a[Nam 14:28-35]
b[Sai 12:1-13]
c[Sai 16:35]

Joshua 5

Te Israel bidi dabe tigiwali togolama, te Pasova nai te Gilgalde tuai

Te sia ge dulubo badu te Jordan wę badu, te Amor tǫde bidibo te tigidali tuni bidi dabe badi, te genuai tamu ąį Mediterenian te sesegede te Kenan moni tǫde bidibo tigidali tuni bidi dabego me, augwaligo te Genuai Bidigo te Jordan wę wai ilai digi te da Israel dabego te wę nogali po odali. Tama te da Israel dabe augwali pąba asobaso, te tuni bidi dabe augwali wi dwai mu eyu, tama augwali homu didibili mu yai dao. Nosali Genuai Bidigo Josuabolo te po wai, “Te masigi hwą ge poa pai meba nigilama, tama te Israel bidi dabego tigiwali pedai togwao, te Israel dabe augwaligo polobadu yali tiwai gilama yao,” te po wai.

Tialima, Josuago te hwą ge dabe nigilama, tama te bidi dabego tigiwali te dwasianu bulu du me deli tede togwali, tama augwaligo te bulu du nogi poyu, te Tigiwali Togobo Bulu Du dao po wai. Agai te kolesaga yali page, e tiwai. Te Israel dabego te Isip tǫ taga soali sogo, te hwįbo usu yali bidi dabe tigidali, augwali te olo kemi tǫ bulude isila pai dao. Te tigidali bidigo te Isip bulu taga soali sogo, augwaligo te augwa tigiwali togwai. Tiali goli, te idago te olo kemi tǫ bulude ame nani bidi dabe, augwaligo tigiwali te me togosiąwai. Te Israel dabe augwali te nai meni yai olo kemi tǫde bilaludubadi, te kibu be bidi sese si 40 yia yai. Te sogo te hwįbo usu yali bidi dabe tigidali te augwali isila pai. Magi baso meni, te augwaligo Genuai Bidigo po wali me pisąbaso, tiwai dao. Te mu tama Genuai Bidigo te wąį dabe augwalibolo po dąų waliyu, agai te tǫ dabolo mawaibao wai. Te tǫ da, te wiegi yai mu dao. Tiali goli, agai te po wai, te po sela sąbo bidi dabe augwaligo me sugubeo, wai. a  Tiali goli, te augwali bidali pesage hasegelali, te augwaligo ogwa dabe te tigiwali me togosiąwai, te augwali kemi tǫ bulude bilali sogo. Tama megi Josuago te tiwai sę augwalibolo yai. Augwaligo te tigidali bidigo tigiwali togwa silama, tama te Israel dabe augwali te pesagede bidibadi, te bidi dabe augwaligo keni pedela sabo sogoba usu nagasai.

Nosali Genuai Bidigo Josuabolo te po wai, “Polobadu dage te Isip tǫde olo sę eyu bidai, tama dage hale mu yai. Tiali goli, megi eno dage te hale yali sę te dagala sąbao,” wai. Tama tibaso, te e sogo megi bubugade augwaligo te bulu nogi Gilgal wali, te page e dao, “Dagala sąwai.”

10 Te Israel dabe augwali te bulu nogi Gilgal te doloba pai tǫ Jerikode bidaluyu, tama te namba wan polua, dei te 14de, tede augwaligo te hulide te Pasova nai tuai dao. b  11 Te nosali side te Israel dabego te nai bali me wit te Kenande sai. Augwaligo te bali ulama, te bo disąwai nai bret nigilama, tama augwaligo tuai dao. 12 Nosali te sogo te nai mana te munu ma dulubeo. Tama te Israel dabego te Kenande elalubo nai naga selama, tubo gagalalio. c 

Josuago te bainat hwą tolaluali bidi dali po wai

13 Josua te hanu Jeriko pąde bidali sogo, agai bidi me deli te bainat hwą ge tolaluyu, dolalubo suai. Tama Josua aga dwai noma mu selama, tama agaba pelama, tama agabolo hanalu wali, “Nage te dago ami bidi me deli dawe, ma nage te boi bidi me deli dawe?” te po wai.

14 Te bidigo te po wei ponai, “Ena te ami bidi meni, tama ena te boi menio. Ena te Genuai Bidi Godigo ami kepten bidi dao,” wai. Te Josua aga tobolu te tǫba aiyaba mu pogulama, tama agabolo lotu po weyu, te po wai, “Ena nago sę bidi dao. Nago homugo eno mena sę emainogowe?” te po wai.

15 Tama Genuai Bidigo ami bidi keptengo Josuabolo te po wai, “Nago naga sągą nadoba dįą sąyao. Magi baso meni, te nage dolalubo tǫ, te gasa wiegi yai tedali mu elalubao.” Tama Josuago te tiwai tama yai.

Copyright information for `MPS