫ kantride bidibo we bidi dabeba
te dwai dene sabo sęgę mawaibao,
tama eno te gasa hanigo te be dabe,
me tǫ, me we dabe somainogo yaibao,”
Genuai Bidigo te po wai.
13 “Tigidali we bidigo te dwai kolesaga haniani eyu,
te mone hauwa sabo homu eyu tama tiali.
Te olo bidi dabe me, genuai bidi dabego me
te kolesaga naga wali pali.
Te pris dabego me, te profet dabego me
te we bidi tibo po ola mayu yalio.
14 Eno we bidi dabe te genuai keni elaluali,
tiali goli te pris dabe me profetgo te keni sulama,
te olo nai tiwai sula tagaliyu,
te augwaligo bugagia marasin me mubeo.
Augwaligo te tama po te we bidi dabeba weyu,
‘Dagego moni homu me igio.
Da bugagia bidibao.’ Tialima, menio.
Augwa te bugagia me bidibeo.” a 
15 “Te Israel dabe augwa te kugumini yai kolesaga
ebode te hale me yaliwe? Mu menio.
Augwa hale dwasianu me ebeo.
Augwa te tobage dwai sę ebo kolesagade ge neyu,
hale me ebeo.
Tama tibaso, te eno augwaliba dwai dene mayu,
te augwali mu dolaibao,
te gasa hani dabe dolo tiwai yaibao.
Ena Genuai Bidi, eno te po wai dao,” wali.
b 

Te Israel dabego Genuai Bidigo po wali pabo homu hagela yali

16 Genuai Bidigo aga we bidi dabeba e tama po wai,

“Te dagego mena sunumi wali pabo homu ebaso da,
te bugagia homu kone palao.
Dagego te duga wąį nǫų dabego wali te wiegi yai
sunumi gegao.
Te dagego me te sunumi wali pobaso,
tama te nai dabego dageba sęgę masiąyu,
te duga haliga te toma nomainu ilao,” wali.
Tialima, te Israel dabego te po wai,
“Dago te sunumi wali me pogobeo,” wali. c 
17 Tama Genuai Bidigo te po wai,
“Eno te dage tau sabo tonalubo bidi nigilai dao.
Tama eno te po wali,
te sęgę pedelainu ebo sogo augwaligo te bu wabo
nai biugel bu wai da obaso da,
teda dagego bugagia odaluiąo.”
Tialima, augwa te po wali,
“Dago te tonalubo bidi dabego po me odogobeo,”
po wai dao.
18 Tialima, Genuai Bidigo te po wali,
“Dage gasa hani we bidigo, odiąo.
Dage sisinagasobaso,
te eno dagebolo eno te Israel dabeba yabo sę dabe
po walaibao,” te po wali.
19 “Tǫ, nago me odao.
Eno ena te we bidi dabe dolainu ebao,
te augwa yali dwai sę wei ponainogo ebao.
Magi baso meni, augwaligo eno po sela sąyu,
te augwaligo eno bomo yai po wali me pabeo.
20 Augwali te Sabea hani bidi dabeba pelama,
te wiegi yai denami ebo hano yabo pauda
abeligi pali.
Tama augwa te tobage awi te wiegi yai denami ebo nai
abelali,
te digibulu bidi dabede abelai.
Augwaligo homugo te nai dabego te augwa lotu wabo
te wiegi yai eno gedude pedelaibao homu eyu tiali.
Tialima, menio.
Tama me, eno te augwaligo siaba ulama
tigidali domainu ebo ofa,
me te gasa ofa dabe augwaligo enabolo ebaso,
te eno wiegi yai homu pemene ebo menio.
21 Tialima, ena Genuai Bidi eno te po obao,
eno te we bidi dabe tulalumainu yaibao.
Te augwali mu dolaibao.
Te aya dabe augwa wai puluba dali isaibao,
tama te we bidi dabe te augwa hai namu dabe dali
isiyu,
te augwa abagi dabe dali isaibao,” wali.

Te boi bidi dabego not badu bidali tagalama, asaibao

22 Genuai Bidigo te tama po wai,

“Suao. Te ami bidi dabego te not badu pedai tagalama,
asaibao.
Augwali te bomai hani mu te augwali digibulu mu bidai.
Tialima, megi da, augwa te hwįbo doado bage sisi ebo
sę ebo dao.
23 Augwali te gasa bidide homu dene eyu,
olo tau saibao homu ebo bidi dabe me menio.
Augwaligo te gasa bidi dabe dolobo godolo homu ebo
bidi dabe elalubao.
Augwaligo te enesigi me ene tolalubao.
Augwa te hosde dugulasa asaibao,
tama te hos dabego sągą bada genuai wabo te
nambisde genuai tamu ąį gisigi asobo tiwai yaibao.
Augwa te lainde wasilama,
te nage, Jerusalemba hwįabo sisi elalueibao.
Hobede ya!” wali.
24 Te Jerusalem we bidi dabego te tiwai po wali,
“Dago te boi bidi asabo po sabilibo po odolama,
te da wi eyu, te dago nogo sągą dili kimi meni ebao.
Da hobede mu elama, dwai dene mu ebao,
te wego aga wai ame nainu ebo sogo
te genuai tigi dene ebo tiwai gilama ebo dao.
25 Te boi bidi te dwai bidi dabe mu,
tama augwali te tigidali habu usu nama bidiyu,
te da dali hwįainu sisi elalu, te da wi ilibao.
Tialima, da te gi dabeba munu me pisąma, te sunumi
dabeba me biligi pigio,” wali.
26 Tialima, Genuai Bidigo te po wai,
“Dage eno we bidi dabe,
dagego te homu dene ebo ugwa dabe gudulama,
te sia kelide pila mudu bebegeliduao.
Dagego genuai gela weyu, hobede ebo tęąbi wao,
te aya ida wai deli naga elaluali,
augwa te wai isibo sogo homu dene ebo tiwai yao.
Magi baso meni,
te polo mu tama te boi bidi dabe dageba pedeliyu,
te dage dolaibao,” wali.

Te we bidi dabe dwai silva tiwai dao

27 Genuai Bidigo te tama po enabolo wali,

“Jeremaia, eno nage te wiegi yai kapa silva dagalabo bidi
tiwai nigilai dao.
Tama eno we bidi da, te silva tiwai dao.
Te eno nagebolo sę mani, te eno we bidi usu selama,
te augwa kolesaga dagalomainogo yali,
te bidigo silva te siaba ulubo tiwai elama,
te usu selama koneainu yai,
te silva mu yaliwe koneainu tebo dao,” wali.
28 Tialima, eno e tama po wei ponani,
“Augwali te hagoma elama, po sela sąbo we bidi,
te augwa abagi dabeba posobo po wabo dao.
Augwaligo kolesaga tigidali te dwai naga elaluali.
Augwali te ain hogomu pobele bage pedalubo tiwai,
te sę bidi dabego te silva siaba ulama,
usu sabo sogo te hogomu pedalubo tiwai ebo dao.
6:28Te bidi mebago homude te lain 28-30 tede wali pode te Genuai Bidigo te Jeremaiabolo lain 27de pusali pode te po dage wadoasa pusali homu ebo dao.

29 Masingo te sia ponobo sę ebadi,
te sia posolo umagia mu pedalu, te silva ulama,
tede daganalubo ain hogomu sela sąwainu tiaibao.
Tialima, te sę bidi dabe odolali sę dene yaibao.
Siago te ain hogomu daganalubo me sela sągobeo.
Te tiwai te dwai kolesaga ebo bidi sela sąbo sunumi
meni yaibao,
te nago we bidi dabe te wiegi yai ma pedalumainu ebaso
usu egobeo.
30 Augwali te dwai tagalabo silva tiwai naga elaluali,
magi baso meni, nage Genuai Bidigo,
nago augwali tudiba muai dao,” eno te po wali.
Copyright information for `MPS