Joshua 3

Te Israel dabe augwaligo te Jordan wę nogai

Tama Josua te kigamu digi mu hodaluama, tama aga dali te Israel dabe augwali te bidali pesage te Sitim tagalama, tama augwali te Jordan ąįba sabolai. Tama augwali bidabo pesage tede nigai. Augwaligo te wę Jordan nogobeo. Te nosali pabo sela sogo elalubadi, te genuai bidi nigali bidi dabe te pesage tomode biliyu, tama te we bidibolo te tiwai po wai, “Dagego te Livai dabego pris bidi hani dabe augwali pabo subo sogo, tama te dago Genuai Bidi Godigo bomai po dąų wali po muani halobage tolasa pobaso da, teda dage hogodama, te duga tigidali doado bage selama, tama augwali wali piąo. Tama tiyu, dage pabo sunumi te duga konemainu ebao, magi baso meni, dage te buluba polobadu me sabolisiąwai. Tiali goli, te bomai po dąų olama muani halobage pąba dage munu me pelamuo. Menio. Dage te dwasianu digibulu gana te po dąų wali halobage tolasa pabo wali pao,” te genuai bidi nigali bidi dabego augwalibolo wali.

Tama Josuago te we bidi dabebolo te po wai, “Te duga homu me kolesaga dodolobo sę iliyu, lotu po wao, magi baso meni, do da, te Genuai Bidigo noma sabo bomai sę te dage tomode yaibao,” wali. Nosali Josuago te pris bidi dabebolo te po wai, “Dagego te bomai po dąų wali halobage te we bidi augwali nosaliba ilama, polasa te halobage tolasa pao,” wai. Te augwaligo tama tiai dao.

Tialima, Genuai Bidigo Josuabolo te po wai, “Megi da, te eno nago nogi ugwaba sabo sę te Israel dabe augwali gedude gagalaibao, te ena nage dali bidibo konemainu, te ena Moses dali bidali tiwai gilama yaibao. Nago te bomai dąų wali po muani halobage tolobo pris bidi dabebolo te po wao, ‘Dage te Jordan ąį sesegeba sabalubo sogo, dage te wę tomoba doligi pelama, tonaluyu, bidao,’ te po wao,” wali.

Tama megi da, Josuago te Israel dabe augwalibolo te po wai, “Dage te pąba aselama, te Godigo po odao, te dago Genuai Bidi dao. 10 Megi da, dagego te dena God, te bidibo ula elalubo God, aga te da tomode elalubaso, tama agai te Kenan dabe me, te Hit bage dabe me, te Hivi dabe me, te Peres dabe me, te Girgas me, te Amor me, te Jebus dabe badi, te tama bidi hani dabe te Godigo bomogo sela sąbo te dagego koneaibao. Dagego te Godigo bomo bugagia sula selama, mu konemainu eyu, 11 te Godigo dąų wali bomai po muani halobage te tolasa polasa peyu, te wę Jordan nogobo sogo te tiwai yaibao. 12 Tama tibaso, dagego te Israel hani deli delide te deli deli bidi selama, te nogo si olama, sągągo si bidi nigilao. 13 Te pris bidi dabego te tigidali tǫde Genuai Bidi Godigo te dąų wali po muani halobage tolasa pabode, tama augwaligo sągą te węba agabo sogo, teda te wę tigidali dąų mu ola sigi pelama, tama te wę me soagobeo. Magi baso meni, te ugwadu wę daide te bulu du me dedeli tiwai gilama dolaluaibao,” Josuago te po wali.

14 Tialima, te we bidi augwali te bidali pesage tagalama, te wę Jordan nogoainu yali. Tama te pris dabego te dąų wali po muani halobage tolama, tama augwali polasa pai. 15 Te sogo te inawai nai gide sabo sogo, tama te Jordan wę genuai asobo sogo dao. Tiali goli, augwali te wę sesegeba sabolama, tama augwaligo sągą te węba agabo sogo, 16 te wę togoyu, mu dąų olama, tama te wę ma soabeo. Te wę ugwadu te bobobage bulu du tiwai gilama, te bulu Adamba usu nigi pelama, te wę pesage holai tiwai elaluai, te Saretan hanu me deli pąde yali. Tama te sigi ąį Det Si teba dulubo wę te tigidali sula sai elaluai. Tama te we bidi augwali te wę tomodu pelama, te Jeriko hanu pąba u badu sabolai. 17 Te Israel dabe augwali te tǫ wa pai madi naga pai. Tama te Genuai Bidigo te dąų wali po muani halobage tolali te pris bidi dabe, augwali te wę Jordan sula sali digi te tǫ dolo tomode dolaluali, te we bidi tigidali te wę nogelama, gasaba u badu sabola silibo usu nigi pomainu yai.

Copyright information for `MPS