Job 10

Jop aga e tǫde bidibo ula hagela mu yali

Tama Jop agai po genina ma weyu, e tama wali,

“Ena bidibo ena hagela mu polo yali.
Ena isabo goli da.
Tama tibaso, eno te moni sęgę hanilaibao.
Awe, eno homu ha mu eyu,
tama eno te Godide elalubo po dolo pusaibao.
Eno Godibolo e tama waibao,
‘God, nago ena olo dali po tų ela magi.
Ma, nago ena dali wado eyu da,
teda nago eno yali dwai sęgę dolo ola mao.’”

“Mena tama tiali?
Nago homugo naga digi nigai bidi dolobo usu dawe?
Te dwagi yai kolesaga dawe?
Ma, te kolesaga nago bidi dwai dabe
homu dwagi yai ilibo, te dwagi yai kolesaga
dawe?
Ma, nago da bidi tiwai eyu,
tigidali nai gedugo subo dawe?
Nago gedu si te da tǫde we bidigo gedu
naga tiwai elalubo, agawe?
Tama magi yali?
Nage da yali gilama pęwadage sogo bidama, isaibawe?
Ma, meni wida, magi baso nago ena dąį ilama,
eno dwai sęge gegebo sę ebawe?
Nago koneani,
eno dwai kolesaga mu meni.
Tiali goli, nago eno tigide dene mabo sę ebo.
Tama nago koneani, ena nago nogode gasa bidigo
dobola sabo usu meni,” wali.
“Naga digi eno tigi tigidali mu nigai dao.
Tiali goli, megi nago begelama, ena dolobo sę egowe?
Konea, nago ena nigali te bidigo tǫ
sene nigibo tiwai yai dao.
Tama megi da, mena tama tialiwe?
Nago homugo ena tǫ ma gagamainu ebawe?
10 Nago ena, ena idago haligade ame nomainu yai dao.
11 Nago eno tigi dili dali, kigibili po dali si nigaligo
eno tigi bomo elalubao.
Tama nago eno tigi mi dali,
wali dali si te tigi nigilali,
te tigi dili dali kigibili nigimainu.
12 Tama nago ena bidibo ula menama,
tama nago ena wei mu yai dao.
Tama nago ena bugagia tonaluama,
megi da ena me bidibao.
13 Tiali goli, eno koneani,
nago ena tonaluali sogo nago kolesaga polo yali
ena dolainu.
14 Nago ena bugagia mu tonaluai,
eno te dwai sę ebode tagalainu ganama tiali.
15 Ma, eno dwai sę igi sogo da,
teda nago eno tigide sę geninama mu igi dao.
Tama tiali goli, ma eno dwagi yai kolesaga ebaso da,
teda eno dwagi yai homu elama,
ena homu geda pabo homu egobeo. Mu meni.
Te ena sęgęgo ena ma dolobo te ena moni hale mu ebao.
16 Tiali goli, ma ena homu geda peyu,
tama ena homugo ena dwagi yai bidi da weyu da,
teda nago deli sogo mu nago ena pobe asaibao,
te bulu yowi laiongo te hasa dabe pobeasa pelama,
elama, isilibo tiwai yaibao.
Tama nago haniani te bidigo isąbo bomai sę elama,
ena aiyaba elalumainu yaibao.
17 Tama nago haniani sęgę enaba taga palaibao.
Te nago sębę enabolo ola mayu,
tama nago te sębę geninama mu pedalibao.
Tama nago ena dene geninama mu mawaibao,
te ami bidi dabe hauwago ena dali
hwįbo tiwai yaibao,” wali.

18 “God, nago magi baso ena, ena idago
ame nomainu sula tagalai dawe?
Tigi menigi sogo da, ena idago haligade isigi dama,
tama mego ena sugi menima.
19 Te dwagi yai mu igi da,
te ena ida haligade geme isai tigi sogo da.
Tama augwaligo ena gųba
pubaligi pigi sogo da, usu mu igi dao.
Teda te tiwai naga igi da, ena tǫde
pedalisąwai tiwai igi dao.
20 God, nago koneani, ena bidibo
bodolu pęwadage mu dao.
Tama nago ena dene magio.
Nago ena haliga tigi naga me doanu emainu
sula tagalama, tama de ena isaibama,” wali.
21 “Tama nosali da, eno e tǫ tagalama,
nosali da, ena hulia sai buluba mu bidigi paibao.
Tama ena ma asogobeo.
22 Te bulude tigidali nai dabe dolama,
me elalube, subigila mu elalubo.
Tama ula mu meni. Magi baso meni.
Te bulu huli sesabigo halua sai mu elalubo,”
Jopgo te po wai.

Copyright information for `MPS