Job 26

Jop aga abagi dabego po wei ponobo po wali

(Dąį 26-31)

Godigo bomogo dago homu kolesaga edelai mu elalubo

Megi da, Jopgo Bildatgo po wei ponoyu, e tama hale ilibo po wali.

“Te ogomani nage bidi bomo
meni yai bidi tau sabo bidi yali bogo.
Tama me ma, nage bidi homu kolesaga meni yai bidi
tau sabo bidi mu yali bogo.
Eno odali, nago ola mabo po hauwa mu wali,
te dwagi yai mu dao.
Dego mobogo nage homu hodolama,
te po omainu tau saliwe?”

“Tagala te isai bidi dabe tamu wę dologode
bidibo me, augwali Godide duagobeo.
Augwali Godigo gedude hania mu bidibo dao.
Tama agai augwali tonobo sogo da, augwali wi elama,
noma genuai mu sabo dao.
Godigo dagalu nigiyu, dįnįgįlai elalubo.
Me ma, Godigo e tǫ olo walumainu nigilai dao.
Te magi nai mego e tǫ aga bidibo
pesagede bidimainu tolalubo menio.
Godigo te wę dabe te agai pǫgo bea selama,
elalubo dao.
Te wę sęgę mu ebo dao.
Tiali goli, wę sęgęgo te pǫ alua sabo menio.
Godigo te pǫ aselama, agai sia king
halua somainu ebo dao.
10 Tama agai dąį te tamu ąį bobegelama, elalubao.
Tama te dąį ilali digi da, te ula dali,
hulia sabo dali si deli madi sisinibo digi dao.
11 Te Godigo sębę ebo sogo da, teda te tǫ dali,
dagalu dali si bomona ma posogwa sąnama,
noma genuai mu sabo dao.
12 Polobadu Rahap, te moni hwa gula
tamu ąį hasamani da,
te Godide tobolu gagea pai dao.
Tiali goli, Godigo bomo dali,
aga dwagi yai kolesaga dali sigo pode
Godigo te Rahapgo bomo aiyaba elaluai dao.
Tama agai tamu ąį dua bidimainu yai dao.
13 God aga digi bomai wali tagala palama,
te pǫ dabe sela sąwai dao, tama dagalu
sisi ma yai dao.
Tama aga nogogo digi naga
te bulu hwa gula mani ma isilai dao.
14 Te Godigo nigilama pedelali nai dabe da,
dago sulama konebo dao,
te nai dabede agai genuai bomo dabolo
dwasianunu naga ola mabo dao.
Tama tego dago kolesaga edelebo dao.
Ma, God agai bomo sese dabolo ola magi sogo da,
teda dago mu konegi menigi da. Mu menio.
Dago homu kolesaga agai bomoba
usu nainogo ebaso da, usugobeo, te dęą saibao.”
Te Jopgo te pogo te Bildatbolo po wei ponai dao.

Copyright information for `MPS