b[Gag 9:4; Prs 7:26-27; 19:26; Bom 12:16, 23; 15:23]
c[Hi 9:22]

Leviticus 17

Godigo te Israel dabego wali pabo wiegi yai kolesaga po pusali

(Dąį 17-27)

Te ofa dabe ebo pesage deli naga elalubao

Te Genuai Bidigo Mosesbolo po walama, te Aronbolo po weyu, agai te agai ogwa dabeba me te Israel we bidi tigidaliba walomainogo yali. Genuai Bidigo te tiwai po wai, “Eno te bomai po dabe dageba mobao. Te dage Israel bidigo te kibu tuabo homu ebaso, dagego te kau, me sipsip, me meme me deli selama, te bidibo pesage tomode me bulu badu ela mubaso da, teda dagego eno sel Ugwa Be sunumiba selasa aselama, te enabolo ofa tiwai mao, te nosali duga selama, tuagameo. Te dagego kibu elama, te kaneme gelama, te dagego enaba ofa me isąbaso da, teda dagego te bidi ela muani tiwai ebaso, te dagego dwai sę eno gedude elalueibao. Tibaso, dage eno hani tomode bidibo sela sąwaibao. Te po page e tiwai dao. Polobadu dage Israel dabego te kibu elama, te bidibo pesage bulu, badu ofa yali, tiali goli megi da, dagego te kibu elibaso, te prisba selasa pao, te eno sel Ugwa Be sunumiba pelama, te ena dali deli haliga pedalubo ofa yao. Te prisgo te kibugo kaneme selama, te sel Ugwa Be sunumi pąde elalubo te alta bogo baduba sąwaibao. Tama agai te ofa yabo kibu ili te ofa eyu, altaba ulubaso, te ena Genuai Bidi, eno denami odama, te eno homu godolo eyu, tede eno bugai haliga ebo dao. Dage Israelgo te bulu haubo bidi dabeba kibu elama, ofa ebo sę munu ma elamuo.
17:7Bidi mebago homugo te wali po te tobage bulu kauwa bidi te kibu meme tonobo ąǫ ebo dao wali.
Dagego te tiwai elama, te dagego ena tagaliyu, te tibo godiba homu kęą pali. Sesemane sogo dage hanigo te eno sel Ugwa Beba te kibu ofa tiwai siyu idu geao,” wali.

“Te nago te tiwai po augwaliba walao, te dage Israel bidi me deli, ma te dage dali bidibo gasa hani bidi me deligo, te isiba tigidali ulubo ofa me te agai gasa tobage ofa yabo homu ebaso da, teda agai te kibu eno sel Ugwa Beba sela aselama, ofa yao. Te meni baso da, te ena Genuai Bidi, eno hani we bidide aga sela sąyu, gudulaibao,” wali.

Kanemego naga sęgę sela sąbao, tibaso te kaneme tubo habu selali

10 “Dagego te kibu elibo sogo, dagego aga dogoni togolama, te kaneme tigidali aiyaba pomainao. Te dage Israel bidi me deli, ma dage dali bidibo gasa hanigo te kibu mi kaneme elalubadi tubaso da, teda ena Genuai Bidi eno agaba boi bidi eyu, te aga eno hani we bidide sela sąwaibao. b  11 Kanemego tigidali bidiba bidibo ula mayu, te kibuba mobao. Tibaso, eno te po dagebolo obao. Prisgo te ofa ebo kaneme altaba gelibao, te dage we bidigo sęgę dabe sela sąyu, kanemego te bidibo ula page elalubao, te kaneme deligo naga dage we bidi dabego sęgę sela sąbo dao. c  12 Tama tibaso, eno dage Israel dabebolo obao, te dage me deligo, ma te dage dali bidibo gasa hani bidi me deligo te kibu mi kaneme elalubadi me tugio. Te habu mu dao,” wai dao.

13 “Te dage Israel bidi me deligo, ma te gasa hani bidi me deligo aga te hasa gegegi pelama, agai te uni meme me deli, ma ba me deli, te eno dagebolo tugio wasiąwai nai enai baso da, teda agai te naigo kaneme gelama, te kaneme tǫgo haluao. 14 Magi baso meni, te tigidali bidigo bidibo ula me te hasago bidibo ula te aga kanemede naga elalubao. Te pagede naga eno dage Israel we bidibolo waliyu, dagego te kibu mi kaneme elalubadi tugio po obao. Bidigo te kibu mi kaneme elalubadi tubaso da, teda aga te eno we bidi hanide sela sąwaibao,” te po wai dao.

15 “Tialima, te kibu me deli olo dali isali, me uni hasago te hasa ela muai, nosali dage hanide digi te bidi ma we me deligo te hasa mi tubaso da, teda aga eno gedude meda pedalubao. Tialima, aga ugwa ąį tedelama, te aga digi me ąį paugi pao, te meda agade elalubadi giliga dega sigulaibao. Giliga iba dega sigulai baso da, teda aga dwagi yai ma pedalubo dao. 16 Te agai tigi me ugwa ąį telayu, pauyu isąbaso, te sę page agade digi elalubao, te aga yali kolesagade te sęgę aga tolobo dao,” te po wai.

Copyright information for `MPS