b[Mt 21:13; Mk 11:17; Lu 19:46]
d[Jos 18:1; Tib 78:60; Jer 26:6]
e[Prs 18:21; 2 Kin 23:10; Jer 32:35]
f[Jer 16:9; 25:10; Ped 18:23]

Jeremiah 7

Genuai Bidigo be tego te Juda hani we bidi wiegi yai bidimainogo ebo usu egobeo

Genuai Bidigo Jeremaiabolo te tiwai po wali, “Nage pelama, ena Genuai Bidigo tempel be sunumiba doligi pelama, tama eno po te enaba lotu wagi soyu tomoba soabo te Juda dabeba pusao. Nago augwaliba te po weyu, ena Genuai Bidigo poba olo bugagia muao po wao. Eno po e tiwai dao. Ena duga Israelgo God dao, ena te Tigidali Bomo Elalubo Genuai Bidi, eno po obao, dagego duga bilibo, me duga kolesaga dolasa elalubaso da, teda eno dage te duga bulu tǫde bugagia bidimainu yaibao. Sesemane sogo augwaligo te tiwai po dageba obao, ‘Te da, te Genuai Bidigo be dao. E da, te Genuai Bidigo be da. Te e be da, Genuai Bidigo be dao,’ po wabo dao. Tialima, dage te homu igimio, te bego dage wiegi yai bugagia ilama bidaibao homu igio. Tiyu, duga digi duga tibo po ola mabo dao.
7:4Tede wali po tiwai tobage po te Tib 132:13-14, tede me te we bidigo te po elalubo homu ebao, te augwa homugo te Genuai Bidigo be te Jerusalemde elalubao homu yali, tama tialima, sesemane sogo Genuai Bidigo te Jerusalem tonalubo da homu yai. Agai te dwai nai dabe te Jerusalemba, me tede bidibo te we bidi dabeba dali, me pedalumainu iligobe da homu yali.
Dagego bilibo me ebo kolesaga bugagia dola sao. Te dagego duga abagi dabeba doloba pai kolesaga yao. Dagego te gasa tǫ kantri bidi dabe duga dali bidibo te aiyaba elalugio, te wai dabe, augwa aya isai, te wilawe we dabe, te augwaliba tama kolesaga igio. Tama te duga tǫ kantri te we bidi dabe odolali me ela mugio. Te dagego tibo godiba lotu weyu, te duga digi dolamu dao. Te dagego eno te tobage po tigidali wali pobaso da, teda dage eno te duga wąį nǫų dabeba mani tǫde bugagia bidimainu ilama, te augwa hani dabego tǫ sesemane elalua pomainu yaibao,” te po wai.

“Dagego te tibo poba homu dąų wabo dao. Tialima, te pogo dage tau me sogobeo. Te dagego nai wi siyu, te bidi dabe ela muyu, te penani sę ebo kolesaga te bidi dabe me bidigo sai we dali eyu yali. Te dagego bomai po dąų wabo sogo te tibo po obao. Te dagego wiegi yai denami hano ebo ofa te tibo god Balba ebao, te dagego polobadu lotu me wasiąwai tibo god dabeba lotu wabo dao. 10 Dagego te tama kolesaga dabe ela selama, tama dagego te enaba lotu omainu, te dąį ilali be tomoba dage asobao. Te dage ena pageba asiyu, dagego te po obao, ‘Da bugagia bidibao,’ wali. Tialima, te nosali dagego eno be tagalama, te dage peyu, te kugumini yai kolesaga umabo igi pobao. Dagego homugo te wiegi yai kolesaga da homu eba, agawe? 11 Eno te be sa muyu, dąį ilali, te dagego enaba lotu omainu yali. Tialima, dagego homugo te nai wi sabo bidi geme dula sigi soabo pesage da homu eba, agawe? Ena Genuai Bidi, eno po dolo obao, eno te dagego ebo kolesaga tigidali subo dao.” b 

12 “Dage te Siloba pelama, eno te taunde yali sę suao. Hasia eno te Silo dąį ilali, te enaba lotu wabo pesage elalumainu yali, tiali goli, nosali eno suali, te Israel dabego dwai kolesaga ebaso, eno te taun dolai dao.
7:12Te Josua bidibo side, te Israel dabego Genuai Bidigo ugwa be te taun Silode sęani (Te Jos 18:1 tede suao). Te ugwa be te Silo taunde te pris Eli bidali sogo elaluali (Te 1 Sml Dąį 1-3 tede suao). Tialima, te sogo te Filistia dabego te Israel dabe aiyaba elaluali (Te 1 Sml 4 tede suao), tama augwaligo te taun Silo dolali homu subo tiwai ebao, tama nosali te taun te olo naga mu tama elaluai dao.
13 Te megi me, dagego te tobage dwai kolesaga ebao. Hauwa sogo eno dagebolo te dwai kolesaga tagalao po wali, tiali goli dagego te po odobo hagela yali. Te eno dageba i wabo sogo, dagego eno i wabo wei ponobeo. 14 Mu dao, eno te tempel be dąį ilali, te dagego enaba lotu weyu, te dagego konealubo homugo te bego dage tau selama, bugagia bidimainu homu yali. Tialima, ena, Genuai Bidi, eno po dolo dagebolo obao, eno te be dolaibao, eno te Silode ena te be dolali tobage kolesaga tiwai yaibao. Tama me, te eno duga wąį nǫų dabeba mani tǫ me dolaibao. d  15 Tama eno dage sela sąwaibao, eno te Israel dabe sela sąwani tiwai yaibao, te duga deli hani dao. Te dagego ena tagaliyu, te eno dage munu ma sugobeo,” wali.

Israel dabego Genuai Bidigo po sela sąwai

16 Genuai Bidigo po ma weyu, te tiwai po wali, “Jeremaia, nago gedu haluasa po enaba me wagio, te we bidi dabe tau somainu. Nage te gela weyu, te enaba bomonama i me wagio. Magi baso meni, eno nago te gedu haluasa po wabo me odogobeo. 17 Te nago te kolesaga augwaligo te Juda dabego taunde ebo, me te Jerusalem sunumi dabede ebo susąyu eba, agawe? 18 Te wai pulubago nogąbo sia sisinibaso, tama te aya dabego sia nogoyu, tama ida dabego te bisket nigabo plaua begelaibao, tama augwa te bisket dabe te nogi ebo tibo god weba ofa ebao, te nogi Dagalude Kwin dao wali. Tama me, augwa te haniani godiba wain gelebo sę me ebo dao. Te tama tebo dwai kolesagade augwaligo te ena sębę ilainu ebo dao. 19 Tialima, ena Genuai Bidigo, eno te po obao, augwaligo te dwai sę enabolo me ebeo. Te augwa digi dwai sę ebao, augwa te ebo kolesagade augwa hale dwai mu saibao. 20 Te ena God Genuai Bidi, eno te tama po obao. Eno haliga sębę dwai mu eyu, te tǫ kantriba me, te we bidiba me, te tubo kibu hasa me, te ni dabeba me, te naiba me dwai sę mu yaibao. Eno haliga sębę te genuai sia dabo tiwai eyu, te bidi mego sula sąyabo usu me egobeo,” te po wai.

21 “Ena dage Israelgo God, ena da Te Tigidali Bomo Elalubo Genuai Bidi, eno te tiwai po obao. Te dagego te tigidali siaba ulama domainu ebo ofa enabolo mobadi goli, te tagalao. Te duga digi te ofa ebo nai mi tubao, te dagego gasa ofa ebo kibu mi tubo tiwai dao. 22 Te eno duga wąį nǫų dabe te Isip bulu tagalama, odasa asali sogo, eno te tama po augwaliba weyu, te siago tigidali domainu ebo ofa yao po naga me wasiąwai, te tobage gasa ofa dabe me yao po naga me wabeo. Menio. 23 Eno augwaliba te tiwai po me wali, ‘Dagego eno po wali asobaso da, te ena dagego God bidiyu, te dage eno hani we bidi bidaibao. Te eno dagebolo te wali pao po wabo kolesaga tigidali, te dagego wali piąo, tama te dage bugagia bidaibao.’ 24 Eno te tama po wali, tiali goli, augwaligo te po odama, te augwaligo wali me pabeo. Augwa te dwai kolesaga naga yabo homu elalu, te augwa hagoma eyu, te augwa homugo digi ebo sę wali piduali. Tama te ebogo augwali tau me sabeo. Menio. Augwa digi augwa aiyaba elalubo sę yali. 25 Te duga wąį nǫų dabego te Isip tagalama asali sogo, tede gagalasa, te megi e sogoba usu nagasobao, eno sesemane sogo ena sę bidi dabe tagala palobo sę idubao, te profet dabe, te augwali aselama, te po dageba pusagasobao 26 Tialima, dagego hani dabego eno po odolama, wali me pabeo. Menio. Augwa te dwai hagoma naga eyu, te dwai kolesaga hauwa eyu, te wąį nǫų dabego yali dwai kolesaga aiyaba elalubo dao.”

27 “Tialima, Jeremaia, nago te po tigidali te Israel dabeba pusao, tiali goli, augwaligo te po me odogobeo. Nago augwaliba i udao, tiali goli, augwaligo nago i wabo wei me ponogobeo. 28 Te nago augwaliba te tiwai po wao, ‘Te dage hanigo te Genuai Bidi, duga Godigo po wali me pisąyu, te Godigo augwali dodolomainu me ebeo. Augwaligo te mu po wabo kolesagadu munu me wali pabeo. Augwaligo te kolesaga mu tagalobo dao.’ Te po wao,” wali.

Te bulu odogo Hinomde bidibo we bidi augwaligo dwai kolesaga yali

29 Jerusalem, nago naga tobolu nisi togola sąyu, te nago hobede ebo ola mao. Te nage bulu duba holama, te hobede ebo tęąbi wao, magi baso meni, te nago we bidi dabego te Genuai Bidi haliga sębę dwai mu ilibao. Tama tialima, Genuai Bidigo te hani we bidi dabe homu godolo munu me isiąma, te augwali tudiba muai dao. 30 Genuai Bidigo te tama wai, “Te Juda dabego dwai kolesaga hauwa eno gedude yali dao. Augwaligo te kugumini yai tibo god noma piksa dabe te augwaligo enaba lotu omainogo eno sa muani be tomode te tibo god piksa noma dodolama lotu wali. Te tama tebo kolesagade te be eno gedude meda ilibao. 31 Augwaligo te lotu wabo pesage nigali nogi Tofet poali, te Hinom Odogo Bulude nigali. Te augwaligo augwa wai puluba dabe digi te isiba ulali, te tibo godiba ofa tiwai yali. Tialima, eno augwaliba te kolesaga yao po me wabeo. Tama me, te eno te tobage bomai po dageba maiabo homu munu me ebeo. e  32 Tama tibaso, ena Genuai Bidi, eno te po obao, nosali te augwaligo te bulu nogi munu ma nogi isąyu, te Tofet ma Odogo Bulu Hinom wagobeo. Menio. Te augwaligo te tiwai nogi yaibao, te bidi hauwa ela muai pesage dao waibao. Magi baso meni, te boi bidi dabego te Juda we bidi hauwa ela muaibao. Tama te Tofet te Juda dabego gų page bulu pedelaibao, tama augwaligo tigi te pesagede pągąnalueibao. 33 Te tigi hauwa tǫde olo munalua pobadi, te ba sibigo me hasa sibi aselama, mi tuagasaibao. Tama te ba dabe me hasa dabe aselama tubadi, te sela sąyabo bidi meni yaibao. 34 Te Judago taun dabede te we bidi dabe me bidisiąyu, te Jerusalem sunumide me bidigobeo. Eno te tigidali sę pedalumainogo yaibao, te bugai haliga wiegi yai homu pemene ebo kolesaga, me te we sabo sogo genuai nai daa tubo dabe me, te dabe tigidali silaibao. Tama te tǫ kantri tigidali pedai badu dolama, olo elalueibao,” wali. f 

Copyright information for `MPS