a[Nam 35:6-32; Bom 4:41-43; 19:1-13]

Joshua 20

Te bidi dabe teba wi pabo hanu dabe

Nosali Genuai Bidigo te tiwai po Josuabolo wali, “Nago te Israel dabebolo wao, ‘Dagego te bidi dabe teba wi pomainu yabo hanu dabe meba nogo tų ilao, te eno Mosesbolo olama, te dagebolo wali, te tiwai gilama yao. Magi baso meni, te niwai bidi mego te gasa bidi me ela muai madi, tiali goli aga dali te boi isąma tama tiali, tama bidigo me konebe, te bidi aga digi te gasa bidi me ela mubo digi homu isąma te konebe, teda aga te hanu dabe te me deli teba pomainogo yao, te boi wei ponobo bidigo aga ela muidali weyu yao. Aga te hanu dabe me deliba wi pelama, tama te po tų yabo madi te hanu genuai sunumi teba pedelama, tama te tobolu bidi dabebolo te sę mena tama yali po te hanilama pusumainogo yao. Nosali te tobolu bidi dabego aga te hanu tomoba pomainogo yaibao, tama augwaligo te aga augwali dali bidabo pesage te bulu menama bidimainogo yaibao. Tama te wei ponainogo yali bidigo te aga wali pobeasa pelama, te hanuba pedalubaso da, teda tede bidibo bidi dabego te wi asali bidi te aga nogoba elimainogo magobeo. Magi baso meni, agai wado elama, te bidi me elibeo. Menio. Tama agai abagi Israel me deli ela muabo homu ebeo. Tama tibaso, te we bidi augwaligo te wi asali bidi bugagia tonaluaibao. Tama aga te hanude bididubadi, te aga po tų te tigidali bidi gedude ilibo sogoba usu nao. Tama nosali aga tede bididubadi, tama te sogo bidali te het pris isibo sogoba usu naibao. Teda nosali te aga page bulu ma pabo te usu da, te aga polobadu wi soyu taga soali buluba ma pomainao,’” Genuai Bidigo te we bidibolo pusabo po te Josuabolo wali.

Tama po obaso, te we bidi augwaligo te Kedes hanu te Galili badu, te Naptaligo bulu du elalubo badu dąį ilali, tama te Efraimgo bulu du badu te Sekem hanu dąį ilibadi, tama te hanu Kiriat Arba, te gasa nogi Hebron tama, te Judago bulu du badu elaluai. Te Jordan wę u badu, te giliga pedalubo badu, te Jeriko te masigi kemi tǫ badu dąį ilali, augwaligo te Rubengo tǫde te Beser hanu tǫ dąį ilali, tama me te Ramot hanu te Gileat bulu te Gatgo tǫ badu, tama me te Golan hanu te Basan bulu tomode, te Manasego tǫ badu elaluai. Te tama hanu dabe te tigidali Israel dabe geme duala sigi pabo hanu dabe nigilali, te gasa bulu bidi dabe te augwali dali bidali bage me te hanuba naga wi duala sigi pomainogo yali. Tama te bidi me deligo te gasa bidi me elibaso da, tiali goli te agai aga dali boi bidi eyu me elibe, teda aga pelama, te hanude bugagia bidigi pagameo. Tama te bidigo wei ponainu wali pali bidi, agai te bidi me elamuo, tama te bidi te tigidali bidi dabe gedude te po tųba pedalumainogo emai hagede yao. a 

Copyright information for `MPS