Judges 3

Genuai Bidigo te Israel hani tomode te gasa we bidi hani meba te Israel we bidi dabe tomode bidimainogo tagalali, te Kenan tǫde, magi baso meni, agai homugo te Kenan dabe dali moni boi hwįani sogo te boi hwįsiąwani Israel bage te augwaligo bomo te sogo usu sela suainu, te Genuai Bidigo tama tiali. Genuai Bidigo tama tiwai kolesaga yali, te gesi hani Israel dabe deli deli te wąbi hwįbo kolesaga ola mayu tama tiali. Te e tama hani we bidi, te Godigo augwali bidimainu yali: te Filistia dabe a naga hanu, tama tigidali hanu te Kenan dabego me, te Saidon me, te Hivi dabego me, te bulu du Lebanonde bidali, tama te bulu du Balhermon te pelama, te Hamat Sunumi tulu mage si teba usu nigi pali. Genuai Bidigo te hani dabe augwali bidalumainu elama, te Israel dabe dali te hwįbo usu somainu yali, te augwaligo agai bomai po wali pabowe naga koneainu yalio. Te bomai po dabe te Godigo te augwa wąį dabebolo mani, te Mosesgo nogode mawai dao.

Tama te Israel dabe augwali te Kenan dabe, me te Peres dabe, me te Hit dabe, me te Amor dabe, me te Hivi dabe, me te Jebus dabe, te tama hani tomode te Israel dabe bidaluai. Tama te Israel dabe augwaligo te hani dali we si elama bidiyu, tama augwaligo tibo godiba lotu weyu yali.

Otniel

Te Israel dabego te augwa Genuai Bidi, te God te augwaligo homugo konesiąyu gegeda palali. Augwaligo dwai sę eyu, tama augwaligo te god Bal dali, te god we Astarte, te god dabe siba lotu wali. Tama Genuai Bidigo te Israel dabe dali wado po olama, tama agai te gavman tuni bidi Kusan Risataim te Mesopotemia bulu bidi asomainu elama, te augwali aiyaba elaluali. Te Israel dabe augwali te gavman tuni bidi Kusan Risataim tego bomo dologode bididubadi, te kibu be a naga olama, me badu sela bidai. Tama te Israel dabe augwaligo Genuai Bidiba gela obaso, tama Genuai Bidigo te bidi me deli sa munama, te augwali te gavman tuni bidigo bomo dologode bidibo tagalumainu yali. Te bidi aga te Otniel aga te hwįbo madiba pelama, tama Genuai Bidigo te bidigo te Mesopotemia gavman tuni bidi aiyaba elalumainu ilali. 10 Tama Genuai Bidigo Mobo Bidi te Otnielba asama, tama aga te Israel dabego tobolu bidi pedelali. Tama Otnielgo te Mesopotemia gavman tuni bidi dali hwįgi pelama, tama Genuai Bidigo aga tau selama, tama agai augwali aiyaba elaluali. 11 Nosali te bulu bidi hani dali me boi hwįsiąbadi, te kibu be bidi sese si bidali. Tama Kalep aga ama Kenas aga ogwa Otniel, te aga isali.

Ehut

12 Te Israel dabe augwaligo dwai sę Genuai Bidi dali ma yali. Tama tibaso, Genuai Bidigo te genuai bomo te Moap gavman tuni bidi Eklonbolo menama, tama agai te Israel dabe aiyaba elaluali. 13 Te gavman tuni bidi Eklongo te Amor dabe me te Amalek dabe dali selama, tama augwaligo te Israel dabe aiyaba elaluama, tama te hanu nogi Ni Pam te nogi poali hanu me sali. 14 Tama te Israel dabe te gavman tuni bidi Eklongo bomo dologode bidiyu, tama augwali agade te kalabus sę idubadi, te kibu be 18 tama kibu be bidai.

15 Tialima, te Israel dabe augwaligo Genuai Bidiba gela obaso, tama agai bidi me deli augwali te boi bidigo nogode bidibo tagalumainu sa muani. Te bidi aga nogi te Ehut, aga te pobase nogo yai bidi, tama te Benjamingo hanide te Gerago ogwa dao. Tama te Israel dabego te gavman tuni bidi Eklon te wiegi yai homu ilibo nai tolali, te Moap gavman bidi bidai, tama te nai te Ehutgo sela pali. 16 Ehutgo te aga hwą ge bainat te tedali nigali. Te hwą ge poai te si badu elaluali, tama te bobage gana elaluali te hap mita. Tama agai te hwą ge te aga dolo nogo badu te aga sągąde dąų olama, te gudali ugwa dologode geme dualali. 17 Tialima, agai te wiegi yai homu ilibo doado bage te gavman tuni bidi Eklonbolo magi peyu pali. Eklon te moni genuai tigi ili yai bidi mu bidai. 18 Ehutgo te agai sela pali doado bage te Eklonbolo menama, tama aga dali te doado bage sela asali bidi dabe te augwali pai. 19 Augwali palima, te masigi togolama sabo bulu te Gilgal pąba sabolali, tama Ehut te agaduba ma gelama, tama te bulu Moapba ma sabolali. Agai te gavman tuni bidi Eklon suainu eyu, tama agabolo te po ola tolali, “Tuni bidi, eno po te nage deli dali naga wainogo asalio,” wali. Tama te tuni bidigo aga sę ebo bidi dabebolo te po wali, “Dage piąo,” wali. “Denaduba si naga bidaibao,” wali. Tialima, tigidali sę bidi dabe sese buluba sola silali.

20 Te gavman tuni bidi agaduba deli te kedau asobo be habu te ugwadu daide dulaludali, Ehut agaba asama te po wali, “Eno te nago po te Godidu asali po me deli te nage dali wabo po elalubao,” wali. Te gavman tuni bidi dolugulali, 21 tama Ehutgo te bainat hwą te pobase nogogo selama, tama te hwą ge te tuni bidigo tabide elali madi te hwą ge te tabi tomoba bula sigi pali. 22 Ehutgo te bainat hwą te tuni bidigo tabide dįą sabeo. Tama te hwą poai yali me te hwą ge sigi me te tigidali mu tomoba bula sigi pali. Tama te tabi iligo te hwą ge mesega sali, tama te bainat poai yali te tudi badu pedaligi soali. 23 Ehutgo te be sunumi paliama, dąų walama, tama te gasa sunumidu buluba teda soali, tama aga palio.

24 Te sę bidi dabe aselama suali, te be sunumi palialubo suali, tama augwaligo te homu yali, “Te gavman tuni bidi te di beba pali da,” te homu yalio. 25 Augwaligo sesabi gana elama tonaluali goli, agai te be sunumi dabo sube. Tama augwaligo ki selama, te be sunumi dalama, tama augwaligo suali, te augwa genuai bidi isama, tama te be degedude pila mubo suali.

26 Te sę bidi dabego homu hauwa eyu tonalu dali sogo, te Ehut aga wi soai. Aga palima, te masigi togobo pesage dabe te edelama, tama wi peyu, te bulu me nogi Seira teba geme wi duala sigi pai. 27 Nosali aga te Israel dabego tǫba pedelama, tama agai Efraimgo bidali bulu duba sabolama, te bu wabo nai biugel bu olama, te Israel bidi i olama, te hwįagasao wai. Tama augwali nosali asobadi aga polasa peyu, tama augwali te bulu duba dabe aiyaba dulali.

28 Ehutgo te Israel dabebolo wali, “Dage ena wali asiąo! Genuai Bidigo duga boi bidi, te Moap dabe, te dagego nogoba manio. Te dagego augwali aiyaba elaluaibao,” wali. Tialima, augwaligo te Ehut wali palima, tama augwaligo te Moap dabe soabo sunumi geą sigi pali, te Moap dabe augwali te wę Jordan nogeidali weyu tama tiali. Tama me deli te wę nogelama te me soabeo. Mu menio. 29 Te sogode te Israel dabe augwaligo te Moap dabego bomai ami bidi dabe te bidi sese umabo bidi, te 10,000 bidi ela muani. Te deli munu me wi pabeo. 30 Tama te Israel dabego te sogo te Moap dabe aiyaba elaluai. Tama te tǫde te boi me hwįsiąbadi, te kibu be bidi sese me si me si, te 80 yia bidai.

Samgar

31 Te Ehut tudi badu te gasa tobolu bidi me pedelali, te aga nogi Samgar da, te Anatgo ogwa dao. Agai te bidi sese bidi hauwa elali, te e tama bidi, 600 te Filistia bidi dabe te dwasianu te kibu bulmakau tonalubo ene sesemonego te bidi dabe ela silali. Tama te Israel dabe tau siyu, agai tama tiai dao.

Copyright information for `MPS