Job 19

Jopgo Bildatgo po wei ponobo po wali

(Dąį 19)

Jop aga mu dolama, agaduba mu bidali

Tama Jopgo Bildatgo po wei ponoyu,

e tama wali,
“Dagego pogo ena dolama, dene genuai mu te mobao.
Nisu dagego te po tagalaibawe?
Megi da, hauwa sogo mu dagego
ena dolama, aiyaba elalubao.
Dagego ena dali boi hwįagasiyu tiwai yali,
tama dagego te sę ebode hale menio.
Tiali goli, mu tama, Godigo gedude
eno dwai sę me yaibaso da, te da ena sę naga dao,
te dagego sę meni.
Dagego homugo dage dwagi yai bidi dabe dao olama,
ena dwai sę ebo bidi dao homu ebawe?
Dagego homugo e dwai sę eno tigide yaibaso,
eno dwai sę yali dao olama,
dagego ena po tų ela mayu ebo.”

“Tiali goli, dolo koneao, eno dwai sę me ebe.
E sę dabe yali God aga homugo digi yalio,
tama te dolo menio.
Agai ena aga sųgų sabo naide tola salio.
Godigo ena diluai sę mu elama, elalio.
Tama tibaso, eno agai ena taga palomainao olama,
i bomonama mu obao.
Tiali goli, agai eno i wei ponobeo.
Tama agai ena dali doloba pai sę ebeo.
Agai eno sunumi paliali, tama ena pabo usu egobeo.
Tama agai te sunumi hulia selama,
tama eno te sunumi suabo ąǫ ebeo.
Agai eno dwagi yai nogi dolaligo da,
tama megi da, we bidi dabego ena
dwai bidi da homu ebao.
10 Agai ena dolama, te bidigo be
sese mu hųgibo tiwai yalio.
Eno homugo tiali agai ena bugagia
bidimainu tau saibao homu yai dao.
Tiali goli, agai eno te homu sese sela sąyani,
bidigo te sagane ni guda sąbo tiwai yai.
11 Godigo ena aga boi bidi homu elama,
tama ena dali sębę genuai mu yali.
12 Aga boi hwįbo ami bidi dabe tagala palali.
Tama augwaligo ena dolabo sunumi nidigi aselama,
tama eno be bobegela selama,
tama ena dali hwįali,” wali.

13 “Godigo ena ama sologo ena tagalama,
digibulu bidimainu yali.
Tama eno abagi dedego me ena me konebe.
Augwaligo gedude ena gasa bulu bidi ąǫ ebo.
14 Tama ena deli kanemego me,
ena abagi dedego me, ena mu tagalali.
15 Te bidi dabe eno beba me sogo
bidagasiyu yali bidi dabego me,
augwaligo ena mu gegeda palalio.
Tama eno sę we dabego ena konebe.
16 Eno ena sę bidi i wabo dao.
Tiali goli, agai eno i wei ponama, enaba asobo menio.
Eno ena homu dene yabo po aga dali obadi digi, usubeo.
Agai ena homu dene elama, ena suagasobeo.
17 Eno po wabo si da, eno keledu dwai kugumini ebo,
tama ena we mugo ena pagede bidabo hagela ebo.
Tama ena ama solo mugo ena tonobo da,
olo nai tonobo ąǫ ebo.
18 Tega! Ena be nani dwasianu
ogwa dabego ena posobo po olama, ena dolobo dao.
Ena gasaba me hogodasa pabo si,
augwaligo enabolo dwai po wabo.
19 Ena age solo mugo me ena godolo me ebeo.
Tama bidi dabe eno godolo mu yali bidi dabe,
augwaligo me ena tudi ola menama,
ena aiyaba elaluainu ebo.
20 Ena dili pulu hą elama,
ena mu nomona selama, bomo menia pali.
Ena mu dolama, ena mu isabo ąǫ yali.
Awe, pąde mu ena isai dao,” wali.

21 “Dage eno abagi dabe, dagego ena hobede elama,
tau sama. Magi baso meni.
God aga nogogo mu ena elama,
tama ena dolali elaluba.
22 Magi baso dagego ena dolobao,
Godigo ena dolobo yali gilama?
Dagego ena dwai bidibo sulama goli,
magi baso ena aiyaba elaluainu po
hauwa mu haniani po obawe?” wali.

23 “Hobede mu da.
Eno homugo bidi mego eno po buku me
delide asęa po wagi da,
eno po hagaidali weyu, me elalumai igi dao.
24 Eno homugo augwaligo eno po
masigi togolama, asęlama, tede elalumai igi dao.
Tama te po tigidali sogo tede elalumainu.
25 Tiali goli, eno koneani, bidi ena pagede bidiyu,
te ena ma dobola sabo te bidi bidibo.
Tama nosali aga aselama, e tǫde dodolagasaiba.
26 Eno e tigiwali da, hasia dolaibao.
Tiali goli, ena tigiwali dali me bididu da,
teda eno God sueibao.
27 Awe, gasa bidi dabego naga God sugobeo. Menio.
Ena digi me ena God sueibao.
Ena aga suabo homu bomo mu ebao.
28 Dagego e tama wabo dao,
‘Dago Jop po tų ela mabo kolesaga tagalogobe.
Magi baso meni. Te dolali sę page
aga tigide te elalubao,’ dagego te po wabo dao.
29 Tiali goli, dage digi dua dao.
Dagego te tobage pogo Godigo sębę hodolaibao,
tama agai dage dene genuai mu mawaibao.
Tama agai te sę ebo si da, dagego koneaiba,
dwai sę ebo bidi dabe augwali
Godigo po tų eboba sabolaibao,”
Jopgo te po wai.

Copyright information for `MPS