Joshua 7

Akango dwai sęgę sali po

Hasia sogo Genuai Bidigo te po wai, te Israel dabego te dolabo nai dabego te nai me deli munu me selamuo po wai. Tiali goli, te Israel dabego te po sela sąwai, tama bidi me deli aga nogi Akan, te bidigo te nai meba sai. Tama tibaso, Genuai Bidigo sębę mu te Israel dabe dali eyu bidai. Akan te Karmigo ogwa, Karmi te Sapdigo ogwa, Sapdi te Serago ogwa, te Juda hani dabe dao.

Josua te Jerikode bidiyu, tama bidi meba te bulu nogi Ai teba tagala palai, te hanu me deli te giliga pedalubo badu te Betel badu, te Betaven pąde elaluai. Agai augwalibolo te hanu susa biligi pao po wai. Tialima, te bidi dabe augwali pelama, tama tiwai igi pai.

Nosali augwali ma asu, Josuabolo te tiwai po wai, “Nago te tigidali bidi pomainu mu elamuo. Te bidi sese sigo te umabo bidi hauwa mu 2,000, ma te bidi sese sela wabogo te umabo hauwa 3,000 bidi naga pelama, te Ai hanuba hwįgi pomainu tagala palao. Nago te tigidali bidi mu tagala palama, te hwįgi pomainogo me elamuo. Te genuai hanu menio,” te po wai. Tialima, te Israel ami bidi dabe te bidi sese umabo 3,000 bidi mu pali. Tiali goli, te Ai hanu bidi dabego augwali edaba ma pobeasa asai. Augwaligo te Israel dabe te hanu tomoba pabo te genuai sunumidu pobeasa pelama, te masigi pepedebo buluba usu nigi pai. Tama augwaligo te bulu duba aiya dulubo te sunumide te bidi te 36 tama bidi usu nama elai. Tama te Israel dabe augwali wi mu elama, tama bomo elama me dolalubeo.

Josua te homu sęgę mu elama, tama aga gudali ugwa pisąwai. Tama aga te Genuai Bidigo bomai dąų wali po halobage munalubo pąba te aga gesabidi te tǫba degasa dulama, munaluai. Tama te Israel dabe tonalubo bidi dabe augwali me te Josua dali tǫba degasa dulama, tama augwali tede bididubadi, te giliga aiyaba dega sigi pai. Augwaligo homu sęgę ebo te sa muyu, te augwa tobolude te tǫ hogomu muanio. Tama nosali Josuago te po wai, “O God, Genuai Bidio! Magi elama, nago da te Jordan wę e badu odasa asaliwe? Nago da te Amor dabego nogoba menama, da dolomainogo yai dawe? Magi baso da te wę Jordan u badu bidimainu yai meniwe? O Genuai Bidio, te Israel dabego te boi bidi dabe augwali tudiba ilama, tama augwali wi eyu, ma geasa asalio. Te eno magi po wagawe? Te Kenan bidi dabego, me te e tǫde bidalubo gasa tigidali we bidi dabego te sę yali po odaibao. Tama tiyu, augwaligo da bobegelama, tama da tigidali elaibao! Tama naga nogi ugwaba sabo sę te nago megi magi elama yaibawe?” Josuago te po wai.

10 Tialima, Genuai Bidigo Josuabolo te po wai, “Hodaluao! Magi elama nage te tiwai tǫde pila mubawe? 11 Te Israel dabe augwaligo dwai sę yalio! Hasia eno augwalibolo habu seliyu, te Jeriko hanude elalubo nai dabe me sigio po wai, tiali goli augwaligo eno po sela sąwanio. Tama eno augwalibolo te dolao po wali nai dabe meba te augwaligo salio. Augwaligo te nai dabe wi selama, tama augwaligo tibo sę elama, tama augwaligo te nai dabe te augwa nai dabe tomoba geme dualalio. 12 Tama tialigo te Israel augwali bomo elama dolalu, te boi bidi dabe dali hwįabo te usu ebeo. Megi da, augwali te boi bidi dabe dali hwįbo wi soai, magi baso meni, te augwali dolomainao! Te dagebolo eno habu selali nai dabe te dagego dolisiąbaso da, teda ena munu me dage dali bidimainogo egobeo,” Genuai Bidigo wali.

13 “Tialima, hodaluao! Nage pelama, te we bidi dwagi yai ilama, tama augwali ena gesabidiba do asomainu sisi wiegi yai iligi pao. Magi baso meni, ena dagego God te eno po te elalubao, ‘Dage Israel dabe, dagego eno dagebolo te habu selali nai dabe meba salio. Dagego te nai dabe sela sąsiąbaso da, teda dagego te boi bidi dabe aiyaba me elalugobeo. 14 Tialima, te kigamu digi te dagego hani tigidali deli deli te ena bidibo madi sabolao. Te nai wi sali bidi hani haninimainogo tama tiao. Tama te hani me deli eno sa mubaso da, teda aga te hani bage tigidali deli deli bidi te ena bidiboba pedelao. Tama mena hani bage te eno nogo tų ilibaso da, teda aga hani we wai hani tigidali deli deli te sabola silao. 15 Tama mena bidigo eno te habu selali nai dabe saibaso da, teda dagego te bidi dali, te aga we wai puluba dabe dali, augwali te isimainu siaba ulama, tama aga tigidali doado bage dali ulaibao. Te bidigo te dwai sę genuai yaligo, tama te Israel dabe augwali hale dwai mu ilai. Tama agai te we bidigo ena dali dąų wali po togolama, bolalio,’ te po augwalibolo pusao,” Genuai Bidigo te po Josuabolo wai.

16 Tialima, Josua te kigamu digi mu hodaluama, tama te Israel hani tigidali deli deli pedalumainu ilalio. Tama agai te Judago hanibolo hasia mu sa muanio. 17 Agai te Judade te sibi bage tigidali te odasa asama, tama agai te Serago sibi sa muai. Tama Josuago te Serago hani sibi tigidali deli deli pedela silabo sę yalio. Tama agai te Sapdigo hani bage dolo sa muai. 18 Tialima, Sapdigo te aga hani tigidalide te bidi deli deli wasilama, tama Josuago te bidi Akan nogo tų ilai. Akan te Karmigo ogwa, tama Karmi te Sapdigo ogwa, tama Sapdi te Serago ogwa, te aga Juda hani dao.

19 Tama Josuago Akanbolo te po wai, “Ogwao, megi nage te Israel dabe dago Genuai Bidi God gedude dolugulama, tama nago te yali sę po dabe hanilama, hania pusao. Nago enade magi sę me deli munu me dualigio,” wali.

20 Tialima, Akango te po wai, “Mu tamao, eno dwai sę te Genuai Bidi, da Israel dabego God, agai gedude yalio. Megi nagebolo eno te yali sę po pusubao. 21 Te dago hwįyu, te Jeriko dabego nai dabe sali sogo, eno te nai dabe tomode te Babilon dabego sawi yai bobobage gudubo ugwa me deli suali, tama te silva sęgę me badu te 2 kilo usu badi, te gol me badu te sęgę deli usu elalubo eno suai. Eno te nai dabe pesa mu ebaso, tama augwali eno sai. Nago te eno ugwa be tomode munalubo gegelama, suagameo. Eno tigidali te tǫba pubulama, tama silva te dologode mu munalubao,” te bidi Akango te po wai.

22 Tama te po obaso, Josuago te bidi meba tagala palama, augwali udulama, te ugwa beba pai. Tama augwaligo te Akango po wali tiwai gilama te gegali, tama silva te gasa nai dologode mu munalubo suai. 23 Augwaligo te nai dabe selama, tama te Josua me te Israel bage tigidali bidiboba sela pai. Tama te Genuai Bidigo gedude augwaligo te tǫba muai.

24 Tialima, Josua dali te Israel dabe tigidaligo te Akan dali, te silva dabe badi, te ugwa me, te gol dage me, tama aga te ogwa dabe me, te aga wegi dabe me sobadi, tama te kibu bulmakau dabe badi, te donki dabe badi, te sipsip dabe me, te aga doado bage tigidali me sai. Augwaligo te tigidali nai dabe te selama, Akor bulu odogoba dulai dao. 25 Tama Josuago te po wai, “Magi elama nago te genuai sęgę daba sela asai dawe? Tama megi da, te Genuai Bidigo nagebolo me te sęgę mubao!”

Te po ola silama, nosali te tigidali pali we bidigo te Akan aga we wai puluba dali tigidali te masigigo ela silama, tama augwali dali te augwa doado bage dali augwali tigidali te siago dai dao.
26 Tama augwaligo te masigi dabe hauwa te Akan aga we wai puluba dali augwali tigiba te masigi pesage holai. Tama te masigi pesage holali te e po asębo sogo me elalubao. Tama augwaligo te bulu nogi Akor poali, te sęgę pedelai bulu odogo dao. Augwaligo tama tialigo, tama Genuai Bidigo homu kedau ilai dao.

Copyright information for `MPS