John 20

Jisas gų pagede ma hodaloai

(Matyu 28:1-8; Mak 16:1-8; Luk 24:1-12)

Te Jisas gų pagede munama, si sogo bidilama, tama moni Sarere dao wabo side, tama te Makdala bulu we nogi Maria, te we aga gų pageba kigamu asai. Tama te bulu hulialubadi ganao. Tama agai suali, te ola be tų haluali moni masigi te halualubo agai subeo. Tama sulama, tama te we aga Saimon Pita dali, te gasa bidi te Jisas agai godolo yali te bidi dali, te bidi si bidibo digi te we udawai. Tama Mariago augwali si dali po bomonama weyu, te po wai, “Augwaligo dago Genuai Bidi te ola bede sela pai yalio. Tama dago konebeo, augwaligo aga menaba mugi paliwe naga subeo,” te we Mariago te Jisas wali pabo bidi si dali te po wai. Tama te wego te po obaso, Pita dali te gasa bidi me dali, tama augwali si te bidali be tagalama, tama augwaligo te hanu tagalama, Jisas muani digi ola beba pabo gagalali. Tama augwali si hodobo udawai. Tialima gasa bidigo Pita geanama, tama aga polasa pai, tama ola beba polo polasa sabolai. Tama te polasa pali bidi aga basi gulama, bomo elama suali, te pedai ugwa nami dabe naga munalubo suali. Tialima aga te ola be gų page tomoba pabeo. Saimon Pita aga nosali tudi badu asai, tama aga te gų page ola be tomoba polasa pai. Tomoba pelama, tama aga bomo elama suali, te pedai ugwa nami dabe naga munalubo Pita agai suai. Tama gasa ugwa me munalubo agai suai, te Jisas tobolude bebe pali ugwa dao. Te ugwa gasa ugwa dabe dali munalubeo. Tama te ugwa bebe pelama, agaduba tali munaluai. Tama te gasa bidi aga polo Pita geanama polasa asali, te bidi aga me te gų page ola be tomoba pai. Tama agai te tiwai elalubo sulama, tama te bidi agai te Jisas ma hodaloali tede te sogo konealuali. (Tama te sogo augwaligo Godigo polobadu asęani po page konesiąbadi. God agai po te bukude asęyu, te po wai dao, “Aga gų pagede ma hodaluao,” te po wai. Te sogo augwaligo te po page konebeo.) 10 Tama te bidi augwali sigo te sę tigidali sulama, tama augwali si augwa si beba ma pai.

Maria te Makdala bulu we agai Jisas suai

(Matyu 28:9-10; Mak 16:9-11)

11 Te we Maria te gų pageba ma sabolali, te bidi si augwali te ola be tomode bidibadi. Tama augwali si augwa si beba ma pelama, tama Maria te gų page ola be bulu badu gana dolaluyu, tama Maria aga gela udai. Aga gela udu digi, tama aga basi gulama, tama agai Jisas te muani ola be tomoba tonai. 12 Tama Maria agai Godigo sę ebo ensel mobo bidi si tedela bobobage ugwa muai bidi si suai, te Jisas muani ola be tomode dulalubo suai. Tama te ensel mobo bidi me deli te Jisas tobolu muani digi dulaluyu, me te sągą muani digi dulaluyu yai, te Maria agai suai. 13 Tama te ensel mobo bidi sigo Maria dali te po wai, “Te we, nage magi baso gela obawe?” te po wai. Tama Mariago augwali si dali te po wai, “Augwaligo eno Genuai Bidi selama, tama augwaligo menaba muaniwe, te eno konebeo,” Mariago te ensel mobo bidi si dali te po wai. 14 Maria agai te po weyu, tama agai begelama suai, tama agai Jisas dolalubo suai. Tialima Mariago koneyu, te Jisas tama dao, te homu agai ebeo. 15 Jisasgo Maria agabolo te po wai, “Magi baso nage gela obawe? Nago de gegeyu ebawe?” Maria agai te homu yai, te bidi aga e gi tonalubo bidigo agai te po aga dali wabowe, agai te homu yai. Tama agai te bidibolo te po wai, “Genuai bidi, nago te isali bidi tigi sela pali wida, te nago enabolo aga muani digi ola mao, tama eno aga sela paio,” wali.

16 Jisasgo agabolo te po wai, “Mariao.” Tama Maria aga ma begelama, Jisas dali agai Hibru pogo weyu, “Rabonai,” te po wai. Te po page e tama wai, “Po ola mabo bidio,” te po wai. 17 Jisasgo Maria dali te po wai, “Nago ena diągio. Ena eno Aya God bidibo digi dagaluba me pabeo. Tama tibaso, nago ena dąų ola sigio. Tialima, nage eno ama dabe bidibo digi pelama, augwali dali te po tama wagibao, ‘Ena eno Aya bidibo madigi dagaluba holobao, tama te aga dagego Aya me dao. Tama eno ena God bidibo digi pobao, tama te God dagego God me dao,’ te po eno ama dabebolo pusigi pao,” Jisasgo Maria dali te po wai.

18 Tama tibaso, te Makdala bulu we nogi Maria aga pai, tama agai te Jisas wali pabo bidi augwali dali po weyu, te po wai, “Eno Genuai Bidi Jisas sualio,” te po wai. Tama agai te Jisasgo agabolo mani te po augwali dali wai.

Agai bidi dabe augwaligo Jisas suai

(Matyu 28:16-20; Mak 16:14-18; Luk 24:36-49)

19 Te Jisas wali pabo bidi dabe augwali Juda bidi dabe wi eyu, tama augwali bidibo te be tų dąų olama, augwali te be tomode bidai. Te sogo moni Sarere dao wabo sogo giliga iba dega sigi pai. Tama Jisas augwali bidibo digi tomoba dolaluagasai, tama augwalibolo te po wai, “Dagego homu dwagi yai elama, tama dage bugagia bidao,” Jisasgo augwali dali te po wai. 20 Jisas agai te po olama, tama agai nogo dali punali badu dali augwalibolo waselai. Tama agai bidi augwaligo Genuai Bidi sulama, tama augwaligo homu dwagi yai mu yai. 21 Tama Jisasgo augwalibolo te po ma wai, “Dage dwagi yai homu elama, bidao,” te po wai. “Tama Ayago ena tagala palobaso, ena asai dao. Tama tialigia, eno me dage tagala palobao,” Jisasgo te po aga wali bilali bidi dabe dali wai. 22 Jisas agai te po olama, tama aga mobo augwalibolo ponai, tama augwalibolo te po wai, “Dagego Godigo Dwagi Yai Mobo Bidi te sao,” Jisasgo te po wai. 23 “Dagego gasa bidi dabe mego dwai sę yali sęgę sela sąyu da, tama te dwai sęgo sęgę Godigo silaibao. Dagego gasa bidi dabego dwai sę yali sęgę dąų weyu da, teda te sęgę me elaluaibao, te dwai sę sęgę Godigo sela sągobeo,” Jisasgo te po wai.

Tomasgo Jisas suai

24 Jisas aga te aga wali pabo bidi augwali bidibo digi pedalai, te sogo aga bidi me deli augwali dali bidisiąwai, te bidi Tomas dao, tama agai gasa nogi me Didimus wai, te nogi page aga idago wai si deli sogo ame nai. Te baso te nogi Didimus wai. 25 Tama Jisas aga wali pabo bidi mebago Tomas agabolo te po wai, “Dago naga Genuai Bidi dago suai dao,” te po Tomas dali wai. Tialima Tomasgo augwalibolo te po wai, “Eno aga nogode nel enani digi susiąyu da, tama eno nogo dani te nel enani digi tomoba musiąyu da, te eno nogo aga punali badu palama susiąyu da, teda te eno te poba ena homu mu mugobeo,” Tomasgo te po wai, augwali dali.

26 Te nosali a naga olama me badu nogo sela sogo bidai, tama Jisas aga wali pali bidi augwali te be tomode ma bidai, tama Tomas me augwali dali bidai. Augwaligo tigidali tų mu dąų ola silai digi, tama Jisas augwali tomoba dolagasai. Tama agai te po wai, “Dagego homu dua bugagia bidao.” 27 Tama agai Tomasbolo te po wai, “Nago nogo dani eba da muao. Tama nago eno nogo me suao. Tama nago nogo eno punali badu palama suao. Nago homu si ebo tagalao. Enade nago homu deli yao, te tiwai bidao,” Jisasgo te po Tomas dali wai. 28 Tomasgo aga dali po wei ponoyu te po wai, “Nage eno Genuai Bidi dao, tama nage eno God nage dao,” Tomasgo te po Jisas dali wai. 29 Tama Jisasgo Tomas aga dali te po wai, “Nago ena subaso naga, tama nago homu enaba mubawe? Niwai bidi augwaligo ena susiąma, augwaligo homu enabolo mubo we bidi, te augwali dwagi yai homu mu yaibao,” Jisasgo Tomas dali te po wai.

Jongo te buku asęani po page e tama po wai

30 Te Jisas agai bomo yai sę hauwa mu aga wali pabo bidi augwaligo gedude agai te sę yai. Tama eno te Jisas agai yali sę po tigidali eno e bukude asębeo, meba naga asęani. 31 Te bidi Jisas da, te Godigo sa muyu nosali asaibao wali bidi Krais dao, aga da te Godigo Ogwa dao. Tama dagego te po mu po dao homu emainogo, eno Jisasgo yali bomo yai sę po meba e bukude asęani. Tama dagego Jisas da te Krais dao, te aga Godigo Ogwa dao, dagego te homu eyu, aga dali wadoloyu, mu bidada pabo ula dagego somainogo eyu, eno agai yali sę po asęani.

Copyright information for `MPS