a[Sai 21:17; Mt 15:4; Mk 7:10]
b[Sai 20-14; Prs 18:20; Bom 5:18]
c[Prs 18:8; Bom 22:30; 27:20]
d[Prs 18:15]
e[Prs 18:22]
f[Prs 18:17; Bom 27:23]
g[Sai 22:19; Prs 18:23; Bom 27:21]
h[Prs 18:9; Bom 27:22]
i[Prs 18:19]
j[Prs 18:12-14]
k[Prs 18:16]

Leviticus 20

Godigo te po sela sąbo we bidi dabeba dwai dene mabo sę yaibao

Te Genuai Bidigo Mosesbolo te tiwai po walali, “Nago Israel we bidi augwaliba te tiwai po wao, te dage Israel me deli, ma dage dali bidibo gasa hani me deli, agai aga wai te tibo god Molekbolo ofa tiwai mobaso da, teda dagego te bidi ela muao. Tigidali we bidigo agaba masigi sąnama, te aga isibo siba usu nao. Te bidigo wai te Molekba mabo kolesagade, te eno sel Ugwa Be meda ilama, te eno genuai nogi aiyaba mu elalubo sę ebao. Tibaso da, eno te bidiba boi bidi elama, te aga eno we bidi hani tomode bidibo sela sąwaibao. Tiali goli, te we bidi augwaligo te bidigo kolesaga suali, te augwaligo homude olo nai me tiwai da homu elama, te augwaligo aga me ela musiąbaso da, teda ena digi eno agaba boi bidi eyu, te aga deli hani bageba me te ena tudiba munama, te Molekba lotu wabo we bidi tigidaliba te tiwai yaibao. Te augwali eno we bidi hanide sela sąwaibao,” wali.

“Te bidi me deli te kebele aubo bidiba pelama, te isali bidi noma bidi dali po mibo sę igi pabo sę ebo bidi yai baso da, teda te bidigo ena tagalama, te Godigo po odisąwai hanigo kolesaga wali pobao. Tibaso, eno agaba boi bidi eyu, te aga eno hani we bidide sela sąwaibao. Dage te tedali gasagi yai bidu tama sesemane sogo te eno godolo yabo wiegi yai doloba pai kolesagade bilao. Ena Genuai Bidi, ena duga God, eno te wai dao. Dagego eno bomai po tigidali wali pao, magi baso meni, ena Genuai Bidigo dage eno we bidi wiegi yai pedalumainu sa muai dao,” wali.

“Te bidi me deligo me, o te we me deligo me, te aga ida ayabolo te dwai da te tiwai po weyu, ‘Godigo nage dolomainao,’ obaso da, teda dagego te bidi ma te we ela muao. Bidi ma wego te tobage po wali da, te aga yali sę dagede aga isimainao,” wali. a 

10 “Te bidi me deligo abagi me deligo we penani yai baso da, teda dagego te bidi me te we dali si ela muao. b  11 Te bidigo te aga ayago we me deli dali penani sę yai baso da, te bidigo aga aya dolobao. Tialima, augwaligo te bidi dali te we dali si ela muao. Augwali sigo dwai sę yali sęgę elalubao, tialima augwali si isimainao. c  12 Te bidi me deligo aga ogwago we dali penani ebaso da, teda dagego augwali si ela muao. Augwa si deli kanemego te penani yali, tialima augwali sigo dobo sę yali sęgę elalubaso, te augwali si isimainao. d  13 Te bidi mego gasa bidi me penani ebaso, augwali sigo dwai sę genuai mu yalio. Tialima, dagego augwali si ela muao. Augwa si yali sę dagede naga augwa si isibao. e  14 Te bidi me deligo te we me we aga ida dali sabo si da, te dagego augwali sela ela munama, augwa tigi isiba ulao, magi baso meni, augwaligo dwai sę genuai mu yali, tama dagego te tobage kolesaga dage tomode ebo we me bidi te sula tagaligio. f  15 Te bidi me deligo te kibu sibi me penani ebo bidi, dagego te bidi ela muyu, te kibu me ela muao. 16 Te we me deli te hasa sibiba pelama, te hasa sibigo aga penani emainogo ebaso da, dagego te we dali, te hasa dali, ela muao. Augwa si yali sęgęde augwali si isimainao,” wai dao. g 

17 “Bidi me deligo aga abe mu ma sali, ma gasa aya ma idago wegi saibaso, te bidi me wego dwai kolesaga mu yalio. Tialima, tigidali we bidigo gedude dagego augwali siba wado po olama, te augwali si sela sąyu, te augwali si dage dali munu ma bidigio. Te bidi aga abe dali penani yali, tialima aga yali kolesagade sęgę tolomainao. h  18 Te bidi me deligo aga we te tigide bulu be gasi sai elalubadi te tąbaso da, teda augwali sigo eno gedude dwai meda yai kolesaga mu yali. Tama dagego augwali si eno we bidi hani tomode sela sąyao,” wali. i 

19 “Te bidi me deligo aga ida sabi we dali, ma aga ayago abe dali penani ebaso, te aga deli kanemede te sęgę sobao, te augwa si yali dwai kolesagade sęgę tolomainao. 20 Te bidi mego aga aya sabi bidigo we dali penani yali da, te bidigo aga aya sabi bidi hale dwai mu ilibao. Tama te bidi me te we augwa si yali sęde sęgę tolao. Te bidigo sobaso da, teda agai te wai dabe ame nabo usu egobeo, me te aya sabi bidigo wego te wai dabe me ame nogobeo. j  21 Te bidi mego aga amago we anoma elama sali da, te agai dwai kolesaga mu Genuai Bidi eno gedude ebao, te aga ama hale ilibao. Tibaso, te bidigo me te wego wai me ame nogobeo,” te po wai dao. k 

22 “Dagego eno bomai po tigidali me eno po tigidali wali pao. Megi eno dage odasa pabo, te Kenan tǫ te agai dage me bugulisąma, te dage bugagia bidaibao.”

23 “Te ena Genuai Bidigo po odisąma te Kenan tǫde bidibo bidi dabego kolesaga dagego wali me pigio. Augwaligo te dwai sę yai baso, te eno augwali godolo homu mu ebeo. Te megi da, eno augwali te tǫ kantride sela sąnama, te dagego te tǫ sagameo. 24 Eno te po dagebolo wai dao, te tǫ da wiegi yai mu, te ili hauwa elalubao, te nai hauwa tede holaibao. Te eno dagebolo menama, te dagego tǫ mu pedelaibao. Ena Genuai Bidi, ena dagego God, te eno dage gasa hani tomode sali, te dage enaduba deligo we bidi naga bidimainogo yai dao. 25 Tama tialima, dagego te mena kibu hasa ba sibi me bugagia dagaliyu, te wiegi yai tuabo me tusiąma habu sabo me dagalao. Hasa me ba te eno gedude wiegi yai isąwani, te dagego habu sao. Eno te tobage nai dabe te wiegi yai isąwai nai po dagebolo wali, te hasa me ba te dwasianu nai me, tialima te dagego tubaso da, teda dage eno gedude meda mu pedelaibao. 26 Dagego te dwai kolesaga dabe tagalama, te wiegi yai tedali mu bidiyu, te eno wiegi yai doloba pai kolesaga naga wali pao, magi baso meni, ena digi ena tedali wiegi yai elaluyu, te eno kolesaga tigidali te wiegi yai doloba pai mu elalubao. Te ena Genuai Bidi, eno dage te gasa hani bage tomode sali, te dage ena bage naga elalubao. 27 Mena bidigo ma wego te isali bidigo noma bidi dali po minama, te augwalide homu kolesaga sabo we bidi yai baso da, aga isimainao. Dagego agaba masigi sąnama, te aga ela muao. Aga yali sę dagede aga isimainao,” te po wai dao.

Copyright information for `MPS