a[Ped 9:7-9]
b[Ped 8:12]
c[Ped 6:17]
d[Mt 24:29; Mk 13:24-25; Lu 21:25;
ePed 6:12-13]
f[Tpi 2:17-21; Ro 10:13]

Joel 2

Te kuli mano dabego yali sę te Genuai Bidigo bodolu side dąį mabo tiwai yalio

Genuai Bidigo te dwai sę ebo we bidiba dene
maiabo bodolu, te pąba megi yagasoba wali.
Tialima, dagego te biugel bu weyu,
te Godigo bulu dude digi, te Saionde belo dabe elao.
Tama te side te tigidali Juda we bidi
noma somainao wali.
Genuai Bidigo te wabo side te be mu hulia saibao,
tama te husugu yai pǫgo te dagalu mesega saibao.
Te genuai kuli mano hani te ami tiwai elama,
te bulu du dabe mesega sagaselama,
te kigamu te be posobo asobo tiwai pedelaibao wali.
Te polobadu te tiwai sę deli me pedalubeo,
tama te tiwai sę me te nosali me pedalugobeo,
wai dao.
Augwaligo te nai yabe me, nosai me, tula silaibao,
te kala siago dabo tiwai yaibao.
Te augwali te pedalisąwani pesagede digi
te wiegi yai te Iden gi tiwai elaluali,
tiali goli augwaligo te nai yabe tigidali
tula silali pesagede, te bulu tǫ wa pai pedelali.
Augwaligo te yabe deli me elalumainu me
sula tagalubeo.
Augwaligo mu silalio.
Te kuli mano dabe te boi hwįabo
hos dabego udada asobo tiwai ebao.
Te augwali bulu duba samanobo sogo,
augwali te karis masigiba samanu
kidagalo wabo tiwai ebao,
tama te kala siago deyu,
podo podo wabo tiwai ebao.
Augwali te genuai ami hanigo
te boi hwįainu wasibo tiwai yaibao. a 
Te augwali pąba asobo sogo,
tigidali tǫde bidibo we bidi hani
wi dwai mu elama,
te augwali bomo mu menia sai dao.
Te kuli mano dabe te hwįabo bidi dabe
udada asobo tiwai elama,
augwali te taun bagulali obo banisba holali.
Te augwali dolo naga peyu,
te ami dabego nogo sągą sąyu,
mas ebo tiwai ebo dao.
Te augwali gasaba begelama, me tonono me ebeo,
tama augwa pabo sunumi digi me palia sabeo.
Augwa te tigidali obo banis aluama, tomoba pobao,
te mena nai me deligo augwali me palibeo.
Augwali te taun dabeba udada pelama,
tama augwa te obo banis bolama,
te u badu aiya dulubao.
Tama augwali te be dabeba holama,
tama te be pola sali dedage windodu
te nai wi sabo bidi tiwai elama,
te be tomoba pabo dao.
10 Augwali pobadi, te tǫ dali, dagalu dali si
mumunu yaibao.
Tama giliga dali, polua si, te hulia saibao,
tama te hǫ ula ma egobeo. b 
11 Genuai Bidigo te aga ami bidi dabeba
i bomonama wali,
te agai pedauwalide te dagalu
kulukulu wabo tiwai yali.
Te agai po wali pabo bomai ami hauwa elaluali.
Idaya, tegobao!
Te Genuai Bidigo bodolu side te dwai mu dao.
Tialima, de aga te bugagia bidiyu,
te aga me dologobe dawe? c 

Godigo te we bidi dabe te tiwai i weyu, te augwali homu begeliąo wai

12 Tialima, Genuai Bidigo te po wai,
“Mu dao, te tigidali sę pedelaibao,
tiali goli megi dage haliga begelama,
enaba ma asiąo,” wai.
“Tama duga te nai habu selama,
tama haliga hobede elama, gela weyu,
enaba ma asiąo.
13 Te duga homu dene ebo ola mayu,
te dagego ugwa dabe olodali pisagimio.
Te duga haligade digi te duga yali
dwai sęde homu dene mu yao,”
Genuai Bidigo te po wali.
Dage te Godiba ma asiyu, te dena Genuai Bidi dao.
Agade te olo mu tau sabo wiegi yai pemene ebo
homu kolesaga pągąnalubao,
te dade wiegi yai sę ebao.
Godigo dabolo te dua dua eyu, sębę polo egobeo,
te da sesemane sogo godolo mu ebao.
Sesemane sogo agai dago dwai sęgę
sela sąyabo sisi idu,
te dabolo dwai dene ilabo homu ebe dao.
14 Dego konegowe?
Te dage dena Genuai Bidi Godiba ma asigi sogo da,
teda agai homu te ma hasegelama,
te dabolo wiegi yai sę eyu,
te da nai hauwa magi da.
Tama tiyu, te dago te ofa yabo nai hauwa me,
te ofa yabo wain me, elalueibao.

15 Dagego te bulu du Saionde te biugel naigo bu wao.
Te we bidi dabeba weyu, te augwa nai habu selao,
tama dagego augwali sisinama, lotu omainu yao.
16 Tigidali we bidi sisinama,
te augwali genuai lotu omainu sisinao.
Te tigidali monu dabe, mosi dabe me,
tigidali wai puluba me,
te idago ame tubo dwasianu
wai bǫų dabe me, sela asiąo.
Te tamadi gesi selama bidibo we bidi dabe me,
tigidali we bidi te be tagalama, asiąo wai dao.
17 Te pris dabego Genuai Bidigo sę eyu,
te aga be sunumi me alta tomode yali,
augwa te gela weyu,
te gedu haluasa po te tiwai waiąo wali,
“Genuai Bidi, nago naga we bidi dabe da
homu dene yao,” wao.
“Te nago da homu dene isąbaso da,
teda te gasa hani we bidi dabego da tudiba muyu,
tama daba posobo po te tiwai waibao,
‘Te dagego God mena bidibawe?’ te po waibao.”
Te pris dabego te po waiąo.

Genuai Bidigo te nai ma holomainu ilali

18 Tialima, augwali homu begelibaso,
te Genuai Bidigo aga tǫde homu hauwa elama,
tama agai te aga we bidi dabeba
te olo mu tau sabo wiegi yai homu kolesaga eyu,
tau sai dao.
19 Agai te po wai, “Megi da, eno dageba te wain me,
ni oliv wel me mawaibao, tama dagego
hauwa elalueibao.
Eno tama tibode te gasa we bidi dabego
dage tudiba mubo po munu me ma wagobeo.
20 Tialima, eno te kuli mano dabe
te not pedaiba gudulaibao,
meba te wa pai tǫ bulu pesageba sela sąwaibao.
Te hasia mu asali kuli mano hani
eno te sigi ąį Detsiba gudulaibao,
te nosali asali hani eno te genuai
tamu ąį Mediterenianba sela sąwaibao,” wali.
“Tama te kuli mano hani tigi te isila pelama,
te damubo kugumini yaibao.
Eno te tama tebo te augwaligo dageba yali
dwai sę tigidali wei ponoyu, tama tiaibao,”
Genuai Bidigo te po wai.
21 “Tǫ, nage wi me igio.
Nage wiegi yai homu pemene elama,
te bugai haliga yao, magi baso meni,
ena Genuai Bidi, eno te wiegi yai
sę hauwa nageba ebo dao.
22 Te kibu hasa sibi dabe, dage wi me igimio.
Magi baso meni, te nosai ma pedelali.
Te ni dabego nai ma walali, te ni kaya fik me,
ni wain me, te du hauwa walama elaluali.”

23 “Te Saion we bidi dabe, dage wiegi yai
pemene iyąo.
Dagego te duga Genuai Bidi ena Godigo
dage tau sali sęde wiegi yai pemene yao,” wai.
“Eno dageba te tulubage te nai bulabo sogo
usu nama mawai,
tama dageba te polobadu yali tiwai
te tulubage hauwa mawai.
24 Te wit bo wali sela sąbo pesagede

te wit ge pągąnalueibao,
te wain me ni oliv wel nigibo dedagede,
te wain me wel pągąna pelama gelaibao,” wali.
25 “Ena digi eno te kuli mano dabe
dageba te ami bidi tiwai elama tagala palali.
Tama tialima, te dagego nai tigidali te kibu bede
te genuai hani kuli mano dabego
te tula silali nai tigidali te eno wei pona silaibao,”
wai dao.
26 “Megi da, te dagego tuabo nai hauwa elalu,
te dage mu pągąna paibao.
Tama dagego te ena God nogi ugwaba saibao,
te duga Genuai Bidi dao,
magi baso meni, eno te wiegi yai
bomai sę hauwa dageba yalio.
Tama te gasa we bidi hanigo
te eno we bidi dabe dage hale
munu ma ilimainogo me egobeo.
27 Tialima, dage Israel,
te ena dage dali bidibo te dagego koneaibao,
te ena Genuai Bidi, ena naga ena duga God dao.
Te gasa hani we bidi dabego te eno we bidi dageba
te hale ilabo sę me emainu munu me
ma egobeo,” wai.

Godigo te aga Mobo Bidi te tigidali we bidi haniba mawaibao wai

28 Te Genuai Bidigo po ma weyu,
te po wali,
“Nosali te eno Mobo Bidi te tigidali
we bidiba tagala palaibao,” wali.
“Tama te dagego ogwa dabe me, wegigo me,
te eno po te profet dabego po pusubo
tiwai yaibao,” wali.
“Te dage monu dabe bidi dabego te na eyu,
te gesi ogwa bidi dabego me te na
tiwai yaibao,” wali.
29 “Te tama tebo sogo te eno Mobo Bidi
te eno sę bidiba, me sę ebo we dabeba
tagala palaibao,” walio.

Te Genuai Bidigo side bodolu dąį ilali

30 Genuai Bidigo po ma weyu, te po wai,
“Te eno te e side dąį ilali sogo bodolu
te tǫde me dagalude mueibao,” wali.
“Te tǫde genuai boi hwįabo si pedalubode,
te bidi hauwago kaneme gelaibao.
Te sia dabo augwa taunde pedelama,
te hano genuai hano ugwaba holaibao,” wali.
31 “Tama te dagalude da, te giliga ge be hulia selama,
te poluade mama yai pedelama,
te bidi kaneme tiwai yaibao.
Dagego te nai subo sogo da, te dagego koneyu,
te Genuai Bidigo sogo bodolu
te pedalubao homu yaibao.
Te genuai side te tigidali tǫde we bidi
wi mu yaibao. d 
e 
32 Tialima, niwai we bidi te augwali
tau somainu enaba hanalubaso,
teda te eno augwali tigidali ma saibao,” wali.
“Ena Genuai Bidi da, eno te sęde te tiwai
po walio,
te Jerusalemde bidibo we bidi meba
te me hagagobeo.
Te we bidi dabe ena digi te sa munama dąį ilali,
te augwali bugagia bidaibao wai dao,” wali.
f 
Copyright information for `MPS