a[Gag 11:27]
b[Gag 12:1-9; 21:13]
c[Gag 25:24-26; 36:8; 46:1-7; Bom 2:5]
d[Sai 14:1-31 ]
e[Nam 21:21-35]
f[Nam 22:1-24:25]
g[Jos 3:14-17; 6:1-21]
h[Sai 23:28; Bom 7:20]
i[Bom 6: 10-11]
j[Jos 19:49-50]
k[Gag 33:19; 50:24-25; Sai 13:19; Jo 4:5; Tpi 7:16]

Joshua 24

Josuago te Sekemde we bidi dabe dali po miani

Josuago te Israel hani tigidali te Sekemba sisinani, tama nosali agai te tobolu bidi dabe me, te genuai bidi dabe me, te tonalubo bidi dabe me, te augwali tigidali i olama, sisinama, tama augwali te God gedude doligi pali. Tama Josuago te tiwai po te tigidali we bidibolo wali, “Te Godigo po, te da Israel dabego Genuai Bidigo po, te tiwai obao, ‘Polobadu mu te dagego wąį dabe augwali te wę Yufretis pedai u badu bidali. Tama augwaligo te tibo godiba lotu po wai. Te wąį me deli nogi te Tera, tama aga te Abraham de Nahor sigo aya dao. a  Tiali goli, eno te duga wąį Abraham te wę Yufretis u badu elaluali tǫde selama, tama eno aga te Kenan tǫ pedai tigidali badu selasa bilali. Tama eno te agabolo wąį hauwa mani. Eno te ogwa Aisak deli agabolo mani, b  tama eno ogwa si mani, Jekop me Iso, te Aisakbolo mani. Tama eno te bulu du Seir, aga gasa nogi me Idom, te Iso mani, te aga tǫ gagalama bidali. Tiali goli, Jekop me, te aga hani wai dabe dali, augwali te Isipba pali.’” c 

“‘Te nosali eno te Moses de Aron si tagala palama, tama eno te dwai nai dabe mugo te Isip dabe mu dolali. Nosali eno dage te Isip taga soyu, tama eba odasa asali. Eno dagego aya selama, tama te Isip taga soyu asali. Tama te Isip dabego te bomai hwįbo nai karis, me hos me selama, tama dage soali wali pobeasa asali, te augwali te nosai elalubo tamu ąįba sabolali. Tiali goli, te aya dabe augwali wi elama, tama eno te Israel dabe tigidali augwali tau somainogo te i bomonama mu wali, tama eno te be hulia sabo tiwai te augwalide te Isip ami dabe dali si tomode muani. Tama eno te tamu ąį peda pomainogo ilama, tama te Isip dabe mesega sali. Dagego eno te Isip dabede yali sę te dagego suai dao. Tama nosali dage te kemi tǫ bulude sesabi elama, hauwa sogo mu bidali.’” d 

“‘Nosali eno dage te Amor dabego tǫba te Jordan wę pedai te giliga pedalubo badu odasa pali. Tama augwaligo dage dali hwįani. Tiali goli, eno dage tau selama, tama dagego augwali aiyaba elaluali. Tama dagego augwaligo tǫ sali, magi baso meni, ena polasa peyu, tama eno augwali dolali. e  Nosali Balak, te Moap dabego tuni bidi Siporgo ogwago, te dage Israel bage dali hwįani. Agai po te Balambolo ola tolali, te Beorgo ogwa, tama agai te po dwai me deli weyu, tama dage dolomainogo hanalu wali. 10 Tiali goli, eno te Balamgo po odobo hagela homu yali, tama agai te dwagi yai mobo dagebolo maidu geani. Tama eno dage te Balakgo nogode ma dobola sali.’” f 

11 “‘Dage te wę Jordan nogelama, te Jerikoba sabolali. Tama te Jeriko bidi dabego dage dali boi hwįani. Tama te Amor dabe me, te Peres dabe me, te Kenan me, te Hit dabe me, te Girgas me, te Hivi dabe me, te Jebus dabe me, te augwaligo me dage dali boi hwįani. Tiali goli, eno augwali dagego nogoba muani. g  12 Ena dage asobadi polasa peyu, tama eno digi te boi bidi dabe wi ilama, tama augwali sela sąwai dao, tama te tialigo te Amor tuni bidi si wi pomainu ilali. Tiali goli, duga digi te poai hwą ge bainatgo, me te sesemonego te augwali si gudulu baso wi me pabeo. h  13 Tama tiyu, eno dagebolo te tǫ me deli te duga digi sę me isąwai digi, te tǫ dagebolo mani. Tama eno dagebolo te dagego me nigisiąwai hanu me mobadi yali. Megi dage te bulu dabede bidaluyu, tama dagego te ni du wain, me te ni oliv me tuyu bidibao. Tiali goli, te duga digi me bulusiąwai dao,’ dago Genuai Bidi God agai te po obao,” Josuago te po wai. i 

14 Tama Josuago po ma weyu, te po wai, “Tialima, megi da, dagego te Genuai Bidi dologode bidiyu, agaba lotu po weyu, tama sesemane sogo dagego agade sę te dagego bomo tigidali teba munama, sę yao. Dagego te tibo godiba homu kone ebo tagalama, te duga wąį dabego te Mesopotemiade me te Isip pedai badu side bidali sogo augwalibolo te lotu po wali. Dagego te Genuai Bidiba naga lotu po wao. 15 Tiali goli, dagego te Genuai Bidiba lotu wabo hagela homu ebaso da, teda dagego bugagia homu kone palao. Te dagego lotu po debolo waibawe? Te duga wąįgo te Mesopotemiade te tibo godiba lotu wali te Godiba lotu po waibawe? Ma, te Amor dabego tibo god, te megi te dage te bidibo tǫde te Godiba lotu waibawe? Tiali goli, ena, te ena we wai sibi dali, te dago da te Genuai Bidiba naga lotu po waibao,” Josuago te po wai.

16 Tama te we bidi augwaligo te tiwai po wei ponoyu, te po wai, “Dago te Genuai Bidi tagalama, te tibo god dabeba lotu munu me wagobeo! Mu menio! 17 Te Genuai Bidi deli naga te dago God, tama agai te da dali, te dago aya dede dali, te Isip kalabus sęde bidibadi, te da ma dobola selama, odasa asali. Tama dago te agai te ebo bomai sę suali. Te da gasa hani dabego tǫde bilaluali sogo, tama da te mena pabo sogo me, te Godigo da bugagia tonalualigo te da bugagia bidali. 18 Te da asali sogo, Genuai Bidigo te tigidali hani bage ela gudulubo sę yali, te Amor dabe dali, augwali te e tǫde bidibadi tiali. Tama tibaso, dago me te Genuai Bidiba lotu waibao wali. Aga deli naga te dago God dao,” augwaligo te po wai.

19 Tialima, Josuago augwalibolo te po wei ponani, “Te dagego homugo te Genuai Bidiba lotu po wabo homu ebawe? Aga te magi dwai sę isiąma, tama agai homugo te dagego tibo godiba lotu wabo hagela homu ebao. Agai homu te tibo god me deligo aga me hasegelegobeo. Te agai dagego sęgę me dwai sę yali te me sela sągobeo. 20 Tama mu tama, agai polobadu dagebolo wiegi yai sę mu yali, tiali goli te dagego Genuai Bidi tagalama, tama te gasa hanigo tibo Godiba lotu po obaso da, teda Genuai Bidigo po wado po olama, tama agai dage dene ilama, tama agai dage dolaibao,” te po wai.

21 Tiali goli, te we bidigo Josuabolo te tiwai po wei ponani, “Mu menio! Te sę me egobeo. Te dago Genuai Bidiba naga lotu po waibao.”

22 Tialima, Josuago augwalibolo te po wali, “Duga digi haninama pusali, tama duga digi te Genuai Bidiba naga lotu po wabo po dąų wali.”

Tama augwaligo te po wali, “Te tama dao! Dago haninama po pusali. Te dena digi dade wali po dao.”

23 Tama Josuago po ma wali, “Tialima, dagego te gasa hani dabego te tibo god dage tomode bidalubo te dagego sela sąyao. Tama dagego duga homu tigidali te God, te duga Israel dabego Genuai Bidiba muao.”

24 Tama te we bidi augwaligo Josuabolo te po wali, “Dago te Godiba lotu wainogo, te dago Genuai Bidi, tama aga bomai po naga wali paibao.”

25 Tialima, te sogo Josuago te we bidi dabe dali po me deli dąų walali. Tama te bulu Sekemde Josuago te bomai po me te po me asęnama, augwalibolo mani, te augwaligo wali pomainogo. 26 Josuago te po dabe te Godigo bomai po elalubo buku me deli tomode asęani. Nosali agai te masigi me deli selama, tama te ni kali pąde, te Genuai Bidiba lotu po wabo madi pąde te masigi dolaluama, muani.

27 Tama Josuago te we bidi augwalibolo wali, “Te sesemane sogo dago te masigi subo sogo da, te dago homugo te dago te dąų wali poba homu kone ma palaibao. Te masigigo te Genuai Bidigo dabolo wali po tigidali odali. Te dage homu hodolabo dąį me deli te ilali, te dagego te dena Godigo po munu me sela sąnamu dao,” te po wali.

28 Nosali Josuago te augwali te augwaligo sabo tǫba ma tagala palali. Tama tigidali te augwa buluba ma pelawali.

Josua de Eleasar si isali

29 Nosali Josua, te Nungo ogwa, te Genuai Bidigo sę bidi, aga isali. Tama aga isali sogo agai kibu be te 110 kibu be yali. 30 Augwaligo aga te tǫ doba yali sogode agai sali tǫ Timnat Sera tede pubulali. Te bulu te not te bulu du Gas, te Efraimgo bulu du, te pedaide dao. j 

31 Te Josua bidibadi, te sogo da, te Israel dabego te Genuai Bidiba lotu po uduai. Tama nosali te Josua isai madi me te augwaligo Genuai Bidiba lotu po udali. Augwaligo tama tidubadi, te Genuai Bidigo te Israel dabe tau siyu ebo sę suali te genuai bidi dabe augwali me isali.

32 Te Josepgo dili te we bidigo Isipdu tolasa asali, te augwaligo te Sekemde pubulali, augwaligo te Jekopgo te mone 100 silvago te Hamorgo ogwa dabe dali polobadu abelali, te tǫde pubulali. Hamor te Sekemgo aya dao. Tama Josepgo hani augwaligo te tǫ sali. k 

33 Tama Eleasar, te Arongo ogwa, te isibaso, tama augwaligo aga te Gibeade pubulali. Te hanu augwaligo te aga ogwa Finiasbolo mani, tama te Efraimgo bulu du te badu elaluai dao.

Copyright information for `MPS