a[Jer 5:22 ]
b[Jop 9:9; Amo 5:8]

Job 38

Genuai Bidigo Jopgo po wei ponobo po wali

(Dąį 38-39)

Godigo nigali nai dabego Jopgo homu kolesaga edelalio

Te Elihugo po ola silibo si, tama te Genuai Bidi te genuai tulubage dali, bomai wali dali si tomode bidiyu, tama agai po e tama wali,

“Jop, nago dwagi yai homu kolesaga mu menio.
Nage mena tama bidi da weyu, nago te po dabe obawe?
Tama nago eno yainu ebo sę dolainu ebawe?
Megi da, nage bidi mu tiwai dolaluao.
Tama eno nagebolo tigidali po hanaluyu
ebode, nago eno po wei ponagameo.
Eno e tǫ nigilama, aga page dąų walobode,
nage menade bididuai dawe?
Ma, nago te sę dabe mu koneani wida,
nago enabolo pusao.
Dego mu homu kone palama, e tǫ dąį ilai dawe?
Eno homugo te nago koneai yali bogo, ma?
Tama dego mu usu ni kegelama, te tǫ usu sai dawe?
Te tǫ dąų olalubo pos ni menade dolalubowe?
Dego mu mone masigi munama, te tǫ ugwadu tede
nigimainu yai dawe?
Tama te sę ebo si da, te dagalu hǫ dabe dwagi yai
homu pemene elama, balia po wai dao.
Tama te ensel dabego me dwagi yai
homu pemene elama, hae wali.”

“Tama te tamu wę tǫ tabidu buluba podilasąbaso,
dego mu sunumi paliai dawe?
Tama dego te tamu ąį aga dąį tomode
tama elaluai dawe?
Te tamu wę gesi sogo pedalali sogo da,
eno aga pǫgo mesegaluai dao,
te aga gudubo ugwa tiwai elaluai dao.
Tama eno te wai bǫų agai idago
te wai bǫų ugwa gudulubo tiwai,
te pǫgo eno aga belai dao.
10 Tama eno te tamu wę te obo yali gilama bogo badu
eno dąį ilai dao, tama te soabo sunumi paliai dao.
11 Tama eno tamu ąįbolo e tama po walai dao,
‘Nago genuai wę asobo dąį
e tama dąį yagasao,’ po wai dao.
‘Habu seleyu, munu me e dąį me
bolamo,’ po wai dao.” a 

12 “Jop, mena tama tiali.
Nago olo pogo obadi yaide, te be posoyu,
ula me yai me elalubawe?
Tama nago te be posobo sę kigamu naga
emainu bodolu muai dawe?
13 Hulia sabo da, teda ugwago bidi
mesega sabo tiwai elama, tǫ mesegalubadi,
te dwai bidi dabe te hulide
biliyu yaide dwai kolesaga ebo dao.
Ma, me sogo nago olo po obadi, te be posolama,
te dwai kolesaga ebo bidi dabe noma
somainu me yai dawe?
14 Kigamu giliga nanobo ulago te hulide
susiąma yali nai
te kigamu ula ebogo subo dao.
Tama dago hulia sai madi susiąma
yali nai, te ulade subo dao.
15 Hulibo sę dabe da,
te dwai bidi dabego be te posobao.
Tama augwali dwagi yai homu mu elama, biliyu yaide,
haniani dwai sę ela bilibo dao.
Tiali goli, ulago augwaligo bomo aiyaba
elaluama, tama augwaligo dwai sę
tagalomainu ebo dao,” wali.

16 “Te tamu ąį dologoba pelama,
nago te wę pedalobo madi nago suai yali bogo.
Tama nage te pesagede bilai dawe?
17 Mena tama tialiwe?
Nage te isai we bidi pabo madi aiyanu
mu nage dulai yali bogo?
18 Te tǫ genuai mu elalubo.
Te nago tigidali badu sese koneai dawe?
Ma, nago koneani wida, enabolo pusao,” wali.

19 “Te ula page buluba pabo sunumi nago koneai dawe?
Tama te huli sesabigo bulu menade mu elalubowe?
20 Tama nago ena te ula dali,
hulia sabo dali si wali pelama,
pabo sunumi nago enabolo ola mawaibawe?
21 Jop, nage monu dabe mu da.
Tama nago ena te nai sigo bulu ola mawaiba.
Magi baso meni.
Eno te ula dali, huli sesabi dali si nigisąma ebadi,
naga idago nage ame nai yali bogo, agawe?”

22 “Mena tama tiali nago te ais dali,
te talua ge tulubage ais si sabodubo
pesage nago suai yali bogo, agawe?
23 Eno te nai dabe hagea selama
muani naigote dwai kolesaga elama,
gasa bidi dabe dali wąbi hwįbo gagalobo bidi dabe
tigide dene ilimainu yai da.
24 Te be sele ula pedalama,
tama te tedela pabo sunumi page menade elalubowe?
Tama me te giliga asobo badu wali
asobo sunumi menade elalubowe?
25 Dego te dagalude wę gamia nigilama,
tama te tulubage dabego wali pelama,
e tǫba tudulalumainu ebo dawe?
Tama dego mu te tulubage tulubode
be sele ebo te ulago wali pelama,
tedela pomainu yali sunumi dego mu nigai dawe?
26 Dego mu te bidi meni yai bulu tǫ
wa pai madi tulubage tulumainu ebo dawe?
27 Hasia te tǫde ni dali, nosai dabe dali holisiąbadi,
tiali goli tulubagego te tǫ usu nama,
te nosai dabe hauwa mu holai dao,” wai.
28 “Mena tama tialiwe?
Te tulubo tulubage te aya me deli elalubawe?
Te hulide ąį segeni ebo tulubagego aya bidibawe?
29 Tama te tǫde pedalubo ais dali,
talua ge tulubage ais sigo ida de dawe?
30 Augwali te kedau sogo pedaluyu,
tama te wę dabe masigi yali gilama dila pelama,
te tamu ąį mesegelebo dao.
Awe, te sigi ąį ugwadu dai te dila pabo dao,” wali.

31 “Jop, nago te hǫ hani me deli sisinama,
tama te dagalude deliba sisinama dąų walaibawe?
Tama nago te hǫ hani me deligo bono pįsįganama,
tama te hǫ dabe tedela pomainu
yaibawe? b 
32 Mena tama tialiwe?
Nago te hǫ dabe augwali sunumi ola menama,
tama te kibu bede mena sogo pedaluyu emainu
waibawe?
33 Nago te dagalude hǫ dabego wali pabo
bomai po page nago konealubadi bogo, agawe?
Nago te tǫde nai dabego me
te po wali pomainu yaibawe?”
Godigo Jopbolo te po hanalu wali.

34 “Tama nago moni dągą olama, te pǫ dabego odama,
tama te moni tulubage nageba gelemainu yaibawe?
35 Tama nago te be selebolo nago
gasa madi me pao wabo si da,
teda te be sele ulago nagebolo e tama po waibao,
‘Eno nago sę yabo naga eno tonalubao,’
po waibao, agawe?
36 Dego mu te bobobage dogoni yai
bago te tama wę bole asaiba po omainu
dego kolesaga mawai dawe?
Tama dego te gogolo ba dabebolo be posobode
po omainu dego kolesaga mawai dawe?
37 Dego homu kolesaga mu te pǫ dabe nedebo
usu yaibawe?
Te pǫ dabe da, te sene wę tiwai te dagalude elalubao.
Tama dego augwali gea palama,
te tulubage tulumainu yaibawe?
38 Tama dego te tǫ hogomu pu aiyana pelama,
tǫ ma dila pomainu ebo dawe?”
Godigo Jopbolo te po hanalu wali.

Dego te bulu hasa dali, ba dabe dali sibolo kolesaga mawai dawe?

39 Tama Genuai Bidi agai po genina ma weyu,
e tama wali, “Jop, mena tama tialiwe?
Te nago te bulu hasa dabe te laion yowi te tǫ dedagede,
me te bulu sesawai madi
geme dualubo madi pąba asomainu elama,
te laion yowi dabego ela tumainu ebaso,
te augwa nasi ebo silimainu ebo da, agawe?
41 Tama te sisi yai kotkot ba dabe tuabo nai
menia sobaso,
tama nai gege bilibadi yaide,
tama augwa wai dabe ena Godiba nai sainu
hanalubadi,
tama dego mu augwali nai mabo dawe?” te po wali.
Copyright information for `MPS