Job 36

Godigo dago kolesaga dodolainu sęgę mabo dao

Tialima Elihu agai po genina ma weyu, e tama wali,

“Jop, nage dua bolo bididuao,
tama eno nage genina mu
ma ola mawaibao. Magi baso meni.
Eno po meba elalubo te Godigo pode
homu kone palama, tama pusaibao.
Agai ena nigai, ena haniani dwagi yai
kolesagago pągąnalubao.
Tama megi eno te koneani kolesaga po pusaibao,
tego nage e tama ola mawainu,
Godigo yaide doloba pai kolesaga sesemane idubo dao.
Mu tama obao, eno tibo po me deli wabo menio.
Ena konea pai bidi mu nage dali bidibao,” wali.

“God aga genuai bomo elaluyu yaide,
agai te bomogo agai homugo yainu
yali sę eyu naga ebo dao.
Tama agai we bidi dabego ebo kolesaga hobede mu
ebo dao.
Ma, agai suali yaide, we bidi dabego
dwai kolesaga ebaso da, teda agai augwali
bidimainu sula tagalobo meni.
Tama agai nai meni yai bidi dabego sęgę dodolobo dao.
Agai doloba pai we bidi tonaluyu, tau sabo dao.
Tama we bidi dabego augwali genuai
nogi tigidali sogo mabo dao,
te augwaligo te king dabebolo ebo tiwai yali gilama.
Tiali goli, dwai sogo pedalama,
mani sęgęgo te we bidi mesegelama,
tama augwali nogo aligabo bono duani tiwai
bidibo dao.
Tama da, Godigo augwalibolo e tama wabo dao,
te dwai sogo augwalibolo pedalali da.
Magi baso meni. Augwa digi augwa nogi
ugwaba selama,
haniani dwai kolesaga ebaso.
10 Tama agai augwalibolo dwagi yai
kolesaga wali pomainu ola mabo dao.
Tama agai augwalibolo ge neyu,
dwai kolesaga tudiba muao po wabo dao.
11 Tama augwaligo agai po wali pelama,
aga dologode bidibaso da,
teda tigidali sogo augwali bugagia naga bididuaibao.
12 Tiali goli, augwaligo po odisąma yali da,
teda augwa boi bidi dabego augwali ela
muagasaibao.
Tama augwaligo magi nai
augwali tigiba pedalaliwe olama, konegobeo,” wali.

13 “Te God tudi ola mabo bidi dabe,
augwaligo genuai sęgę augwaliba sabalobo si,
augwaligo God dali sębę genuai mu ebo dao.
Tama augwaligo Godigo augwali tau somainu
i wabo menio.
14 Te tama tiyu yaide, augwaligo dwai kolesaga
te we bidi gabidide ebo dao.
Tama tede augwali gesi bidi bidibadi tama isibo dao.
15 Tiali goli, Godigo te bidi dabe dene dali,
sęgę dali si me tolomainu sula tagalobo dao.
Magi baso meni. Agai augwali dwagi yai kolesaga
ola mawainu tama tibo dao.
Tama te tibo sunumide augwali ma selama,
tama augwali bugagia bidimainu ebo dao,” wali.

16 “Jop, megi da suao, nage moni sęgęde mu bidiyu,
tama nage pąde silabo ąǫ te ebao.
Tiali goli, Godigo nage bega sabo po weyu,
ma oda selama, tama nage dua bidimainu elama,
tama nage te dwagi yai nai dabe ma mawaibao.
Tama magi naigo nage me paliama me egobeo.
17 Tiali goli, megi da, Godigo nage tonobo da,
dwai sę ebo bidi tiwai tonobo ąǫ te ebao.
Tama agai nage dali po tų ela mayu,
tama nage tigide dene genuai mu
te mabo sę yali dao.
18 Tiali goli, dua dao.
Tiyu, naga homu sębęgo ebo digi tego nago
Godibolo posobo po omainu ebo dao.
Tama tiyu ma, nage ma oda sabo kolesaga ma
genuai mu yaliwe wabo, tama nago God tagalabo.
19 Ma, nago Godibolo tau somainu i weyu da,
ma naga bomo naga usu siyu da,
tego da nago megi te elalubo sęgę siligobeo.
20 Nago homugo hulia saiba homu kuna wei igio.
Te tobage bidi dolobo sę deli sogo
te we bidi tigiba pedalobo dao.
21 Nago megi nago tigide ebo sęgę godolo me ebe.
Tiali goli, nago dwai kolesaga yabo naga
godolo yali bogo,” wali.

22 “Bugagia odao. God dagalude mu bidiyu yaide,
genuai bomo mu elalubao.
Tama aga te dwagi yai po ola mabo bidi dao.
Dego mu agai ola mabo tiwai yaibawe?
23 Tama dego Godigo yabo sę dabe po
dego ola mawaibawe?
Ma, dego agabolo ‘Te nago geda muani’
po wabo usu yaibawe?
Te tama tiabo bidi mu meni.
24 Te bidi dabego Godigo nigali nai dabe sulama,
Godigo nogi ugwaba selama, balia po wabo dao.
Tama tibaso, nago me te tobage kolesaga deli naga yao.
25 Te tigidali we bidigo Godigo yali sę dabe suali.
Tiali goli, augwaligo agai yali sę kuna konebeo.”
Te bidi Elihugo Jopbolo te po wali.

Godigo bomo dali, homu kolesaga si ugwanu mu elalubao

26 Tama Elihu agai po genina ma weyu, e tama wali,

“God da, polalubo bidi mu da, tama aga ugwanu mu dao.
Dago aga munu me kuna konegobeo.
Tama dago agai kibu be nisu naga yaliwe olama,
konegobeo.
27 Agai wę ugwaba holama,
tama tulubage gagamainu ebo dao.
28 Tama te tulubage pǫ tagalama, tǫba tulubo dao.
Tama we bidi tuabo wę hauwa elalubo dao.
29 Da tigidaligo munu me konebe,
te pǫ genuai mu elama,
tama Godigo ugwa be nigibo konebo menio.
Tama dago konebe,
mena tama te pǫde kulukulu olama
ebowe olama, konebo menio.
30 Godigo te be sele ula tigidali
te bulu dabeba dobola palobo dao.
Tama ula tamu ąį dologoba mu pelama,
te tigidali nai pepeli diliba mu ilibo dao.
31 Godigo tulubage dali,
pǫ dali si tonalubo sę eyu,
tama te kolesagago naga tigidali we bidi
tonalubo dao.
Tama agai tigidali tubo nai dabe
bugagia tǫde holomainu ebo dao.
Tama te we bidigo nai hauwa mu elalubo dao.
32 Te be sele ula agai nogo sigo tolalubo dao.
Tama ene yali gilama agai dąį ilali naiba enebo dao.
33 Te be kulu wabo si da, tego ola mabo dao,
te tulubage dali, wali dali si asainu
tama tibo dao po wabo dao.
Tama te bulmakau kibugo me aga asobo
gagama eyu, konebo dao,” Elihugo te po wali.
Copyright information for `MPS