a[Tib 74:14; 104:26; Ais 27:1]
b[Ro 11:35]

Job 41

Te hasa pukpuk te tigidali hasa dabego tuni bidi tiwai bidali

Tama Genuai Bidigo po genina ma weyu, e tama po wali,

“Jop, mena tama tiali nago huk sąnama,
te genuai hasa pukpuk sela tuaibawe?
Tama nago augwaligo hamena nago
haligago gebelebo usu yaibawe?
a 
Nago agai hamenade dedage nigilama,
tama haliga gebelama, kegasa paibawe?
Tama nago agai penanede hukugo kęaibawe?
Nago homu mena tama tibowe?
Ma, nago aga toubo si da,
teda agai nagebolo aga hobede ya po olama,
tama aga tagala palao po waibawe?
Agai nagebolo po dua mu dwagi yai pogo waibawe?
Tega?
Agai nage dali po mia siyu,
tama dage sigo deli homu eyu yaibawe?
Tama aga nage dali bidiyu, nago sę
bugagia tigidali sogo yaibawe?
Nago aga dali naga te negebo ba dali
gagali ebo tiwai yaibawe?
Ma, nago dwasianu bonode gebelama,
naga wegimanigo kegasa bilimainu yaibawe?
Tama eno homugo te bisnis sę ebo bidi dabego da
mone sainu po bomo yaibawe?
Tama augwaligo te hasa pukpuk tologolama,
denege minama,
tama mone sainu maketiba sela paibawe? Tega?
Tama nago hauwa mu aga tigiba me toboluba
nago sesemone hauwa mu enaibawe?
Polo be da nago nogo agaba munama,
tama nago agai bomo usu siyu da,
teda agai nage dali hwįbo genuai mu yaibao.
Tama nago te wąbi hwįali homugo me gegeda pogobeo.
Tama nago tama ma tigobeo,” wali.

“Ma, nago te genuai pukpuk dąų olama,
tolaluabo homu ebaso da,
teda nago te ebo homu mu gegeda palao.
Magi baso meni. Ma, nago aga suyu da,
teda nago dili tigidali didibila pelama,
noma selama, tama nago bomo tigidali pela silaibao.
10 Te pukpuk pila mubadi hodolama,
wąbi hwįbode aga aiyaba elaluabo bidi me menio.
Tama te tiwai bidi meni baso da,
teda dego ena edelebo usu yaibawe?
11 Te tigidali nai e tǫde elalubo nai dabe da,
eno nai dabe naga dao.
Tama dego mu ena dali usu si elama,
tama eno bomo aiyaba elaluama,
tama enabolo aga nai me mao
po wabo usugowe?” b 
12 “Tama megi da, eno nagebolo waibao,

te genuai pukpuk mena tiwaiwe,
me agai bomo dali si po nagebolo pusaibao.
Tama me ma, agai dwagi yai tigiwali po waibao.
13 Dego mu agai tigi abolo sela sąwaibawe?
Tama de mu agai bomai penane pageba paibawe?
14 Agai penanede kele moni bage hauwa mu elalubo.
Tama bidi dabe wi te kele dabede ebo dao.
Tama tibaso, dego mu agai penane pedegaibawe?
15 Te hasa aga abolo boma pai elalubo dao.
Tama te abolo dąų dąų mu olama,
aga tigi dąų walama mu elalubo dao.
16 Te abolo dabe dąų mu olama,
tama te abolo dabe tomode te agebele mu menio.
17 Augwali dąų mu ola sai madi, te magi nai mego
agai abolo dagagobeo,” wali.

18 “Te aga sosogo wabo si da,
te isi ula agai gunidu pedalama,
subigila dobola palobo dao.
Tama agai gedu ula te kigamu giliga
pedalobo tiwai tama ebo dao.
19 Isi agai keledu pedalama,
tama dwasianu isi subigila bola pabo dao.
20 Tama agai gunidu hano
te sene iside nai ulai mobo tiwai tama ebo dao.
21 Tama agai kele ą wabo si da,
agai mobogo isi dala sabo dao.
Tama isi agai keledu buluba asobo dao,” wali.

22 “Agai mage dila pai mu dao.
Tama bidi dabego aga subo si da,
augwali wi genuai mu ebo dao.
23 Agai tigiwali me badu aga tigi meba dąų ola selama,
tama munu me kilasa pabo menio. Mu menio.
24 Agai homugo magi nai wi me ebo menio.
Aga hagawia da, te dila pai mu elalubo dao,
te dilai masigi tiwai dao,
te wit nai ge mimibo masigi tiwai dao,” wali.

25 “Aga hogodama, doligilubo si da,
teda te bomai tuni bidi dabe augwali
wi genuai mu ebo dao.
Tama augwaligo agai wę bogoų wabo odobo si da,
teda augwaligo homu dąų ola selama,
magi sę me yabo homu ebo menio.
26 Tagala dagego hwągo elebadi,
me te genuai sesemonego,
dwasianu enego me enebadi me,
tama te nai dabego aga me dologobeo.
27 Tama agai augwali tonobo da, olo nai tonobo
ąǫ yaibao.
Agai ain tonobo da, te kala sasi yai tiwai tonobo dao,
me te kapa bras tonobo da,
te ni mobi tiwai tonobo ąǫ ebo dao.
28 Te bidi dabego ene selama,
aga ene badi, aga wi me pogobeo.
Ma, te bidi dabego katapul selama,
masigi waigo aga enebaso da,
teda agai tigiba olo ni yabe sasi aga
tigiba tulalubo ąǫ yaibao.
29 Te hwįbo wąbi tonobo da,
te olo nosai sasi tiwai agai tonobo ąǫ ebo dao.
Tama agai bobobage sesemone kę wabo
odobo si da, aga wi me egobeo.
Te da olo nai dabe dao, wabo dao,” te po wali.

30 “Te moni pukpukgo tabide
elalubo abolo da, mu poa pai mu dao,
tǫ sene pepeda pai tiwai dao.
Tama aga pu aiyana pai madi pabo sogo da,
te tigi abologo te tǫde dwasianu wę gamia
nigibo dao.
31 Tama aga tamu wę tomode bilibo sogo da,
te tamu ąį bugua sąsą paibao.
32 Tama aga te pali sunumi da, te wę tedela mu elama,
te monu dabego ili nisi tonobo ąǫ ebo dao.
33 Te genuai pukpuk magi nai mede wi me ebo menio.
Te gasa hasa dabe te aga tiwai me menio. Mu meni.
34 Agai gasa hasa dabe genuai nogi elalubo sali goli,
agai augwali olo nai tonobo ąǫ ebo dao.
Augwaligo augwa nogi ugwaba sobadi me, tagalao.
Aga te aga tuni bidi tiwai bidibo dao,”
Genuai Bidi Godigo Jopbolo te po wali.

Copyright information for `MPS