b[Jop 22:2-3]

Job 35

Elihugo Jop aga sesanani te aga po geda muyu po dwai obaso

Tama Elihu agai po genina ma weyu, e tama wali,

“Jop, nago te po wali, ‘Eno kolesaga dwagi yai,
ma Godigo kolesaga dolo menio,’ po wali.
Nago homugo te po dolo te wali dawe?
35:2Te e vesde hauwa sogo Jopgo te tama po weyu, agai dwai sęgę sabo sę me ebeo po wali, te po te Dąį 10:7, me Dąį 27:5-6, tede te tobage po elalubo suao. Tiali goli, te Elihugo Jopbolo te kisilama wali po te mu po me wabeo.

Me ma, nago e tama po wali,
‘God, ma eno dwai kolesaga isąma yali da,
tego nage mena tama tau saibawe?
Tama mena tama dwagi yai nai nageba pedalaibawe?’
Nago Godibolo te tobage po wali te dolo menio,” wali.
“Megi da, Jop, eno nage dali, nago abagi sela dali,
wali po wei ponaibao.
Nago dagaluba tonama, te pǫ dabe suao.
Augwali ugwanu mu bidibao.
Godigo te dagalu dali, pǫ dali nigai dao.
Ma, nago dwai sę yai goli,
tama nago aga dolobo usu egobeo.
Nago dwai sę hauwa mu ebadi me, tagala.
Tego aga mena tama mu dolaibawe?
Tama ma, nago doloba pai sę naga idubadi geani da,
tego God mena tama tau saibawe?
Tama agai mena dwagi yai nai agai nogode saibawe?
Ma, nago dwai kolesaga eyu da,
tego da, bidi da naga dolaibao.
Tama ma, nago doloba pai kolesaga eyu da,
tego me bidi da naga tau saibao,” wali. b 

“Hauwa sogo bomai bidi dabego
gasa bidi dabe aiyaba elaluama,
mesegelama, tagalobo dao.
Tama te bidi dabego gela genuai mu
olama, tama gasa bidi dabego
augwali tau somainu i wabo dao.
10 Tiali goli, bidi mego e tama tiwai i me wabo menio,
‘Te Godigo ena nigai da. Aga menade bidibowe?
Agai da dwai sogo pedalobo si agai
dago tabi dili ilama, tama da dwagi yai homu iliyu,
balia dabe wabo dao.
11 Agai da ola mabode da
homu kolesaga hauwa mu sabo dao.
Tama dago homu kolesagago
bulu ba hasa dabego kolesaga edelai elalubo dao.’
Te sęgę tolobo bagego te po wabo dao.
12 Te mu, te bidi dabego tau somainu i wabo dao.
Tiali goli, augwali tobolu gagea pelama,
tama dwai kolesaga ebo bidi dabe dao.
Tama tibaso, Godigo augwaligo i wabo odobo menio.
13 Augwaligo doloba pai kolesaga meni.
Tama tibaso, God Tigidali Bomo Elalubo Bidigo
augwaligo i wabo odogobeo.
14 Tama Jop, eno homugo agai nago
i wabo odogobeo.
Magi baso meni.
Nago polo wali, nago God subo menio wali.
Me ma, nago e tama wali, Godigo nago
po tų odobeo po wali.
Tama nago bobobage sogo mu tonalubao po wali.
Tiali goli, agai odobeo.
15 Tama me ma nago e tama po wali,
God agai dwai kolesaga ebo bidi dabe
tigide dene ilibo menio po wali.
Tama augwaligo ebo dwai kolesaga teba
me homu kone ebo menio, nago te po wali.”
16 “Jop da, page meni yai olo tibo po naga wabo
bidi dao.
Agai dwagi yai homu kolesaga menio, tiali goli agai
po hauwa wabo dao,”
Elihugo te po wali.

Copyright information for `MPS