a[2 Sml 1:18]

Joshua 10

Amor dabe augwali te hwįani sęde aiyaba elaluai

Te Adoni Sedek, te Jerusalem tuni bidigo, te Josuago te Ai hanu pedela selama, tama tigidali bidi dolama, tama Ai hanu tuni bidi ela mubadi yai, te agai te Jeriko hanude te aga tuni bidi dali yali sę tiwai gilama yali po odai. Tama agai odali, te Gibeon dabego te Israel dabe dali abagi si olama, nogo menama, tama augwali dali deli madi bidibo po odalio. Tibaso, aga de te Jerusalem hanude bidali we bidi dabe dali, augwali si wi dwai mu yai, magi baso meni, te Gibeon hanu te genuai hanu elaluali, te gasa genuai tuni bidi elalubo hanu gagawai elaluai. Te genuai hanu digi mu te Ai hanu te aiyaba elaluai elaluali, tama tigidali bidi te hwįbo bomai bidi naga bidai. Tama tibaso, te Jerusalem bidi dabe te augwalide wi umabo mu yalio. Tialima, Adoni Sedek tuni bidigo po te Hebron tuni bidi Hohambolo po tolobadi, tama Piram te Jarmut hanu tuni bidibolo me, tama Jafia te Lakis hanu tuni bidibolo me, tama Debir te Eklon hanu tuni bidi dali, te augwalibolo po ola tolalio. Agai te tiwai po wai, “Dagego te eno Gibeon hanu bidi dabe dali hwįbo te dage aselama, tau sagasao, magi baso meni, augwaligo te Josua de te Israel dabe dali sibolo te abagi olama, deliba bidainogo nogo mawai dao,” te po ola tolali.

Te e tama a naga te moni hanu Amor tuni bidi dabe, augwali te Jerusalem hanu tuni bidi, me te Hebron, me Jarmut, me Lakis, me Eklon, te e tama a naga hanu dao. Tama te tuni bidi dabego te augwa ami bidi dabe sisinama, tama augwaligo te Gibeon hanu bobogela sigi pelama, tama augwaligo augwali dali hwįagasai.

Tama tibaso, te Gibeon hanu bidi dabe augwaligo Josua bidibo pesage te Gilgal teba po ola tolai. Augwaligo te po wai, “Te bulu dude bidalubo moni hanu Amor tuni bidi dabe tigidali te augwali deliba sisinama tama augwaligo da dali hwįainogo sabolai dao. Nago te naga sę bidi da munu mu tagalamuo! Nage polo asama, da tau sagasao!” wai.

Josuago te po odama, tama aga ami bidi tigidali dali hogodama, tama te bidali pesage Gilgal te tagalama, tama pelama, augwali tau sigi pai dao. Agai te hwįbo bomai bidi dabe me aga dali pali. Tialima, Genuai Bidigo Josuabolo te po wai, “Te boi bidi augwalide wi me igio. Eno augwali te nago nogoba manio. Te bidi me deligo dage aiyaba me elalugobeo,” wali.

Tama Josua te aga ami bidi dabe dali augwali hulide pelama, tama te Amor dabe bidalubo madi pedelai. Te Amor dabe augwaligo te hwįabo sisi isiąbadi, tiali goli polo tama, te Israel dabe augwaligo te hwįbo gagalalio. 10 Te Amor dabego te Israel ami bidi dabe asobo sulama, tama Genuai Bidigo augwali wi ilama, tama augwali homu kolesaga umuna palai. Tama te Israel dabe augwaligo te Amor dabe augwali te Gibeon hanude dolobo sę ilama, tama augwaligo augwali pobeasa duluyu, te bulu du bagua sali te Bethoron teba dulai. Augwaligo te Amor dabe dolobo sę ela pidubadi, te Aseka te bogo badu usu nama, te Makeda teba dąį iligi pai. 11 Tama te Amor dabe te Israel ami bidi dabede wi pabo sę elayu, tama augwali te Bethoron te bulu baguba me te Aseka teba wi aiyaba palio. Tialima, Genuai Bidigo te moni kedau ilibo talua ge kulubage te masigi tiwai tulumainu ilama, tama te Amor dabe ela muna silai. Te masigi du tiwai talua ge tulubagego ela muani bidi dabego nambago te Israel bidi dabego ela muani bidi te namba aiyaba elaluai dao.

12 Tama te sogo te Genuai Bidigo te Israel dabe tau selama, tama augwaligo te Amor dabe aiyaba elaluai. Tama Josuago Genuai Bidi dali po miai. Tama te Israel dabe augwaligo gedude agai te po wai,

“Giliga, nage te Gibeon hanu ugwadu dolaluao. Polua, nage te Aijalon bulu odogo ugwadu dolaluao.”

Te po wai dao.
13 Tama te po obaso, te giliga ge dolalubadi, tama polua aiyaba me dulisąbadi, te Israel dabego te boi bidi dabe aiyaba elalubo siba usu nai. Giliga ge te polo me dega sigi pabeo. Aga te dagalude dolaludubadi, te deli sogo bubuga te tiwai usu nai. Tama augwaligo te sę yali po te Doloba Pai Bidi Dabede Po Wabo Bukude asęai dao. a  14 Te polobadu sogo tede gagalasa, asama, tama megi e po asębo sogoba usu nagasobo, te tiwai sę me deli te me ebeo. Genuai Bidigo te bidi me deligo po odama, tama te Israel dabego hwįbode te agai augwali tau sai dao!

15 Nosali Josua te ami bidi dabe dali augwali te augwa bidali pesage te Gilgalba ma palio. 16 Tiali goli, te a naga tuni bidi dabe wi pelama, tama te bulu Makeda tede te masigi ola bede geme dualaludai. 17 Tama bidi mebago augwali dualalubo sulama, tama augwaligo Josuabolo te augwali dualalubo pesage te po wai. 18 Tialima, Josuago te po wai, “Te genuai masigi meba hogogobele pelama, tama te ola be dalalubo te paliama, tama te tonaluabo ami bidi meba teba munama te tonaluao,” wai. 19 “Tiali goli, duga digi tede olo me bidilamuo. Dage te gasa boi bidi dabe wali pelama, tama augwali tudi badu te nosali asali bidi dabe dalibolo hwįgi pao. Dagego augwali te augwa hanuba sabalomainogo sula tagalamuo! Magi baso meni, God, dago Genuai Bidigo, te dagego hwįbo bomo usu elama, te boi bidi dabe aiyaba elaluaibao po wai dao,” wali.

20 Tialima, Josuago me te Israel dabe augwaligo dali te boi bidi dabe tigidali pąde ela silainu yai. Tiali goli, meba wi peyu, te augwa hanu tomoba geme duala sigi palio, te hanu te genuai bomai obo elaluali. 21 Nosali Josuago ami bidi dabe tigidali augwali te Makedaba ma geasa asai. Te me dedeli me dolobeo. Tama tibaso, mena bidi me deligo te dwai posobo po te Israel dabebolo me wainogo ebo usu me isiąwai dao.

22 Nosali Josuago po ma wali, “Te masigi ola be paliali po dala sąnama, tama te a naga tuni bidi te ena bidiboba odasa asao,” te po wai. 23 Tialima, augwaligo tama tiwai yalio. Te bidi dabe augwaligo te Jerusalem hanu tuni bidi, me te Hebron, me Jarmut, me Lakis, me Eklon, te tama a naga hanu tuni bidi dabe te Josua bidiboba odasa palio. 24 Augwaligo te augwali te Josua bidiboba odasa aselawai madi, tama agai te Israel dabe tigidali i wali, tama agai te aga dali pali te ami bidi dabego ofisa bidi dabebolo te po wai, “Dage eba aselama, tama dagego sągą te tuni bidi dabego mageba agayao,” wali. Tialima, augwaligo tama tialio.

25 Nosali Josuago te ofisa bidi dabe augwalibolo te po wai, “Dage wi eyu, tama didibili munu me elamuo, bomonama dolaluao, te dagego nosali augwali dali hwįabo boi bidi dabebolo te Genuai Bidigo te tiwai naga ilaibao,” wali. 26 Nosali Josuago te tuni bidi dabe elama, tama augwali te ni pedai a nagade walalio. Augwali te nide walalubadi, te sia ge aiyaba dulai dao. 27 Tama be pio mu ebode, Josuago te bidi dabebolo olama, tama augwaligo te tigi dabe aiyaba sela dulama, tama augwa te dualaluali ola be tomoba sąwai. Tama te ola be augwaligo te moni genuai masigigo paliai. Tama te masigi dabe e po asębo sogode me elalubo dao.

28 Te sogo naga Josuago te Makeda hanu pedela sigi pelama, tama te hanude bidali tuni bidi pageabi yai. Tama agai te hanude bidali we bidi tigidali ela silai. Te deli me bidibeo. Agai te deli tobage tiwai kolesaga naga te Makeda tuni bidi dali yai, agai te Jeriko hanu tuni bidide yali sę tiwai gilama naga yalio.

29 Te silama nosali, Josua aga ami bidi dabe dali augwaligo te Makeda hanu tagalama, te Lipna hanuba pelama, tama augwaligo te hanude bidibo bidi dabe augwali dali hwįgi palio. 30 Tama Genuai Bidigo te Israel dabe augwali tau selama, tama augwaligo te boi bidi dabe augwali aiyaba elaluama, tama te hanu selama, te hanude bidali tuni bidi me pageabi yai. Tama Josuago te hanude bidali bidi tigidali ela silama, tama deli digi me bidibeo. Agai te tuni bidibolo te Jeriko tuni bidibolo yali kolesaga tiwai naga yai dao.

31 Te silama nosali, Josua aga ami dabe dali augwaligo te Lipna hanu tagalama, tama te Lakis hanuba pali. Augwaligo te hanu bobegelama, tama augwaligo te Lakis hanu bidi dabe dali hwįanio. 32 Genuai Bidigo te Israel dabe augwali tau selama, tama te si sogo wabode augwaligo te boi bidi dabe aiyaba elaluali. Tama Josuago me deli sula me tagalobeo. Agai tigidali bidi ela muai, agai te Lipna hanude yali tiwai gilama yalio. 33 Te Horam, te Geser hanu tuni bidi, aga aselama, te Lakis hanu bidi dabe tau sagasai. Tiali goli, Josuago aga me, te aga hani bidi dabe dali, te hwįanigo augwali aiyaba elaluai. Tama Josuago augwali me deli bidimainu me gogola tagalobeo.

34 Te silama nosali, Josua aga ami bidi dabe dali augwaligo te hanu Lakis tagalama, tama te hanu me nogi Eklonba pai. Augwaligo te hanu bagulama, tama augwaligo te Eklon dabe augwali dali hwįanio. 35 Augwaligo te hanu te deli sogo bubugade naga salio. Tama Josuago te hanude bidali bidi tigidali ela muani, te agai Lakis hanude yali tiwai gilama yai.

36 Te silama nosali, Josua aga ami bidi dabe dali augwaligo te Eklon hanu tagalama, tama te Hebron hanuba pai. Tama augwaligo te Hebron hanude bidali bidi dabe dali hwįnama, 37 tama te hanu sai. Tama augwaligo te tuni bidi eleyu, tama te Hebronde bidali we bidi dali tigidali elebadi, te gasa dwasianu hanu pąde bidaluali bidi dabe dali tigidali elalio. Tama Josuago te Hebron hanu tigidali mu dolali, te agai Eklon hanude yali tiwai gilama yai. Tama te hanu bidi me deli me bidai menio.

38 Nosali Josua aga ami bidi dabe dali augwali begelama, tama te Debirba pelama, tama augwaligo te Debir dabe dali hwįgi pai. 39 Augwaligo te hanu dali, te tuni bidi me siyu, tama te gasa pąde elalubo dwasianu hanu dabe me sai. Augwaligo tede bidali bidi dabe tigidali ela muai. Josuago te dedeli kolesaga tiwai naga te Debir hanude bidibo bidi dabebolo me te tuni bidi dali tiali, agai te Hebronde me te Lipna hanu side te augwa tuni bidi dabe dali yali kolesaga tiwai naga yai dao.

40 Tama elama, tama Josuago te tǫ tigidali badu te hwįanigo aiyaba elaluai. Agai te bulu dude bidali tuni bidi dabe me, te Negev dabe badu tuni bidi dabe me, te tǫ malude bidali tuni bidi dabe me, te bulu du pąde bidali tuni bidi dabe me, te agai augwali aiyaba elaluai. Agai bidi deli me sulama, gogola me tagalobeo. Agai tigidali ela muai. Agai te Israel dabego Genuai Bidi Godigo te agabolo wali po tiwai gilama yalio. 41 Josuago te giliga bogo badu te Kades Barneade gagalasa, te Gasa te nabis pąba dąį elama bidali bage tigidali aiyaba elaluali, tama te Gosen tǫ elalubo badu tedu dąį elama, te Gibeon badu, te tǫ me bogo badu usu nigi pai dao. 42 God, te Israel dabego Genuai Bidigo, te augwali tau sobaso, tama augwaligo te tigidali tǫde bidali tuni bidi dabe tigidali augwali aiyaba elaluama, tama augwaligo tǫ te hwįanigo naga sai dao. 43 Nosali Josua aga ami bidi dabe dali augwali te augwa bidali pesage te Gilgal teba ma pai dao.

Copyright information for `MPS