Judges 9

Abimelekgo po

Te Abimelek, te Jerubalgo ogwa, te Sekem hanuba pali, te bulude te aga idago deli kanemede ame nani abe dede te bulude bidali. Tama Abimelekgo te aga deli kanemego nigali bagebolo olama, te tiwai po te Sekem we bidibolo hanalu omainu wali, “Dagego homude te mena nai usu yaiba homu ebo dawe? Dagego homugo te Jerubalgo ogwa dabe te 70 bidi tigidali te dagego tobolu bidi bidimainu homu ebo dawe, ma dagego homugo te bidi deli naga te tobolu bidi bidimainao homu ebawe? Tama ena me homu kone palao, ena te dage dali deli kanemego nigai mu dao.” Abimelekgo te po wai.

Tama te Abimelekgo idago deli kanemede ame nani bage augwaligo te agai po selama, tama augwaligo te Sekem we bidi dabebolo pusali. Augwaligo te po odama, tama augwali aga wali pabo homu yali, magi baso meni, aga te augwa idago deli kaneme mu dao. Augwaligo agabolo te ge mone bidi sese sela olama, nogo si, te 70 mone silva te tibo godiba lotu wabo be Balberit tempel bede te mone selama mani, tama agai te monego aga wali pabo dwai bidi dabe abelai. Tama aga te aga ayago be elalubo bulu te Ofra teba ma geasa pai. Tama agai te aga ama dabe te bidi sese sela olama, nogo si bidi dabe te masigi me deli ugwadu daide augwali ela muai. Te bidi dabe te augwali Jerubalgo ogwa dabe naga tama elali. Tama Jotam te Jerubalgo sabi ogwa dao. Aga wi pelama, geme duala sigi pali, tama tiyu te Abimelekgo aga me ela mubeo. Tialima, te Sekem me Betmilo we bidi tigidali augwali sisinama, tama augwali te Sekemde te wiegi yai genuai ni mu elalubo teba pelama, tama augwaligo te Abimelek te augwa tuni bidi king pedalumainu ilalio.

Tama Jotamgo te tiwai sę ebo po odobo sogode, aga pelama, te bulu du Gerisimba doligi pai. Tama agai hae augwaliba wali, “Dage Sekem bidigo, eno po odiąo, tama Godigo dagego po odabo homu yaibao. Te me sogo te ni dabego te ni me deli te augwali tomode te king nigimainu nogo tų yaibao. Tama augwaligo te ni olivbolo po weyu, ‘Nage dago king pedelao,’ wai.

Tiali goli, te ni olivgo tama po wali, ‘Te enade elalubo wel te bidi dabego selama, te augwa god dabeba genuai nogi mabo sę ebo me te bidi dabeba te tiwai ebo dao. Magi baso te eno tagalu, tama te dagego king bidi pedalumainu obawe?’ te ni olivgo te po wai. 10 Tama te ni dabego te ni kayabolo weyu, te po wali, ‘Dago homugo te nage dago king pedalumainu homu ebao,’ wali. 11 Tiali goli, ni kayago te po wali, ‘Magi basowe? Te eno tubo wiegi yai pusu ebo nai tagalu, tama ena dagego king pedalumainu obawe?’ te po wali.

12 Tama tibaso, te ni dabego te ni wainbolo weyu, te po wali, ‘Te dago homugo nage te dago king pedalumai homu ebao.’ Te po wai. 13 Tiali goli, te wain nigo te po wali, ‘Magi basowe? Eno ąįgo te tibo god me te bidi dabe dali augwali te wiegi yai homu pemene ilibo dao. Te eno tagalama, tama ena dagego king bidi pedalumainu homu ebawe?’ wali.

14 Tialima, te ni dabego te sesane elalubo dwasianu nibolo weyu, te tama po wali, ‘Dago homugo te nage dago king pedalumai homu ebao,’ wali.

15 Tiali goli, te sesane elalubo dwasianu nigo te po wai, ‘Te dagego homugo godolo mu eyu, te ena dagego king pedalumainu te homu ebaso da, teda dage aselama, tama te eno nologo dologoba aselama, toma tuagasao. Te meni yani da, teda te dwasianu sesane elalubo nide te sia pedelama, tama te Lebanonde elalubo te wiegi yai ni wuli dabe te siago daibao,’ te sesene elalubo dwasianu nigo te po wali.” Jotamgo te po wali.

16 Tama tialima, Jotamgo te po wai, “Te dagego Abimelek te duga king bidi nigilama bidibo sogo, te dagego wiegi yai te doloba pai kolesaga ebo homu egowe, ma menigowe? Jerubal dali, te aga hani sibi dali, augwaligo te wiegi yai kolesaga elama, dage tau sabo sę yai. Tiali goli, te dagego aga homu te wiegi yai bugagia ilali, ma meniwe? Te menio. 17 Odiąo, te eno ayago dage tau siyu, te boi bidi dali hwįani. Aga digi te tobolu bidi nigilama, tama dage tau siyu hwįnama, tama dage te Midian dabego nogode bidibadi te ma dobola sai dao. 18 Tiali goli, megi da, dagego dwai kolesaga aga dali elama, tama dagego agai hani sibi ogwa dabe dolali. Dagego agai ogwa dabe te 70 bage augwali te masigi me deli daide elali. Te Jerubalgo sę ebo wego te Abimelek ame nai. Te aga deli naga tama ame nani. Tiali goli, megi da, dagego aga te Sekem bulu king bidi nigilali. Dagego homugo te aga duga deli kanemego ame nani da homu elama, dagego tama tialio. 19 Dagego te sę te Jerubal me aga hani sibi ogwa dabe dali yali, te wiegi yai doloba pai kolesaga yali homu eba wida, teda dagego te Abimelek dali te wiegi yai homu pemene iyąo. Tama agai me te dage dali wiegi yai homu pemene emainao. 20 Tiali goli, te sę dwai wida, teda sia te Abimelekde pedalumainu elama, tama te Sekemde me te Betmilo te bulu side bidibo bidi dabe te siago domainu yaibao. Tama tialima, te sia Sekemde me Betmilo bulu side pedalu, tama te siago Abimelek daibao,” Jotamgo te po wai.

21 Jotamgo te po ola silama, tama aga wi pali. Aga te aga ama Abimelekde wi ebaso, tama aga te bulu Ber teba pelama bidigi pai, te nogi page te wę ulu pedalubo madi da wali.

22 Abimelek te Israel dabego king bidibadi te kibu be sela bidai. 23 Tama nosali Godigo te wado po homu ilibo sę te Abimelek tomode me te Sekem bidi dabe dali pedalumainu ilali. Tama te Sekem bidi dabego te aga dali hagoma ebo sę yali. 24 Te sę pedelali te Abimelek dali, te Sekem bidi dabe dali, te augwaligo yali dwai sę wei ponoyu tiali, magi baso meni, te bidi dabe augwaligo aga bomo mayu dąų walobaso, te agai ama dede dabe ela muani, te augwali Jerubalgo ogwa dabe te bidi sese sela olama nogo si te 70 bidi ela muai dao. 25 Tama te Sekem bidi dabego te bidi dabe meba tagala palama, te bulu du dabe mageba duala sigi pelama, tama augwaligo te Abimelek elainu tonaluali. Tiali goli, te bidi dabego te sunumidu asela wali bidi dabe elama, tama augwaligo doado bage dabe siyu yai. Tama Abimelekgo te sę ebo po odali.

26 Tialima Gal, te Ebetgo ogwa, te aga ama dede dabe dali augwali te Sekemba asali. Tama te Sekem dabe augwali te aga wali pai. 27 Tialima, augwali te augwaligo wain giba pelama, tama te tau yali wain du dabe tigidali salio. Tama augwaligo te wain du pęgęlama, tama aga ąį te selama, tama augwaligo genuai nai daa tuali. Tama augwali te augwa tibo godiba lotu wabo be tempel tomoba pelama, tama augwa te nai me wę me tubo sę eyu, tama te Abimelekde dwai posobo po weyu yalio. 28 Tama Galgo te po wali, “Da Sekem dabe da maguai bidi dabe te dago Abimelek wali pobawe? Abimelek te de dawe? Polobadu Jerubal dali, te aga ofisa bidi Sebul dali, te Hamor te Sekemgo aya dologode bidali. Tialima, magi baso dago te Abimelek dologode bidibawe? 29 Tama te tigidali bidi dabe ena dologode bidibaso da, teda eno te Abimelek sela sąwaibao. Te eno agabolo weyu, ‘Nage pelama, te naga ami bidi tigidali sigi pelama, tama aselama, ena dali hwįagasao’ po waibao!” wali.

30 Tama Sebul, te hanude bidibo tobolu bidigo, te Galgo wali po odali, te Ebetgo ogwa, tama agai dwai homu mu elama wado po wali. 31 Tama agai te bidi dabe te Aruma teba tagala palama, tama augwaligo te tiwai po Abimelekbolo wagi pali, “Odao! Gal, te Ebetgo ogwa, te aga ama dede dali, te Sekemba aselama, tama te bidi homu hogodolama, te bidi dabego nage dali hwįmainu ebao,” wali. 32 “Tama tibaso, te hulide naga te nage naga ami bidi dabe dali, dage geme pelama, te bulu tomo busiba duala sigi pao,” wali. 33 “Tama kigamu mu dage hogodama, tama polo te hanuba pelama, tama boi hwįbo gagalao. Tama Gal te aga ami bidi dabe dali aselama hwįagasobo sogo, teda dagego augwali isilibo bidi mu elama dolao,” te po wai.

34 Tama tialima, te hulide Abimelek dali, te aga ami bidi dabe dali, tigidali augwali hogodama palio. Tama augwali hani me si me si buga selama, tama augwali te hanu bagulali obo bulu badu geme duala sigi pali. 35 Tama kigamu mu Gal te hanuba pabo sunumiba dolagasali, tama Abimelek te aga ami bidi dabe dali te augwali dualaluali pesage taga soali.

36 Tialima, Galgo augwali sulama, tama agai te Sebulbolo wali, “Suao! Te bidi te bulu du padodu aiyaba te dulubao!”

Tama Sebulgo te po wali, “Te bidi menio. Nago te bulu du noma bidi sulama, tama nago te bidi yaliwe homu ebao.”

37 Tama Galgo po ma wali, “Menio! Te bidi dabe te bulu padodu dulubao. Tama gasa hani te moni wiegi yai ni elalubo badu holobo sunumidu wali asobao,” wali.

38 Tama megi da, Sebulgo Galbolo te po wali, “Megi da, nago posobo po wali te po mena elalubawe? Naga digi nago te po wai, ‘Abimelek te de dawe? Magi baso da te aga dologode bidibawe?’ Te e bidi dabe augwalibolo te nago posobo po walio. Tialima, megi da, te nage pelama, te augwali dali boi hwįgi pao,” wali.

39 Tama po obaso, Galgo te Sekem bidi dabe selama, tama aga digi te polasa peyu, te augwaligo Abimelek dali boi hwįani. 40 Tiali goli, te Abimelekgo aga pobeasa asobaso tama aga wi palio. Tama Abimelekgo hanigo te Galgo hani bidi hauwa ela muani, tama te bidi dabe augwaligo tigi te sunumidu munalua peyu, te hanuba pabo sunumiba dąį igi pali. 41 Tama Abimelek ma geasa pelama, te Aruma bulude bidai. Tama Sebulgo te Gal dali, te aga ama dede dali, sela sąyu ela gudulali, tama augwali te Sekemde ma bidainu ebo te usu meni yai. 42 Te nosali badu side te we bidigo te hanu tagalama, tama te giba pelawali. Tama me badu bidigo te po Abimelekbolo walali. 43 Tialima, Abimelekgo aga bidi dabe selama, tama hani sela nigilali. Tama augwali geme te bulu tomoba duala sigi pelama, tonalu bidali. Te agai te we bidi augwali te hanu tagalama aselabo side, aga te geme dualaluali pesage tagalama asiyu, tama augwali elagasali. 44 Abimelek dali, aga hani bidi dali, augwali udada pelama, tama te hanuba pabo sunumi pąba doligi pali. Tama te gasa hani si augwaligo te gide bidaluali bidi tigidali dali hwįnama, tama te tigidali ela muai. 45 Tama Abimelekgo te hanu tomode bidaluali bidi dabe dali boi hwįdubadi te be pio igi pali. Agai te hanu siyu, tama te hanude bidali we bidi tigidali ela silali. Tama agai te hanu tigidali aluama dolama, tama agai te hanu tǫba te tamu sąwani.

46 Te we bidi augwali te Sekemde te ami bidi dabego te genuai bomai bede bidalubo we bidigo te tebo sę po odama, tama augwali te bomai be tempel Elberit tomoba pelama, tama augwali geme dualaluali. 47 Te bidi dabego te Abimelekbolo weyu, te tigidali bidi te be tomoba sisinama bidalubo po walio. 48 Tama tibaso, aga dali, aga ami bidi dabe dali, te bulu du Salmon holali. Tama agai te sigi hwą me deli selama, tama agai te ni nologo meba togolama, tama aga magede tolasa pali. Tama agai aga ami bidi dabebolo te tiwai po wali, “Dagego eno e ebo sę suiąo. Tialima, dagego me polo asesa tama tiwai sę iyąo,” wali. 49 Tama tibaso, tigidali bidigo te ni nologo meba togali. Tama augwali te Abimelek pabo wali pelama, tama te sia sela pelama, te be sesegeba sisinigi pai. Tama augwaligo te sia nogonama, tama te siago te be tomode bidali bidi tigidali delama isali. Te pąde te Sekem bomai bobobage bede bidali we bidi dabe umabo 1,000 we bidi te augwali isai dao.

50 Nosali Abimelek pelama, te Tebes hanu tǫ bagua sigi pelama, tama te bidi dabe dali hwįnama, tama te hanu aga sali. 51 Tiali goli, te bomai bobobage be taua me deli te hanu tomode elaluali. Tama tibaso, tigidali we bidi wi peyu, teba pali. Tama augwali te tomoba pelama, tama sunumi paliama, tama te daiba holama bidaluai. 52 Abimelek aselama, tama te taua sainu te boi hwįagasali. Aga te taua te pabo sunumi pąba pelama, tama te pagede sia nogainogo yali. 53 Tiali goli, we me deligo te wit halulu pabo genuai masigi selama, tama aiyaba tula palu sąwanima, tama Abimelek toboluba tulalu, tama tobolu alua pali. 54 Tama polo agai te aga hwįbo nai sabilibo gesi bidi i wali. Tialima, agai te po agabolo wali, “Te nago bainat hwą selama, ena elao,” wali. “Te bidi dabego te po weyu, te wego ena ela muani po wabo te eno homugo usugobeo,” wali. Tama tibaso, te gesi bidigo te hwą bainatgo aga enama, tama aga isali. 55 Te Israel dabe augwaligo te Abimelek isibo sulama, tama tigidali te augwa buluba ma pelawali.

56 Tama tialigo Godigo te Abimelekgo te aga ayabolo me, te aga ama solo te bidi sese sela olama te gasa bidigo nogo si, te 70 bidi dabe ela muani, te dwai sę yali wei agabolo ponai. 57 Tama Godigo te Sekem dabe augwa dwai kolesaga yali sę wei ponani. Polobadu Jotam, te Jerubalgo ogwago te Sekem dabe augwali dolaibao po wali, tama megi da te tiwai sę pedelalio.

Copyright information for `MPS