a[1 Ko 1:31; 2 Ko 10:17]

Jeremiah 9

Idao! Te eno tobolu te ulu wę me deli tiwai
elaluyu,
tama te eno gedu sidu te ąį hauwa geligi da,
teda eno homu dene dwai mu eyu,
gela wabo usu igi da.
Te eno giligade me hulide gela udigi da, magi baso meni,
te boi bidi dabego te eno hanigo we bidi dabe
ela muai dao.
Te olo masigi kemi tǫde te eno bulu tolu yabe be
me deli elalugi da, te wiegi yai igi da.
Teda ena te hani bidi digibulu taga pelama,
ena te beba bidigi pabo usu igi dao.
Magi baso meni, tigidaligo God tagalali,
te bidigo aga we tagalama,
te gasa penani we dabe wali bilibo tiwai ebao.
Tama augwali te nai wi sabo genuai tiwai dao.
Genuai Bidigo te tiwai po wali,
“Sesemane sogo eno we bidi dabego te tibo po wabo
sisi elalubo tiwai eyu,
te bidigo enesigide te ene nanalubo tiwai ebao.
Te mu po wabo kolesaga te augwaligo tǫ kantriba
genuai pedalubeo.
Te tibo po wabo ugwaba ela holalio.
Augwaligo te haniani dwai kolesaga umabo mu

ela pidubadi,
te augwa konealubo homu enaba me mubeo.”
“Dage we bidigo te duga abagi dabede
bugagia osola suao,
tiyu augwaligo dageba posobo po wabuo.
Te duga ama dabego poba homu kęą pigio,
magi baso meni,
tigidali amago te gaga munubo sę te Jekopgo yali
tiwai ebo dao.
Tigidali bidigo te augwa abagi dabe tibo po
ola mayu ebao,
te mena bidi me deligo te mu po me wabeo.
Te augwa tibo po wabo te konea selama,
te augwa homu me begelisiąma,
te augwa haniani dwai kolesaga ebo me tagalogobeo.
Te we bidi nage augwali tomode bidibo bage,
augwaligo te gasa bidi aiyaba elalubo sę bomo eyu,
te tobage tibo po wabo kolesaga eyu ebao.
Tama augwa te ena Genuai Bidiba homu kęą pabeo,”
Genuai Bidigo digi te po wali.
“Tama ena, Tigidali Bomo Elalubo Genuai Bidi,
eno te po obao, suao, te eno ena te we bidi usu
saibao,
te bidigo silva te siaba ulubo tiwai eyu,
te silva aga hogomu pobele bage sela sąbo tiwai
yaibao.
Te eno we bidi hanigo dwai sęgę sabo sę ebaso,
mena gasa sę eno augwaliba yabo me elalubawe?
Menio.
Augwaligo wabo pogo te augwa abagi dabe dolaibao,
te bidigo bidi ela muabo ene enebo tiwai ebao.
Augwali te tibo po wabo bidi dabe dao.
Te augwa pedauwalide te augwa abagi dabeba
dwagi yai po obao,
tiali goli, te haligade augwaligo te augwali
dolabo homu ebo dao.
Mu tamao, eno te we bidiba dwai dene mawaibao,
augwa te yali dwai sę wei ponaibao.
Ena Genuai Bidi, eno te po wai dao.”
10 Tialima, ena, Jeremaia, eno te bulu du dabe,
me te kala elaluali pesage dolali,
tede homu kone ebao, tama ena dwai gela weyu,
hobede ebo balia obao.
Te pesage badu te bidi munu me bilisiąma,
te bulmakau dabe te kala pesageba te nosai me tugi
pogobeo.
Te ba dabe me hasa dabe wi pela siliyu,
te pesage taga pai dao.
11 Genuai Bidigo te po wali, “Te eno Jerusalem dolama,
te masigi pesage holali naga elalueibao.
Tama te uni yowi dabego pesage pedelaibao.
Tama eno te Judago taun tigidali dolama,
te taun dabe olo elalu, te bidi meni yaibao.”

12 Tialima, ena, Jeremaia, eno te po obao, “Magi baso te tǫ dolama, tama te olo masigi kemi pesage elalu, tama tede bidi me bidibewe? Mena wiegi yai homu kolesaga mu yai bidigo aga te sę yali page konegowe? Genuai Bidigo mena bidibolo te po pusulama, tama te bidigo te sę yali page te we bidiba pusugowe?” 13 Tama Genuai Bidigo te tama po wei ponani, “Te sę page e tiwai dao. Te we bidi augwaligo eno augwaliba mani bomo yai po wali pisąma, tama augwa eno po sela sąwani, tama eno augwaliba ola mani sunumidu te augwali pabeo. 14 Augwa hagoma mu elama, augwa homu wali pali. Te augwa te god Balba lotu wali, te augwa wąį nǫųgo ola mayu, te sę yao wali ebo sę tiwai yalio. 15 Tama ena Israelgo God, ena Tigidali Bomo Elalubo Genuai Bidi, eno po dolo obao, eno te we bidiba genuai dene mawaibao. Te eno augwaliba te ha ebo doanai te augwa pedauwaliba munama, te augwa tumainu tiwai eyu, te eno augwaliba te dwai marasin menama, te augwa tubo tiwai emainu yaibao. 16 Te eno augwali ela gudulama, te augwa gasa tǫ kantriba tedela pelama, bidimainu elama, te augwa wąį nǫų dabe me, augwali me, te polobadu pisąwai bulu tǫba paibao. Te eno digi te bidi dabego augwaliba boi bidi eyu, te augwali ela mumainu yaibao, te tama tede pidubadi, te tigidali isila siliboba usu naibao,” te po wali.

Te Jerusalem dabe hobede ebo gela wali

17 Tigidali Bomo Elalubo Genuai Bidigo te tiwai po wali,

“Dagego te dugaba pedalubo te sęde homu kone
bugagia palao.
Tama duga te hobede ebode te tęąbi mu koneai
we dabe i olama,
te augwali asomainao.”
18 Tialima, te we bidi dabego te tiwai po wali,
“Awe, te augwali polo asesą aselama, te daba hobede ebo
tęąbi wagasomainao, te da gela umagia weyu,
te dago gedude gela guai tulaluyu,
te dago gesabidiba dulumainu yaibao,” te po wali.
19 Te Saionde te we bidi gela weyu,
hobede ebo tęąbi te tiwai wali,
“Hobede ya, da mu dobao.
Da hale dwai mu ebao, magi baso meni,
te boi bidi dabego dago be dabe dolalio,
tama dago dena tǫ dabe tagalobao,” wali.
20 Dage Jerusalem we dabe,
Genuai Bidigo po enaba dageba po pusao wali,
tama dagego agai poba olo bugagia muao.
Dagego duga wegi dabeba te hobede ebo tęąbi wabo
kolesaga ola mao.
Tama dage we deli deligo te hobede ebo tęąbi wabo
kolesaga te gasa we dabeba ola mao.
21 Magi baso meni, isibo daba pedelalio,
te dago be sunumidu tomoba asali.
Te da genuai bidigo bede bidibadi me,
ma te olo bidigo bede bidibadi me, te tagalao.
Te isibogo da me ela soagobeo.
Isibogo te wai puluba sunumide gagali idubo,
me te gesi ogwa bidi te bidi sisinibo pesageba
sabolama, te isaibao.
22 Te isai bidi dabe tigi te tǫde wilalua paibao,
te yowigo di tiwai elaluali,
tama te gide wit dunu pali tiwai elalua paibao.
Te augwali sisinabo bidi meni yaibao.
Genuai Bidigo enabolo te po pusao wali.

23 Genuai Bidigo te tama po wali,

“Te po page koneai bidigo aga koneani kolesaga
wiegi yai homu pemene igio.
Tama bomai bidigo aga bomode homu pemene igio.
Te mone bidigo aga monede wiegi yai homu pemene
egio. Menio.
24 Te bidi aga pemene yabo homu ebaso,
aga te nai delide naga pemene yao.
Agai ena Genuai Bidi koneani da homu elama,
wiegi yai pemene yao.
Agai enade e tiwai koneao,
sesemane sogo eno tigidali tǫde we bidi homu
godolo eyu,
te eno wiegi yai doloba pai kolesaga augwaliba
ebo dao.
Ena Genuai Bidi, eno te tobage kolesaga ebode
wiegi yai homu pemene ebo dao,”
Genuai Bidigo te po wali. a 

25 “Ena Genuai Bidi, eno te tama po obao. Te hani bidi dabe te augwa hale ebo tigiwali togobo bidi dabe eno dene ilabo sogo bodolu muai elalu, te kolesaga wali pomainu yali, tiali goli, augwa eno po wali pabeo. 26 Te e bage te Isip dabe, me Juda dabe, me Idom dabe, me Amon dabe, me Moap dabe, me te olo masigi kemi tǫde bidalubo bage me, te augwa gesabi badu tobolu nisi pęwadage sugą sobao. Te hani augwali te Genuai Bidigo po odisąbo bage, te Israel dabe augwaligo me te hani bagego kolesaga wali palio. Te Israel dabe me, augwa hale ebo tigiwali togosiąwai ąǫ tiwai yai dao,” wali.

Copyright information for `MPS