a[Gag 19:24]
b[Bom 28:57; Ese 5:10]

Lamentations 4

Te Jerusalem dabe augwali te boi bidi dabego augwali dali boi hwįani sogo dwai sogo mu suali

Hobede mu dao.
Te Saion we bidi dolama elalubao.
Polobadu augwali te sawi yai gol tiwai
sawi yai mu elaluai dao.
Tiali goli, te gol dabe augwali ula me isąma,
megi da dolama mu elalubao.
Polobadu da, te Genuai Bidigo genuai be tempel
augwaligo te wiegi yai masigi dabego nigilama
elaluai dao.
Tiali goli, augwali megi da hagayali dao,
te masigi dabe subigila tulaluama,
te tigidali taun sunumi dabede munalua pabo dao.
Megi da, te we bidi augwali nogi ma elalubeo.
Augwali te dwai pobele bage sene dage te bidi dabego
nigai,
te sene dage tiwai dao.

Te uni yowi dabe augwali wiegi yai hasa dabe menio.
Tiali goli, augwaligo augwa wai bǫų dabe koneama,
tama augwaligo augwa wai bǫų dabe ame mabo dao.
Tiali goli, eno we bidi hani augwaligo te uni yowigo
ebo tiwai wiegi yai kolesaga ebo menio.
Menio. Augwaligo te nai meni yai wa pai bulude bidibo
genuai bago ebo kolesaga tiwai ebo dao.
Te bago subigila ge sasagano bilama, tagalobo dao.
Te tiwai me eno we bidi augwaligo augwa wai bǫų dabe
hobede homu me ebo menio.
Menio. Augwaligo augwali tudi ola mabo dao.
Te dwasianu wai bǫų dabe augwali tuabo ame menio.
Tama augwaligo dogoni dolama, mu aloa pabo dao.
Te wai bǫų dabe augwali biliyu,
te we bidigo augwali nai momainu
biliyu, hanalua bilalio.
Tiali goli, te bidi mego augwali nai me mabeo.
Megi da, te moni bidi dabe me te nai sǫą palio.
Polobadu da, augwali nai wiegi wiegi yai nai dabe
hauwa elaluai dao.
Tiali goli, megi augwali nasi elama,
augwali subigila te taun sunumi dabede isila peyu
yalio.
Polobadu augwaligo nai dabe hauwa mu elaluyu,
tama augwaligo wiegi wiegi yai au ebo nai dabe
gudiyu yai dao.
Tiali goli, augwali megi da,
nai mu menia pelama, tama megi da,
augwali te dwai pobele bage sabo pesagede nai te
gegebao.

Te Jerusalem dabe, eno we bidi,
augwaligo dwai sę yalide sali
sęgęgo te Sodom we bidigo sęgę edelalio.
Tama tibaso, Genuai Bidigo Jerusalem dabebolo
dene genuai mu te mani dao.
Tiali goli, Genuai Bidigo te Sodom dabe dolali sogo da,
te taun agai deli sogo mu tama te taun dolai dao.
Tama te boi bidi dabego megi te Jerusalem dabe dali
ebo tiwai te Sodom dabe dali yai menio. a 
Polobadu te Jerusalem dabego tobolu bidi dabe
augwali bugagia bidiyu,
augwaligo tigi wiegi yai mu elaluai dao.
Augwali bomai bidi dabe mu dao,
tama augwaligo tigiwali te wiegi yai homugo dąų
wabo masigi tiwai ula elalubo ąǫ yai dao.
Tiali goli megi da, augwaligo tigi dolama,
tama meda mu yalio.
Tama augwali te sunumi dabede bilibo sogo da,
te bidi dabego augwali tonobo konebeo.
Augwali dili pulu hą elama,
tama augwaligo tigi wa pai mu elaluali.
Te boi hwįbode isali bidi dabe augwali godolagi mu
elama,
te nai habuge yai bidi dabe aiyaba elalualio.
Magi baso meni, augwali polo isalio.
Tiali goli, gasa bidi hani augwali nasi mu elama,
tama sęgę bobobage sogo tolama,
tama augwali dili pulu hą elama, tama augwali
isalio.
10 Te augwa wai godolo homu yai ida dabe augwaligo
augwa wai bǫų dabe isibo sogo da,
te ida dabego te wai bǫų dabego
tigi selama, augwaligo ulama tualio.
Te tobage kolesaga te eno hobedai we bidi augwaliba
te boi bidigo te boi hwįani sogo te sę pedelai dao.
b 

11 Genuai Bidigo te Saion dali haliga sębę dwai mu
yalio.
Tama tibaso, agai aga dene genuai mu manio,
bidigo ąį te tǫba gelebo tiwai yali.
Te agai te Saion isi tulama,
tama te taun sese dela silibo tiwai yalio.
12 Te gasa tǫ pedai kantrigo king dabe,
me te haniani tǫde we bidigo homugo
te boi bidi dabego te Jerusalem aiyaba elaluama,
tama te taun sogobe homu yai dao.
13 Tiali goli, Godigo te boi bidi dabe tagala palama,
te Jerusalem dolai dao.
Magi baso meni.
Te profet dabe, me pris dabe, augwaligo dwai sę elama,
tama augwaligo te Jerusalemde
dwai sę meni yai we bidi ela mubaso tiai dao.
14 Te we bidigo kaneme te pris dabego ugwade,
me profet bidi dabego ugwade dagana sai tiwai
elama,
tama Godigo gedude te pris dabe dali,
profet dabe dali, augwali meda yai tiwai dao.
Tama augwaligo genuai sęgę mu salio.
Megi da, te pris dabe, me te profet dabe,
augwali te sunumi dabede popolo palio.
Tama tibaso, te we bidi augwali
te bage augwali pageba pabo hagela yalio.
15 Te we bidi dabego augwali
hai mayu elama, tiwai po wali,
“Dage gedao. Dage polo meda yali dao,
tama dage da pąba asigio.
Dage gediąo,” wali.
Tama tibaso, te pris dabe me profet dabe
augwali gasa kantriba wi peyu,
te olo wau bilibo bage tiwai bidali.
Tiali goli, te kantri we bidigo te bidi dabe augwali
te kantride bidimainu sula tagalobeo.
16 Genuai Bidi aga digi augwali
subigila pomainu sela sąwani,
tama agai augwali homu kone me ebeo,
te pris dabe, me tobolu bidi dabe,
augwali te we bidigo gedude genuai nogi me
elalubeo.

17 Dago tonaluama, tama dago te gasa tǫ kantri bidi
hani me deligo da ma oda sagasomainu tonaluali.
Dago te sunumi dabeba gedu tonono ela bilibadi,
tama dago gedu dene yali.
Tiali goli, dago olo dali tonalualio.
Augwali me asobeo. Augwaligo da tau sabo menio.
18 Te boi bidi dabego da dolainu no munalubaso,
tama da te sunumi dabede bilibo usu me ebeo.
Te da dolabo sogo te polo pedelalio.
Tama tibaso, da sese tama mu dola silalio.
19 Da wi pobadi, tama te boi bidi dabego da pobeasa
asalio.
Awe, augwali bomonama mu,
te ba kemodagego te hasa ela sainu bogo
pobeasa aiyaba tulalubo tiwai yalio.
Augwaligo da bulu du dabedu pobeasa bilama,
tama augwali te nai meni yai wa pai bulude
dualaluyu, da tonalualio.
Te da asobo suainu,
tama augwaligo da tola siyu, ela palio.
20 Tama augwaligo da bugagia bidimainu tonaluyu,
da tau sali bidi me augwaligo tola salio.
Te da te Genuai Bidigo sa muani te king dao.
Dago homugo da te king dologode bidiyu,
tama da bugagia bidiyu yaiba homu yali,
te meba gasa kantri dabe ebo gilama bidigowe
homu yalio.

21 Kantri Idom, megi nage Usgo tǫde bidibao.
Megi da, nage gisugu dwai olama,
tama nage Saion dolaibaso,
wiegi yai homu pemene megi yao.
Genuai Bidigo sębę te wain wę kapu deli tiwai dao.
Tama agai te Saiongo te kapude tumainu ilalio.
Tiali goli, agai nagebolo nosali me maiwaibao.
Tama nage dolama mu polaibao.
Tama nago naga tigide ugwa peda sąnama,
tama nage hale genuai mu yaibao.
22 Saion, nago sęgę saibaso, Genuai Bidigo nago sęgę
wei ponani dao.
Tialima, agai nago kalabus yali silaibao.
Te nago we bidi kalabus yali pįsigina sąwaibao.
Tiali goli, Idom, Genuai Bidigo nago
yali dwai sęde sali sęgę haninaibao,
tama agai nage me dene mawaibao,
te sęgę wei ponoyu.
Copyright information for `MPS