Job 30

Jopgo sęgę dabe aga tigide pedelali po wali

Te bidi Jop agai po ma wadoliyu, e tama wali,

“Megi da, te nai meni yai bidigo wai dabe aselama,
ena posobo po weyu, gisugu mayu ebao.
Augwa aya dabe te olo nai tiwai,
te we bidi gedude nai mu meni yai bidai.
Tama augwaligo dwagi yai sę me yabo usu yai meni.
Tama eno te tama tiwai bidi dabe pelama,
te eno yowi dabe tau selama,
eno sipsip kibu dabe me tonalugi pa po wagobeo.
Magi baso meni, augwaligo te sę ebo usugobeo.
Eno augwali suali,
augwali sę yabo bomo meni yai suai dao.
Tama tibaso, eno augwalibolo
eno sę yagasa po wai menio.
Te bidi dabe augwali nai menia sai mu olo sisinama,
tama augwaligo tabi tigi nasi hagede gela obaso da,
teda augwali te bidi meni yai buluba pai dao.
Tama augwali dwasianu dwai nai dabe tede gegai dao.
Tama augwaligo te dwasianu ha ebo ni gudama,
tama te ni sele bono,
me te ni yabe me sese tula silai dao.
Tama augwali be pąba asobo si da,
teda te be nanide bidali we bidigo
hae menama, sela sąsą pai dao,
te bidi dabego nai wi sabo bidibolo ebo
tiwai yai dao.
Tama tibaso, augwali wi pelama, odogoba pelama,
tama masigi gabaloba me tǫ dedageba dabe tama
geme wi duala sigi pai dao.
Augwali bulu tǫ wa pai pesageba pelama,
tama tede elalubo dwasianu ni sili dabe
tomode biliyu,
te bulu kibu donkigo po wabo tiwai yai dao.
Tama augwa tigi posolo ebaso,
augwali te ni dologoba tiwąį madi sisinagasai dao.
Augwali te be nanide we bidi dabego
sese buluba mu gudulai digi,
augwali nai mu meniama, tama augwali nogi
mu meni yai dao,” wali.

“Tama megi da, te bagego ogwa dabego
ma ena posobo pogo balia po wabo.
Tama augwaligo homugo ena olo nai tiwai elama,
augwaligo eno nogi olama, ena mu dolobo yabo.
10 Augwaligo homugo ena dwai olo nai tiwai ąǫ elama,
tama ena subo hagela mu ebo.
Tama augwali enade wi elama,
habu bulu kilasa peyu, ena pąba me asobeo.
Ma, augwali ena pąba asobaso da,
teda augwaligo ena gesabidiba pęsa sąwainu tiaibao.
11 Godigo ena aiyaba elaluama,
tama ena bomo kimi mu tamunanio.
Tama tibaso, te bagego ena dolobo wi munu ma ebe.
Menio. Augwaligo dwai kolesaga ena dali naga yai dao.
12 Te nai meni yai we bidi dabego
enade wi munu ma ebeo.
Augwali ena gesabi dolo badu mu aselama,
ena elama, tama ena sela sąbo.
Tama augwaligo haniani sę elama, ena dolainu ebo.
13 Augwaligo eno sunumi palia selama
ebogo ena wi pogobe yabeo.
Ena dolai polo elalubadi,
tiali goli, augwaligo ena dolobo sę genuai mu ilalio.
Augwa mu da bomo meni yai digi,
tiali goli, augwaligo ena dolobo sę ebo dao.
14 Augwaligo ena dali hwįagasu da,
te genuai hwįbo ami hani bagego
moni hanu bagulali obo aluama, tomoba pelama,
hanu tomode hwįbo tiwai mu ebo.
Te tamu ąį dini holama, saneba buguasa asobo tiwai me
augwaligo enaba asiyu tama tebo dao.
15 Te haniani sę dabe enaba pedelama,
tama ena wi mu ilibao.
Eno genuai nogi olo ni yabe tulalubo tiwai elama,
te waligo sela pabo tiwai yali.
Te ena wiegi yai bugagia bidali sę dali,
te eno wiegi yai nai dabe dali,
te silali, te dagalude pǫ dabe gasaba
sisą sigi pabo tiwai elama,
tama te dagalu olo madi pepeli dilide
elalubo tiwai ebo dao,” wali.

16 “Pąde mu tama, eno bidibo ula mu tama silaibao.
Tama tigidali sogo eno tigi dene naga eyu ebo.
17 Te hulide eno dili tigidali dene eyu ebo,
te enego eno tigide enebo tiwai mu ebo.
Tama te dene me elaludu genama,
tama te dene ebogo ena me taga pabo meni.
18 Te agai genuai bomogo da,
God agai eno tigi gasagi yai ma ilali.
Tama agai ena nogo aligabo dųbo tiwai
bomonama ebaso,
te holobo ugwago dogoni magede kekebo tiwai
ebo dao.
30:18Hibru pogo te po page kuna konebeo. Te po begelibo gasa sunumi me e tiwai elalubao, “Tama te dene ebo bomai mu pedelama, tama ena subigila bebegele pabo sę yali, tama eno ugwa hagawali, te eno dogoni bomonama kekalio.”

19 Tama Godigo ena te pu ąįyana pai madi sąnama,
tama ena te tǫ hogomu olo nai tiwai elalu,
me keli hogomu tiwai mu gagalalio.”

20 “God, ena naga gedude dolaluyu,
tama nago ena tau somainu i obao.
Tiali goli, nago olo tonaluyu naga elama,
eno po waboba olo mubo menio.
21 Nago ena hobede dwasianu eyu,
me olo tau sabo sę me ebeo. Menio.
Nago ena te nago tigidali bomogo
dolaiba homu naga ebo dao.
22 Nago ena te ni yabe tiwai gilama ugwaba
sela sąnama,
waligo tolasa pomainu sula tagalobo tiwai ebao.
Tama nago ena waligo subigila sąsąbo tiwai
tama ebo dao.
23 Eno koneani, nago ena isimainu elama,
tama nago ena te nago nigilali
te tigidali isibo we bidigo bidigi pabo
pesage gų pageba pomainu ebao.
24 Ma, bidi me mu dolobaso, tama tau somainu
i obaso da,
teda bidi mego aga ma elama, aga mu dolaibawe?
Te tama me tegobeo. Mu meni.”
Jopgo te po wali.

25 “Polobadu da, eno bidi dwai dene
sobaso, moni hobede mu yai dao.
Tama eno homu sęgę genuai mu
te nai meni yai bidi dabede yai dao.
26 Eno homugo tiali ena bugagia naga
tigidali sogo bidaibao homu yai dao.
Tiali goli, dwai sogo mugo ena gegali.
Eno homugo ena ulade bidaiba homu yali,
tiali goli hulia sabogo aselama, ena mesega
sagasalio.
27 Tigidali sogo eno homu kone palidu gegeyu
naga ebo.
Tama tigidali sogo sęgę dali,
dene dali si enaba naga pedalobo.
28 Ena dwai mu bidiyu yaide,
eno gesabidi hasegelama, tama husuga sali.
Tiali goli, giligago ena ulubeo. Menio.
Gasigo yaligo ena tama tiwai bidiba.
Ena we bidi tomode dolaluyu,
tama augwalibolo ena tau sa po hanalu wali.
Tiali goli, augwaligo ena tau sabeo.
29 Awe, ena genuai dene dali mu bidibao.
Tama eno gela da, te bulu yowi dali,
ba uni dali sigo i wabo tiwai ebo.
30 Eno tigi husugu gadia selama, mu wa pali.
Tama eno tigiwali tologa pelama, tutulaluali.
Tama gasigo eno tigi posolo mu ilibo.
31 Polobadu da, eno gita eliyu, ona eliyu elama,
dwagi yai wei ebo nai naga elai dao.
Tiali goli, te dwagi yai po wali nai dabe
megi ma isibo bidigo hobede ebo gita dali,
ona dali si elebo tiwai ebo,”
te bidi Jopgo te po wali.

Copyright information for `MPS