Job 25

Bildatgo sela wabo po wali

(Dąį 25)

Godigo gedude da bidi olo nai tiwai dao

Jopgo po ola silibo si, te Bildat te bulu Suha bidigo po wei ponoyu, e tama wali.

“Godigo genuai bomo elaluyu,
agai tigidali nai tonalubo.
Agai tigidali nai dabe noma selama, wi emainu ebo dao.
Tama agai dagalude elalubo nai dabe
dua bugagia bidimainu ebo dao.
Te dagalude ami bidi hauwa mu,
tama bidigo nedebo usu egobeo.
Tama Godigo ula tigidali we bidibolo mabo dao.
Mena tama da tǫde bidi doloba pelama,
Godigo gedude meda meni yai pedalaibawe?
Dago polua ula genuai subo dao.
Tiali goli, Godigo gedude da, te dwasianunu mu dao.
Tama hǫ dabe me agai gedude dwagi yai menio.
Te mu tama, da bidi agai gedude doloba pai menio.
Da te tǫde dwasianu sawi tiwai dao.
Da te olo nai osogane tiwai naga dao,”
Bildatgo te po wai.

Copyright information for `MPS